كتێب وەك دەلاقەیەك بۆ بینینی گۆشەیەكی تری دونیا
بەشێک لە دیداری کتێبی "چێژی خوێندنەوە"ی شاخەوان سدیق

- 7/20/2019 12:26:00 PM 1664 جار خوێندراوەتەوە

خەندان-
كافكا دەڵێت: 
"مرۆڤ بۆیە كتێب دەخوێنێتەوە، بۆ ئەوەی فێربێت پرسیار بكات"

 
پێشەکی:

نازانم بەڕێكەوتبوو یان نا، سیازدەساڵ پێش ئێستا بە خوێندنەوەی كتێبی (گێلە پیاوی) (عەزیز نەسین) كەوتمە ناو دونیای خوێندنەوە، ئەو دونیایەی كە ڕۆژ دوای ڕۆژ گۆشەیەكی نوێی لێئاشنادەبم و زیاتر لە ژیانێك و لە بینینێك و لە گۆشەیەكی جیاوازتری  لەوەی كە پێشتر ئەزموونم كردووە هەیە، هەروەك (محمود عەباس ئەلعەقاد) دەیوت» من بۆیە دەخوێنمەوە، چونكە تەنها ژیانێك بەس نییە، ئیدی لەگەڵ هەر كتێبێكدا، مرۆڤ بە ژیان و جیهانی تردا سەفەر دەكات»  منیش هەر لەو ڕۆژەوەی بە كتێب ئاشنابووم كەوتم بەسەر كۆمەڵیك پرسیاری كەڵەكەبوودا كە تا هەنووكەش وەڵامەكانیان   سات دوای سات لە فۆڕم و ناوەڕكی نوێدا خۆیان نوێ دەكەنەوەو  هەمیشەش چەند بارە دەبنەوە، ئەویش بە شێوازو مانای نوێوە، ئاشنابوون بە كتێب یەكێك بوو لە گەورەترین گۆڕانكارییەكانی ژیانم، بە جۆرێك كتێب خودی خۆمی لێدزیم و لەناو لاپەڕەكانی خۆیدا، هەرجارە و وەك كارەكتەرێكی نوێ  وێنای دەكردمەوە، كتێب لە منداڵێكی گەڕۆكی شەڕانییەوە فڕێیدامە ناو دونیای گۆشەگیری و ماڵە تەنیاكەی خۆی، بەڵام وەك قوتابخانەیەكی گەورە و مامۆستایەكی بە ئەزموون.
بێدەنگی گۆڕیم بە پرسیار و شەڕانگێزی گۆڕیم بە گومان، دەرگای خەیاڵەكانی بەسەردا كردمەوە و وای لێكردم لە بەرامبەر هەموو شتێكدا ڕابمێنم

 

بێدەنگی گۆڕیم بە پرسیار و شەڕانگێزی گۆڕیم بە گومان، دەرگای خەیاڵەكانی بەسەردا كردمەوە و وای لێكردم لە بەرامبەر هەموو شتێكدا ڕابمێنم، هەروەك (مەریوانی وریا قانع) لە (كتێب و دونیادا) و لە وتاری (كتێب وەك بەشێك لە ژیان)دا دەڵێت» خوێندنەوەی كتێب ئینسان دەكاتە بوونەوەرێكی خەیاڵكراوە، عەقڵانی، ڕەخنەیی و پرسیاركەر، واتە دەیكاتە كەسێك فێربێت خۆی باشە لە خراپە، ڕاست لە هەڵە، جوان لە ناشیرین جیابكاتەوە، بە جۆرێك خۆی ببێت بە سەردارو چاوساغی خۆی و پێویستیەكی ئەوتۆی بە چاوساغە دەرەكییەكان نەبێت»  ئێستا من بەشێكم لە كارەكتەری ئەو مرۆڤەی كە (مەریوان) ئاماژەی بۆ دەكات، كتێب توانی بە سیحری ئەفسووناوی خۆی بمكاتە بەشێك لە دونیای خۆی و وەك گەڕیدەیەك پێش چوونەخەوی چاوەكانم هەر شەوە و بە كۆڵان و شەقامەكانی دێڕ و لاپەڕەی نووسەرێكدا بمگێڕێت، كتێب گەشتی زۆر پێكردم زۆر كەس و چیرۆكی جیاوازی بۆ خوێندمەوە، بردمیە زۆر شاری دونیا و بەشداریمكردم لە خۆشی و ناخۆشییەكانی زۆر مرۆڤدا، وەك (فیرناردۆ پیسوا) كردمی بە زیاد لە كە سایەتییەك و كارەكتەرێك، هەرجارە و بە ناوێكەوە و لە شوێنێكی تری دونیادا 

چێژی خوێندنەوە

خۆم بینیەوە، وای لێكردم كە هەمیشە زیاد لە كەسێك خۆم ببینم، كتێب وای لێكردم كە هەمیشە هەستبكەم ناخم پڕە لە زیاد لە كارەكتەرێك،(دۆنكیشۆتانە) كتێب هەموو شتەكانی لێكردمە ئەفسانە و هەمیشە جۆرێكی تر ڕووداوەكانی پیشانی دامەوە، ئیتر ئەمەش بەڕاستی جادووی ڕەشی كتێبە. (ڕەبیع جابر)  نووسەری لاوی لوبنانی لە وتارێكدا دەربارەی نووسین دەڵێت» كتێبێك بگرە بە دەستەوە و بیخوێنەوە، ئەگەر خوێندنەوە سەر شاری نەكردی لە ژیانی ڕاستەقینە، ئەوا هەرگیز چێژی ژیانی ڕاستەقینە ناكەیت»  ئێستا شەوانە كتێبێك دەگرم بە دەستمەوە بە چێژەوە دەی خوێنمەوە، بۆیە بەڕاستی چێژی ژیانی ڕاستەقینە دەكەم، وەك ( بوهومیل هیراباڵ) لە (تەنیاییەكی پڕ هەراو زەنا) دا دەڵێت» دێڕەكان دەخەمە ناو دەممەوە و وەك نوقڵ دەیان مژم، هەر بەڕاستی سوپاس بۆ كتێب كە لە ناوەڕاستی تونێلەكەدا جێی نهێشتم و ڕوناكییەكەی لەو سەرەوە پیشاندام، وای لێكردم كە چاو لە ئاوێنەدەبڕم بپرسم كێم و چیم لەم ژیانە ڕاگوزەرە دەوێت، ڕاستیان وتووە» كەسایەتی مرۆڤ، ئەو كتێبانە دیاری دەكات كە دەیانخوێنێتەوە» كردنەوەی ئەم مەلەفەش بۆ قسەكردن لەسەر گرنگی كتێب.
خوێندنەوە بۆ مرۆڤ بەشداری كردنی نووسەرانە بۆ تێگەیشتن لە سیحری كتێب

 

خوێندنەوە بۆ مرۆڤ «بەشداری كردنی نووسەرانە بۆ تێگەیشتن لە سیحری كتێب لەسەر ژیانی ئەوان وەك ڕێبواری هەمیشەی ماڵە گەورەكەی كتێب، ئەویش لە ژێر ڕۆشنای وتە بەناوبانگەكەی (شۆپنهاوەر) دا كە دەڵێت « خوێندنەوە بیركردنەوەیە لە دونیا، بەهاوكاری عەقڵی ئەوانیتر» بەهیوام بۆ  خوێنەرانی سوودێكی هەبێت.


Copyright © 2016 Xendan.org all rights reserved

designed and developed by AVESTA GROUP