بەپەلە

بە سماقولی و دەربەندیخان ناوەستین
شاسوار عەبدولواحید: با هەموان بزانن چۆن چەند ساڵە پارەی ئەم میلەتە دەفەوتێت

- 8/17/2019 9:37:00 PM 12909 جار خوێندراوەتەوە

خەندان-

شاسوار عەبدولواحید، سەرۆكی جوڵانەوەی نەوەی نوێ رایگەیاند،"بە سماقولی و دەربەندیخان و یاریگاکان و شەقامەکانی سلێمانیەوە ناوەستین، بەردەوام دەبین و پەلدەهاوێژین".
حکومەت 79 ملیۆن دینار بودجەی تەرخانکردوە تەنها بۆ پڕکردنەوەی چاڵەکان و نۆژەنكردنەوەی جادەی تونێلەکەی دەربەندیخان

 

شاسوار عەبدولواحید لە پۆستێكدا لە هەژماری تایبەتی خۆی لە تۆڕی كۆمەڵایەتی فەیسبوك رایگەیاند،"بە سماقولی و دەربەندیخان و یاریگاکان و شەقامەکانی سلێمانیەوە ناوەستین، بەردەوام دەبین و پەلدەهاوێژین، حکومەت 79 ملیۆن دینار بودجەی تەرخانکردوە تەنها بۆ پڕکردنەوەی چاڵەکان و نۆژەنكردنەوەی جادەی تونێلەکەی دەربەندیخان، لە ماوەی 7 بۆ 10 رۆژ تەواوی دەکەن بە وتەی خۆیان کە دڵنیام رەنگە زیاتریشی پێ بچێت".

ئەگەر تەنها چاککردنی چاڵەکان بوایە و ئەو نۆژەنە بوایە کە حکومەت ئەمڕۆ دەستی پێکردوە، ئەوا هەموی کەمتر لە 12 ملیۆن دیناری تێ دەچو

 

سەرۆكی جوڵانەوەی نەوەی نوێ دەڵێت،"تیمی ئەندازیاری نەوەی نوێ تێچونی تەواوی چاککردنی شەقام و پڕکردنەوە و سەرلەنوێ قیرتاوکردنی شەقامەکە و بۆیاخو چاککردنی دیوار و روناکی ناو تونێلەکە، هەموی بە 62 ملیۆن دینار خەمڵاندوە، هەمو ئەم کارانە رامانگەیاندبو کە لەماوەی پێنج رۆژدا ئەنجامی دەدەین، خۆ ئەگەر تەنها چاککردنی چاڵەکان بوایە و ئەو نۆژەنە بوایە کە حکومەت ئەمڕۆ دەستی پێکردوە، ئەوا هەموی کەمتر لە 12 ملیۆن دیناری تێ دەچو!"

شاسوار عەبدولواحید هۆكاری باسكردنی ئەو زانیارییانەی خستوەتەرو دەڵێت،"تاوەکو هەموان بزانن کە چۆن چەند ساڵە پارەی ئەم میلەتە دەفەوتێت، کە چۆن کاتی پرۆژەکان درێژ دەکرێنەوە و کاتی خەڵک دەکوژن، کە چۆن پرۆژەکان تەنها پینەوپەڕۆی دەکەن و پارەیەکی زۆری لێ دەخۆن".

ئێمە ئێستا لە حکومەت نین، دەسەڵات و پارە و بودجەمان لە بەردەست نیە تاوەکو جیاوازی خۆمان و ئەم دو حیزبەی دەسەڵاتان نیشان بدەین

 

دەشڵێت،"ئێمە ئێستا لە حکومەت نین، دەسەڵات و پارە و بودجەمان لە بەردەست نیە تاوەکو جیاوازی خۆمان و ئەم دو حیزبەی دەسەڵاتان نیشان بدەین، بەڵام بەم ئیمکانیەتە کەمەوە دەمانەوێت نیشانی خەڵکی بدەین کە ئێمە چیمان پێ دەکرێت؟ چۆن ئەو پرۆژانەی ماوەیەکی زۆرە خەڵکی دەناڵێنن بەدەست کەموکورتیەکانیەوە، کەچی هەر کە ئێمە دەڵێین چاکی دەکەین، یەکسەر ئەوانیش دەدەن بە سەریدا و وەک ئەوەی ئێمە چەند ساڵە دەستمان گرتون و ئێمە ناهێڵین خزمەت بە شار و شارۆچکەکانی هەرێم بکەن".

حکومەت تەواوی تونێلەکەی دەربەندیخان نۆژەن ناکاتەوە

 

سەرۆكی جوڵانەوەی نەوەی نوێ دڵنیاییش دەدات لەوەی حکومەت تەواوی تونێلەکەی دەربەندیخان نۆژەن ناکاتەوە و داوا دەكات و دەڵێت، "با ئێستاش بیداتە دەست ئێمە و بزانێت چی لێ دەکەین و چ نمونەیەکی جوان نیشان دەدەین!؟"

دەشڵێت،"لە کۆی ئەمانە دەمانەوێت یەک پەیامی سادە بگەێنینە هاوڵاتی ئاسایی و بەشخوراوی ئەم هەرێمە، ئەویش ئەوەیە کە ئێمە هێزێکی ئۆپۆزسیۆنین، جیاواز کاردەکەین، ململانێ دەکەین لە پێناو خزمەت، لە پێناو دروستکردنی کێبڕکێ لە نێوان ئێمە و دەسەڵاتدا، کە لە کۆتایی هەمو ئەمانە هاوڵاتی براوەی یەکەم دەبێت".

دەتوانین فشار لەسەر حکومەت دروست بکەین و ئەوانیش لە رقی ئێمە یان لە ململانێی ئێمە زیاتر خزمەتی ئێوە بکەن

 

ئاماژەی بەوەشكردوە،"پێشتر زۆر جار دەیاندا بە گوێماندا، دەیانوت ئێوە هێزێکی نوێی بێ ئەزمون لە سیاسەت، چیتان پێ دەکرێت؟ ئێوە سەرەتاتانە و دەنگ و کورسی کەمتان هێناوە، چیتان پێ دەکرێت؟ ئێوە چەکتان نیە، چیتان پێ دەکرێت؟ دەزانن چیمان پێ دەکرێت؟ دەتوانین فشار لەسەر حکومەت دروست بکەین و ئەوانیش لە رقی ئێمە یان لە ململانێی ئێمە زیاتر خزمەتی ئێوە بکەن، دەتوانین ئەو کێبڕکێیە دروست بکەین کە لە چوار ساڵی رابردو بەهۆی نەبونی ئۆپۆزسیۆنەوە کێبڕکێ نەمابو، حکومەت بێ باک بو لە خەڵک و خزمەتی خەڵکی نەدەکرد".

لە چوار سالی داهاتو، یان دەچینە دەسەڵاتەوە و خۆمان لە رێی حکومەتەوە خزمەتتان دەکەین و خەون و پرۆژەکانمان جێبەجێ دەکەین! یاخود ئۆپۆزسیۆنێکی زۆر لە ئێستا چالاکتر و بە حەجم گەورەتر دەبین

 

سەرۆكی جوڵانەوەی نەوەی نوێ دەڵێت،"دو ئەگەر هەیە لە چوار سالی داهاتو، یان دەچینە دەسەڵاتەوە و خۆمان لە رێی حکومەتەوە خزمەتتان دەکەین و خەون و پرۆژەکانمان جێبەجێ دەکەین! یاخود ئۆپۆزسیۆنێکی زۆر لە ئێستا چالاکتر و بە حەجم گەورەتر دەبین و لە هەردو حاڵەتەکەدا تۆی هاوڵاتی براوەی یەکەم دەبیت. بەڵام گەر لە هەمو شت بێهیوا بیت و پێتوابێت ئێمە هیچمان پێ ناکرێت، ئەوا گۆڕەپانەکە تەخت دەکەیت بۆ دەسەڵات تا زوڵمی زیاترت لێ بکات و زیاتر فەرامۆشت بکات".

 


Copyright © 2016 Xendan.org all rights reserved

designed and developed by AVESTA GROUP