ئەگەر مەبەستان چاكسازییە لەسەرەوە دەستپێبكەن
پەرلەمانتارێكی یەكێتی لەسەر پرسی پاسەوانی پەرلەمانتاران هاتە دەنگ

- 8/19/2019 12:06:00 AM 9028 جار خوێندراوەتەوە

خەندان-

باڵامبۆ كۆكۆیی، ئەندامی پەرلەمانی كوردستان لە فراكسیۆنی یەكێتی، سەبارەت بە بڕیارێكی وەزارەتی ناوخۆ تایبەت بە پاسەوانی پەرلەمانتاران رایگەیاند، پشتیگری هەمو چاكسازییەك دەكەن كە ببێتە مایەی بنەبڕكردنی گەندەڵی، بەڵام دەبێت ئەو كارە بەیاسا و لە پەرلەمانەوە بكرێت.
باڵامبۆ كۆكۆیی لەبارەی لێدوانێكی بەڕێوەبەری گشتی وەزارەتی ناوخۆی حكومەتی هەرێمی كوردوستان سەبارەت بە پاسەوانی ئەندامانی پەڕلەمان، دەڵێت،"وەك پەڕلەمانتارێك پشتگیری هەمو چاكسازیەك دەكەم كە ببێت بەمایەی بنەبڕكردنی گەندەڵی، پێشموایە ئەمە نیەتی هەمو پەڕلەمانتارانە".
كاكی بەڕێوەبەر بێئاگایە لەوەی كە پاسەوانی پەڕلەمانتاران بە یاسا ڕێكخراوە و پێویستە بۆ هەر گۆڕانكارییەك لەپێشدا ئەو یاسایە لە پەرلەماندا هەمواربكرێتەوە

 

كۆكۆیی دەشڵێت،"كاكی بەڕێوەبەر بێئاگایە لەوەی كە پاسەوانی پەڕلەمانتاران بە یاسا ڕێكخراوە و پێویستە بۆ هەر گۆڕانكارییەك لەپێشدا ئەو یاسایە لە پەرلەماندا هەمواربكرێتەوە، نەك وەك ئەوەی بەڕێزی دەڵێت پاسەوانی پەڕلەمانتاران كراوە بە گرێبەست و یاساییە".

ئەو بڕیارە زۆر نایاساییە و دەسەڵاتی ئێوەش نیە لە خۆوە گۆڕانكاری لە یاسای پەڕلەماندا بكەن

 

راشیگەیاند،"ئەو بڕیارە زۆر نایاساییە و دەسەڵاتی ئێوەش نیە لە خۆوە گۆڕانكاری لە یاسای پەڕلەماندا بكەن، ئەگەر مەبەستتان چاكسازییە، فەرمون با لەسەرەوە بۆ خوارەوە دەست پێ بكەین، پێویستە پاسەوانی سەرجەم كاربەدەستان ڕێكبخرێتەوە لە سەرۆكی هەرێم تا دەگاتە بەڕێوەبەری ناحیەیەك".

بیرت نەچێت پاری كڕینی سەیارەیەك (تەنها یەك سەیارە) بۆ هەر بەڕێزێك لە سەرۆكی هەرێم تا دەگاتە بەڕێوەبەری ناحیەیەك موچەی دە (10) ساڵی پاسەوانێكە

 

باڵامبۆ كۆكۆیی رودەكاتەوە بەڕێوەبەرەكەی وەزارەتی ناوخۆ و دەڵێت،"بیرت نەچێت پاری كڕینی سەیارەیەك (تەنها یەك سەیارە) بۆ هەر بەڕێزێك لە سەرۆكی هەرێم تا دەگاتە بەڕێوەبەری ناحیەیەك موچەی دە (10) ساڵی پاسەوانێكە، كامیان بارگرانیە ئەو ژمارە زۆرەی سەیارەكان یان 933 پاسەوان كە هەموی گەنجی بێكار و كوڕی شەهید و فەقیرو هەژاری ئەم وڵاتەن، لەم وڵاتە پڕخێر و بەرەكەتەدا بە شەهادەی بەرزەوە بە پاسەوانی ڕازین و ئەویشیان پێ ڕانابینن".

لە كۆتاییشدا رایگەیاند،"دەبێت بە پەڕلەمان و حكومەتەوە كار بكەین بۆ بنبڕكردنی گەندەڵی، نەك بۆ شكاندنی دامەزراوەی پەرلەمان كە موڵكی میلەتە و پەرلەمانتاران هەڵبژێردراوی میلەتن".



Copyright © 2016 Xendan.org all rights reserved

designed and developed by AVESTA GROUP