تورکیا لە کڕینی سیوخۆی روسی نزیک دەبێتەوە

- 8/10/2019 7:49:00 PM 1641 جار خوێندراوەتەوە

خەندان-

بەرپرسانی وەزارەتی بەرگری تورکیا، داوایان لە سوپای تورکیا کردوە پێشنیازەکەی روسیا سەبارەت بە پێدانی فرۆکەی جەنگی روسی سیوخۆ تاوتوێ بکات و پێشنیازەکە بەهەند وەربگرن.


رێکەوتی 19 ی مانگی رابردو، حکومەتی روسیا، ئامادەیی خۆی نیشاندا لە فرۆشتنی فرۆکەی جەنگی  SU-35 ی روسی بە ئەنقەرە، ئەوەش دوای دەرکردنی ئەنقەرە لە پرۆگرامی F-35 لەلایەن واشنتنەوە.

بەگوێرەی راپۆرتێکی رۆژنامەی  یەنی شەفەقی تورکی، وەزارەتی بەرگری تورکیا لە ئێستادا کڕینی ئەو فرۆکە روسیانە کە ناسراوە بە سیوخۆیSU-35 خستوەتە بەر باس و تاوتوێ.

مانگی رابردو سێرگی چێمیزۆڤ، بەڕێوەبەری جێبەجێکاری کۆمپانیای رۆستێک، لە بەیاننامەیەکدا وتی" ئەگەر هاوکارە تورکەکانمان خوازیار بن، ئەوا ئێمە ئامادەین فرۆکەی جەنگی( سیوخۆ )SU-35 یان پێ بفرۆشین"

هەفتەی رابردو، نوسینگەی جێگری سەرۆکوەزیرانی روسیا رایگەیاند، کۆمپانیایی سیوخۆی دەستیکردوە بە جێبەجێکردنی  ئەو بەڵێننامەیەی تایبەتە بە بەرهەمهێنانی  نەوەی پێنجەمی فرۆکە جەنگیەکانی.

فرۆکەی SU-35، لە لایەن کۆمپانیای رۆستێک-ەوە بەرهەمدەهێنرێت، کە لە ساڵی 2007ەوە لەلایەن ڤلادمیر پوتین سەرۆکی ئەو وڵاتەوە دامەزراوە، فرۆکەکە خاوەنی چەندین تایبەتمەندی  ئەندازیاری بەهێز و تەکنیکی نوێیە، بەوە دەناسرێتەوە کە لە توانایدا هەیە مانۆڕی ئاسمانی دژوار ئەنجام بدات، لە ساڵی 2016 وە بەشێوەیەکی سەرەکی لە جەنگی ناوخۆی سوریادا بۆ بۆردومانکردنی هێزەکانی ئۆپۆزسیۆنی سوریا بەکاردێت.



Copyright © 2016 Xendan.org all rights reserved

designed and developed by AVESTA GROUP