نۆ ئەندامی خێزانێک لە داقوق بە دەستڕێژی گوللـە کوژران

- 7/25/2019 9:45:00 AM 12736 جار خوێندراوەتەوە

خەندان-

جێگری مەڵبەندی دوی کەرکوکی یەکێتی رایگەیاند، درەنگانی شەوی رابردو نۆ ئەندامی خێزانێک لە داقوق بە دەستڕێژی گوللە کوژراون.

شەوی رابردو 10 ئەندامی خێزانێک کە هی دو برا بون بە ئۆتۆمبێلێکی جۆری ئۆپڵ چونەتە ئاوایی دارا لە سنوری حەفتەغار، بەمەبەستی سەردانکردنی نەخۆش، بەڵام لەکاتی گەڕانەوەیان لە دەروازەی گوندەکە تەقەیان لێکراوە.
درەنگانی شەوی رابردو ئەو هاوڵاتیانە کە ئەندامی یەک خێزان بون و دەستڕێژی گوللەیان لێکراوە و نۆ کەسیان کوژراون

 

ئیدرس حاجی عادل، جێگری مەڵبەندی دوی کەرکوکی یەکێتی بە خەندان-ی راگەیاند، "درەنگانی شەوی رابردو ئەو هاوڵاتیانە کە ئەندامی یەک خێزان بون و دەستڕێژی گوللەیان لێکراوە و نۆ کەسیان کوژراون و تەنها کەسێکیان بە برینداری رزگاری بوە".

ئاماژەی بەوەشکرد، "هەر شەوی رابردو دوای بردنی بریندارەکان و کوژراوەکان بۆ نەخۆشخانەی داقوق گرژیی لە نێوان پۆلیسی فیدڕاڵیی داقوق و پۆلیسی فدڕاڵی عێراق رویداوە و لە ئەنجامدا ئەفسەرێکی پۆلیسی داقوق بە ناوی محەمەد کوژراوە".
تا ئێستا دیارنیە ئەو نۆ کەسە کوژراون کێ دەستڕێژی گوللەی لێکردون

 

جێگری مەڵبەندی دوی کەرکوکی یەکێتی وتیشی، "تا ئێستا دیارنیە ئەو نۆ کەسە کوژراون کێ دەستڕێژی گوللەی لێکردون، بەڵام بەهۆی دروستبونی بۆشایی ئەمنییەوە کەس ناتوانێت ئەو سنورە بپارێزێت".
نیو کاتژمێر پێش کوژرانی ئەو هاوڵاتیانە، چەکدارانی داعش سێ گوللە هاوەنیان ئاڕاستەی ئاوایی دارا لە سنوری حەفتەغار کردبو

 

ئیدرس حاجی عادل ئەوەشی خستەڕو، "نیو کاتژمێر پێش کوژرانی ئەو هاوڵاتیانە، چەکدارانی داعش سێ گوللە هاوەنیان ئاڕاستەی دارا لە سنوری حەفتەغار کردبو، یەکێک لەو هاوەنەکان کەوتوەتە ماڵێکەوەو لە ئەنجامدا شەش کەس برینداربون و ئەمڕۆ پێنجشەممەش کەسێکیان گیانی لەدەستدا".


Copyright © 2016 Xendan.org all rights reserved

designed and developed by AVESTA GROUP