بریتانیا رەتیدەكاتەوە منداڵانی داعش لە عێراق و سوریا وەربگرێتەوە

- 8/12/2019 9:37:00 AM 1694 جار خوێندراوەتەوە

خەندان-

رۆژنامەیەكی بریتانی رایگەیاند، شانشینی یەكگرتوی بریتانیا رەتیدەكاتەوە پێشوازی لەو ژن و منداڵانەی داعش بكات كە  بە رەگەز بریتانین.

بریتانیا وەریانناگرێتەوە

لە راپۆرتێكی لوسی فیشەر، پەیامنێری كاروباری بەرگری بریتانیا كە لە رۆژنامەی تایمز-ی بریتانی دا بڵاوكراوەتەوە هاتوە "بریتانیا ئەو ژن و منداڵانەی چەكدارانی داعش وەرناگرێتەوە كە رەگەزنامەی بریتانیایان هەیە و لە ئێستادا لە ناوچەكانی باكوری سوریا و باشوری عێراقدان".

حكومەتی بریتانیا لەوبارەیەوە بڕیاریداوە

راپۆرتەكەی فیشەر بە ناوی "منداڵانی داعش ناگەڕێنەوە بۆ نیشتیمان" باس لەوەدەكات بەپێی بڕیارێكی حكومەتی بریتانیا، ژن و منداڵانی بە رەگەز بریتانی ناوچەكانی جەنگ لە عێراق و سوریا رێگەیان پێنادرێت بچنەوە زێدی خۆیان، ئاماژەی بەوەشكردوە "ساجید جاوید، وەزیری پێشوی ناوخۆی بریتانیا پێش ئەوەی ببێتە وەزیری گەنجینەی ئەو وڵاتە مانگی راربردو ئەو بڕیارەی داوە".

 

بەگوێرەی راپۆرتەكە، ساجید جاوید رایگەیاندوە "ناردنی سەرباز بۆ باكوری سوریا تا ئەو ژن و منداڵە بە رەگەز بریتانیانە رزگاربكەن، كارێكی زۆر مەترسیدارە".

پێدەچێت بڕیارەكە لێكەوتەی نەرێنی هەبیت

رۆژنامەكە دەڵێت "پێدەچێت بڕیارەكە لێكەوتە و ئەنجامی نەرێنی هەبێت و ببێتە هۆی دەنگی نارازی رێكخراوەكانی مافی مرۆڤ و كۆمەڵگەی مەدەنی كە پێشتر داوایانكردبو منداڵەكان بگەڕێنرێنەوە بۆ بریتانیا چونكە ئەوان بێتاوانن".

بەپێی تایمز-ی بریتانیا، "نزیكەی 900 بە رەگەز بریتانی لە وڵاتەكەیان هەڵهاتون بە مەبەستی پەیوەندیكردن بە رێكخراوی چەكداری داعشەوە، پێدەچێت لە مانگی ئازاری ئەمساڵەوە 400 لەو چەكدارانە گەڕاونەتەوە بۆ بریتانیا.



Copyright © 2016 Xendan.org all rights reserved

designed and developed by AVESTA GROUP