بەپەلە

باس لە پلانی چوار ساڵی کارکردنیان دەکات
پەخشان زەنگەنە لەبارەی دەستبەرداربونی لە پۆستەکەی بۆ خەندان دەدوێت

- 8/18/2019 12:46:00 PM 5522 جار خوێندراوەتەوە

خەندان-

ئەمینداری گشتی ئەنجومەنی باڵای کاروباری خانمان رایدەگەیەنێت، بڵاوبونەوەی هەواڵی دەستبەرداربون لە پۆستەکەی کە گوایە داوای لێکرابێت "راست نیە"، دەشڵێت، سکرتێری حزبی شیوعی کوردستان رونکردنەوەی لەوبارەیەوە داوە.
نەداوامان لێکراوە و نە شتێکی لەوجۆرە لە ئارادایە و نە پەخشانیش وەکو نوێنەری حزب ئەو ئەرکەی خستوەتە ئەستۆ

 

پەخشان زەنگەنە، ئەمینداری گشتی ئەنجومەنی باڵای کاروباری خانمان بە خەندان-ی راگەیاند، "د.کاوە مەحمود، سکرتێری حزبی شیوعی رونکردنەوەی داوە و دەڵێت، نەداوامان لێکراوە و نە شتێکی لەوجۆرە لە ئارادایە و نە پەخشانیش وەکو نوێنەری حزب ئەو ئەرکەی خستوەتە ئەستۆ".
من ئەو پۆستە بە ئەرک دەبینم، چونکە هیچ ئیمتیازێکم نیە لەو شوێنەدا

 

ئاماژە بەوەشدەکات، "من ئەو پۆستە بە ئەرک دەبینم، چونکە هیچ ئیمتیازێکم نیە لەو شوێنەدا، بەڵکو ئەرکێکە گرتومەتە ئەستۆ، ئاسایی ئاڵوگۆڕ دەکرێت، بەڵام ئەو زانیاریە نە ئەسڵی هەیە و نە راستە".

ئەو وتانەی پەخشان زەنگەنە لەکاتێکدایە دوێنێ لە هەندێک دەزگای راگەیاندن بڵاوکرایەوە، کە "پارتی دیموکراتی کوردستان داوای لە حزبی شیوعی کردوە پۆستی ئەمینداری گشتی ئەنجومەنی باڵای کاروباری خانمان رادەستبکاتەوە، چونکە حزبی شیوعی بەشداری کابینەکەی نەکردوە و ئۆپۆزسیۆن بونی خۆی راگەیاندوە".
بە نوسراوی فەرمی داوامان لێکراوە کە بەرنامەی چوار ساڵی کارکردن بۆ ئەنجومەن دابنێین، ئێستا لەسەروبەندی ئامادەکردنی ئەو بەرنامەیەداین

 

لەبارەی کارەکانی چوار ساڵی ئایندەیان لە ئەنجومەنی باڵای کاروباری خانمان، پەخشان زەنگەنە دەڵێت، "وەکو هەریەکێک لە وەزارەتەکانی حکومەتی هەرێم بە نوسراوی فەرمی داوامان لێکراوە کە بەرنامەی چوار ساڵی کارکردن بۆ ئەنجومەن دابنێین، ئێستا لەسەروبەندی ئامادەکردنی ئەو بەرنامەیەداین، کاری لە پێشینەمان لەم کابینەیەدا ئەوەیە کە یاسای ئەنجومەنی باڵای کاروباری خانمان دەربچێت و ناردوشمانە بۆ حکومەت و لەگەڵ فراکسیۆنەکانی پەرلەمانی کوردستانیش قسەمان کردوە".
لە بونی ئەو یاسادا قەوارەیەک و کیانێک و دەسەڵات و پێگەیەکی یاسایی دەدرێت بە ئەنجومەنی باڵای کاروباری خانمان، هەرچەند ئێستا نایاسایی نیە

 

زەنگەنە رونیشیکردەوە، "لە بونی ئەو یاسادا قەوارەیەک و کیانێک و دەسەڵات و پێگەیەکی یاسایی دەدرێت بە ئەنجومەنی باڵای کاروباری خانمان، هەرچەند ئێستا نایاسایی نیە، بەڵکو بە بڕیاری ئەنجومەنی وەزیران دامەزراوە و دەمانەوێت وەکو هەر وەزارەتێکی حکومەت یاسایەکی تایبەتی خۆی هەبێت".
بەشداری ژن لەم کابینەیەدا باشترە لە هەمو کابینەکانی دیکە

 

لەبارەی بەشداریکردنی خانمان لەم کابینەیەدا پەخشان زەنگە دەڵێت، "بەشداری ژن لەم کابینەیەدا باشترە لە هەمو کابینەکانی دیکە، پێموایە بەرەوپێشچونێکی باش هەیە لەبارەی بەشداریکردنی خانمان لە پۆستەکاندا بەراورد بە کابینەکانی دیکە".


Copyright © 2016 Xendan.org all rights reserved

designed and developed by AVESTA GROUP