سوپای تورکیا: ئەنجامدەرانی هێرشەکەی هەولێرمان کوشتوە

- 7/25/2019 2:41:00 PM 52296 جار خوێندراوەتەوە


خەندان-
سوپای تورکیا رایگەیاند لەهێرشێکی ئاسمانیدا بۆ سەر بنکەو بارەگاکانی پارتی کرێکارانی کوردستان ( پەکەکە) لەچیای قەندیل، توانیویانە ئەو چەکدارانە بکوژن کە دەستیان لە هێرشەکەی هەولێرەوە هەیە.
 
بەپێی ئاژانسی رۆیتەرز، لە راگەیەندراوێکی وەزارەتی بەرگری تورکیادا هاتوە بەهەماهەنگی لەگەڵ ئۆپەراسیۆنی چنگدا، هێرشی ئاسمانی بۆسەر ناوچەی قەندیل لە "باکوری عێراق" ئەنجام دراوە و تێیدا بنکەو بارەگاکانی پارتی کرێکارانی کوردستان کراونەتە ئامانج.

لەهێرشەکەی هەفتەی رابردو سەر چێشتخانەیەکی هەولێردا سێ کەس کوژران کە یەکێکیان دپلۆماتکارێکی تورک بو دواتر دەزگای ئاسایشی هەرێم لە راگەیەنراوێکدا دەستگیرکردنی تۆمەتباری سەرەکی روداوەکەی راگەیاند.

تورکیا پارتی کرێکارانی کوردستان بەئەنجامدەری ئەو تاوانە دەزانێت و ئەو رێکخراوەش رەتیدەکاتەوە کارێکی لەوجۆرەیان کردبێت و دەشڵێن " تۆمەتباری سەرەکی هیچ پەیوەندییەکی بەوانەوە نیە". 
دو ئۆتۆمبێلیان کردۆتە ئامانج کە ئەنجامدەرانی هێرشەکەی هەولێر بون

بەگوێرەی زانیارییەکانی وەزارەتی بەرگری تورکیا کە ئاژانسی رۆیتەرز بڵاویکردۆتەوە لەهێرشەکانی قەندیلدا کە بەهاوکاری دەزگای هەواڵگری تورکیا بوە دو ئۆتۆمبێلیان کردۆتە ئامانج کە ئەنجامدەرانی هێرشەکەی هەولێر بون.
ئەنجامدەرانی هێرشەکە پاش دەرچونیان لەهەولێر لەژێر چاودێریدابون و رێگەو شوێنیان ئاشکرا کراوە

تا ئێستا نازانرێت چەند کەس بەهۆی ئەو هێرشە ئاسمانییەوە گیانیانلەدەستداوە، بەڵام سی ئێن ئێن تورک بڵاویکردەوە کە ئەنجامدەرانی هێرشەکە پاش دەرچونیان لەهەولێر لەژێر چاودێریدابون و رێگەو شوێنیان ئاشکرا کراوە.

نیشانەکردن :

#تورکیا

Copyright © 2016 Xendan.org all rights reserved

designed and developed by AVESTA GROUP