سەبارەت بە بەرتەنگی شوێنی مانەوەی حاجیان لە مینا رونكردنەوە دەدرێت

- 8/12/2019 12:41:00 PM 2576 جار خوێندراوەتەوە

خەندان-

سەبارەت بە بەرتەنگی شوێنی مانەوەی حاجیانی كورد لە مینا، بەڕێوەبەری گشتی حەج و عومرە رایگەیاند، تەرخاننەكردنی شوێنی زیادە بۆ پشكی زیادەی حاجیان بوەتە هۆی ئەو كێشەیە.

هەمان شوێنی پارساڵ تەرخانكراوە 

قاسم رەسول بەرزنجی، بەڕیوەبەری گشتی حەج و عومرە دوێنی یەكشەممە لەمیانی لێدوانێكیدا رایگەیاند "سەرەڕای ئەوەی ئەمساڵ نزیكەی دو هەزار و 250 كەس بۆ پشكی زیادەی حاجیان هەبوە، بەڵام پێگەی تەرخانكراو بۆ حاجیان هەمان ئەو شوێنەی پارساڵ بوە كە بۆ پێنج هەزار و 400 حاجی دانرابو".

پەیوەندی نیە بە بەڕێوەبەرایەتی گشتی حەج و عومرەی كوردستان

ئاماژەی بەوەشكرد "هۆكاری تەرخاننەكردنی شوێنی پێویست بوەتە هۆی ئەوەی حاجیانی كورد لە مینا نەتوانن تا رادەیەك بە ئاسانی تێیدا بحەوێنەوە و هۆكارەكە پەیوەندی نیە بە بەڕێوەبەرایەتی گشتی حەج و عومرەی كوردستان".

ئەو پشكە لە لایەن وەزارەتی حەجەوە بە شێوەیەكی فەرمی زیادكراوە

لە بەشێكی دیكەی وتەكانیدا رەسول بەرزنجی رایگەیاند "كێشەی بەرتەنگی شوێنی مانەوەی حاجیان سەرجەم حاجیانی عێراقی گرتوەتەوە و ئەو پشكە لە لایەن وەزارەتی حەجەوە بە شێوەیەكی فەرمی زیادكراوە، چەند هەوڵیشمانداوە نەمانتوانیوە هیچ شوێنێكی دیكە زیادبكەین".

بەڕێوەبەری گشتی حەج و عومرە، سەبارەت بەو بابەتە بەناوی لیژنەی سەرپەرشتیاری حەج داوای لێبوردنی لە حاجیانی كوردستان كرد و رایگەیاند، "كارەكە لە دەسەڵاتی ئێمەدا نەبوە و هیوادارین بە هەڵە لە بابەتەكە تێنەگەن".


نیشانەکردن :

#هه‌رێمی‌ كوردستان

Copyright © 2016 Xendan.org all rights reserved

designed and developed by AVESTA GROUP