ئەردۆغان: سەرجەم ئەنجامدەرانی هێرشەكەی هەولێر دەستگیركراون

- 7/26/2019 2:31:00 PM 6792 جار خوێندراوەتەوە

خەندان-

سەرۆك كۆماری توركیا لەمیانی لێدوانێكیدا رایگەیاند، سەرجەم ئەنجامدەرانی هێرشە چەكداریەكەی هەولێر دەستگیركراون و بەمنزیكانە تاوانبارانی دیكەش بە سزای خۆیان دەگەیەنین.

رەجەب تەییب ئەردۆغان، سەرۆك كۆماری توركیا ئەمڕۆ هەینی لەمیانی لێدوانێكیدا بۆ ئەندامانی پارتی داد و گەشەپێدان رایگەیاند "سەرجەم ئەنجامدەرانی ئەو هێرشە چەكداریەی كە لە هەولێر بەرامبەر دێپلۆماتكارەكەمان ئەنجامدرا دەستگیركراون".

لە داهاتویەكی نزیكدا تاوانبارانی دیكەی سەر چیاكان بە سزای خۆیان دەگەیەنین

ئاماژەی بەوەشكرد "دەستگیركدرنی ئەو ئەنجامدەرانە، توانا و وردبینی هێزەكانمان دەردەخاتو لە داهاتویەكی نزیكیشدا (تاوانبارانی دیكەی سەر چیاكان) بە سزای خۆیان دەگەیەنین".

ئەردۆغان سەبارەت بە دۆزی گەریلاكانی پارتی كرێكارانی كوردستان (پەكەكە) و قەندیل رایگەیاند "ئامانجمان ئەوەیە لەجیاتی روبەروبونەوەی چیا سەختەكان، پشتێنەیەكی ئارام لە دەشتە تەختەكانی ئەودیو سنورەكانمانەوە دروستبكەین، بەوشێوەیە كێشەیەكمان نابێت بە ناوی قەندیل".

لە باشوری كوردستان پشتێنەیەكی ئارام دروستدەكەین بۆ روبەڕوبونەوەی قەندیل

وتیشی "دروستكردنی ئەو پشتێنە ئارامە لە دەشتەكانی ئەودیو سنورەكانمان (كە ناوچەكانی باشوری كوردستان دەگرێتەوە)، سەركەوتومان دەكات و لە كێشەی قەندیل دورماندەخاتەوە، هاوكات پەیوەندی نێوان تێكدەرەكانی باكوری سوریا و باشوری عێراق دەبچڕێنێت".

لە هەمان كۆبونەوەدا، ئەردۆغان بە توندی هەڕەشەی لە هێزەكانی باكور و رۆژهەڵاتی فورات كرد و بە زمانێكی توند رایگەیاند "بێگوێدانە بەر واشنتن، پێداگردەبین لەسەر لەناوبردنی هێزەكانی باكوری سوریا و دەیانخەینە ژێر خاكەوە".

 

ئەو وتانەی ئەردۆغان لە چواچێوەی بەردەوامبونی ئۆپەراسیۆنی چنگ-دایە، كە لە ناوچەكانی باشوری كوردستان بەرامبەر گەریلا و ئەندامانی پەكەكە ئەنجامیدەدات.



Copyright © 2016 Xendan.org all rights reserved

designed and developed by AVESTA GROUP