بەپەلە

"وەزیری دارایی بەبەڵێنی وەگرتنی پۆستەکەی لەناو گۆڕاندا ماوەتەوە "

- 7/22/2019 7:23:00 PM 16976 جار خوێندراوەتەوە

خەندان-
محەمەد عەلی ئەندامی دەستلەکارکێشاوەی جڤاتی نیشتمانی بزوتنەوەی گۆڕان رایگەیاند ئاواتی شێخ جەناب، وەزیری دارایی کابینەی نوێی حکومەتی هەرێم، پاش هەڵبژاردنەکانی پەرلەمانی کوردستان نامەی دەستلەکارکێشانەوەی پێشکەشی گۆڕان کردوە، بەڵام بەبەڵێنی وەرگرتنی پۆستی وەزیری دارایی گەڕاوەتەوە. 

د. محەمەد عەلی لە تۆڕی کۆمەڵایەتی فەیسبووک نوسیویەتی " ئاوات شیخ جەناب 2018/9/27 و سێ ڕۆژ پێش ئەنجامدانی ھەڵبژاردنی پەرلەمانی کوردستان نامەی دەستلەکارکێشانەوەی لە گۆڕان ڕادەستی خانەی ڕاپەڕاندن کردوە."

ناوبراو ئاماژەی بەوەشکردوە دواتر "خانەی ڕاپەڕاندن بەڵینیان پێداوە پاش ھەڵبژاردن گۆران دەچێتە حکومەتەوە و شێخیش دەبێت بە وەزیری دارایی".

ئەو بەرپرسە باڵایەی گۆڕان کەرێکخەری پێشوی ژوری توێژینەوەی سیاسی بوە، ئاماژەی بەوەشکردوە "کاک ئاواتیش نامەی دەستلەکارکێشانەوەکەی کشاندوەتەوەو بو بە وەزیر لە کابینەی نۆیەمدا".

لای خۆشییەوە ئاواتی شێخ جەناب وەزیری دارایی وێڕای رەتکردنەوەی هەواڵەکە  بێ منەتی خۆی لەناوبراو دەربڕی و رایگەیاند " با نامەی دەستلەکارکێشانەوەکەم یان هەر بەڵگەیەکی دیکە کە هەیەتی بڵاوی بکاتەوە." 

ناوبراو دەشپرسێت " بەڕێز د. محمد چۆن لەوبەروارەدا زانی بزتنەوەی گۆڕان ئەو ژمارە کورسییە دەهێنێت و بەچ رێگەیەک ئاشکرایکرد کە بزوتنەوەی گۆڕان بەشداری حکومەت دەکات و پۆستی وەزیری دارایی وەردەگرێت تا من لەسەر ئەو بەڵێنە نامەی دەستلەکارکێشانەوەی خۆم بکێشمەوە."

وەزیری دارایی بەباوەڕبەخۆبونەوە  وتیشی " رەنگە لە ئەرکێکم ماندو بێزار بوبم، بەڵام هیچ کاتێک من نیازی دورکەوتنەوەم لەگۆڕان نەبوە" 

"دیارە د. محمد خۆشی بەشداربوە لەو رێکەوتنەی من و خانەی راپەڕاندن ئەگەرنا چۆن دەزانێت رێکەوتنێکی لەوجۆرە کراوە" وەزیری دارایی بەسەر سوڕمانەوە ئەو پرسیارەی کرد.

شێخ جەناب راشیگەیاند " خەڵکی کوردستان دەزانن ناوەرۆکی پۆستەکەی د. محمد و ئەو بەروارەی بڵاویکردۆتەوە کە گوایا بەلێنی پۆستی وەزارەتی دارایی بەمن دراوە نەگونجانێکی زۆری تێدایە تا ساتەوەختی پێکهێنانی حکومەت کە چەندین مانگی خایاند."

لەکۆتایشدا وەزیری دارایی وتی " دەبو د. محمد شەرمی هاوڕێیەتی بیگرێت و دەست بۆ زانیاری نادروست نەبات." 



Copyright © 2016 Xendan.org all rights reserved

designed and developed by AVESTA GROUP