بەپەلە

وەزیری دەرەوەی تورکیا: ئەگەر پێویست بکات شاندێک دەنێرینە هەولێر

- 7/17/2019 10:47:00 PM 7902 جار خوێندراوەتەوە


خەندان-
وەزیری دەرەوەی تورکیا رایگەیاند، لەبارەی هێرشەکەی هەولێرەوە لەپەیوەندیدان لەگەڵ بەغدا و هەولێر و ئەگەر پێویست بکات شاند دەنێرنە هەولێر بۆ ئاشکرا کردنی ئەوەی کێ لە پشت هێرشەکەوەیە بە تەواوی وردەکارییەکانییەوە. 

بەپێی هەواڵێکی ئاژانسی ئەنادۆڵ، دوای گەڕانەوەی لە شاری جدە، مەولود چاوشئۆغڵو وەزیری دەرەوەی تورکیا  لە فڕۆکەخانەی ئەسەنبۆغا کۆنگرەیەکی رۆژنامەوانی رێکخستوە و رایگەیاندوە لەپەیوەندیدان لەگەڵ هەولێرو بەغداد بۆ ئاشکراکردنی راستییەکان.

چاوشئۆغڵو رایگەیاند بەکاتی ناوخۆ سەعات 3:15 کارمەندێکی کۆنسولخانەی تورکیا لەهەولێر لە رێستۆرانتێک لەکاتی نانخواردندا لە ئەنجامی هێرشی ٣ کەس "شەهید" بوە، و داوای رەحمەتی بۆ دەکەین لە یەزدان.
هێرشبەرەکان هاوکات هێرشیان کردۆتە سەر مێزی تەنیشت و دو کەسی دیکەی عێراقی

وەزیری دەرەوەی تورکیا رایگەیاند کە هێرشبەرەکان هاوکات هێرشیان کردۆتە سەر مێزی تەنیشت و دو کەسی دیکەی عێراقی و ئاماژەی بەوەدا کە یەکێک لەو کەسانە گیانی لەدەست داوە، ئەوەی تریشیان بە خەستی برینداربوە.
گفتوگۆیان لەگەڵ مەسرور بارزانی و نێچیرڤان بارزانیدا کردوە

چاوشئۆغڵو ئاشکراشیکرد لەوبارەیەوە گفتوگۆیان لەگەڵ مەسرور بارزانی و نێچیرڤان بارزانیدا کردوە و وەزیری دەرەوەی عێراق محەمەد عەلی ئەلحەکیم ئێستا لە واشنتۆنە لەگەڵ ئەویش گفتوگۆیان کردوە و لە پەیوەندیدان. 

وتیشی پەیوەندییەکانیان بەردەوامی دەبێت تاکو چی لەپشتی روداوەکەوە هەیە بە وردەکارییەوە دەربکەوێت".
دەبێت تەرمەکەمان بهێنینەوە

وەزیری دەرەوە رایگەیاند ئەگەر پێویست بکات وەفد دەنێرنە عێراق و گوتی، "دەبێت تەرمەکەمان بهێنینەوە. بۆ ئاشکرا کردنی ئەمە و رونکردنەوەی روداوەکە بەهەمو رەهەندەکانیەوە چی پێویست بێت ئەنجامی دەدەین".

چاوشئۆغڵو ئاشکرای کرد لە ناوخۆ و دەرەوەدا دەربارەی ئەو هەنگاوانەی پێویستە لەپەیوەندیدا دەبین.

لەبەرامبەر وەڵامی پرسیارێکدا کە ئایا ئەگەر هەیە پەکەکە یان رێکخراوێکی دیکە هێرشەکەی ئەنجام دابێت، چاوشئۆغڵو گوتی: "کاتێک هێرشێکی لەم چەشنە رودەدات ئەوەی بە خەیاڵدا بێت هەر ئەمەیە، ئایا هێرشێکی تیرۆریستییە، بەڵام کاتێک لە مێزی تەنیشتیش دو عێراقی هێرشیان دەکرێتە سەر، یەکێکیان دەکوژرێت و ئەوی تر بە خەستی بریندار دەبێت، بۆ ئەوەی ئەمانە تەواو ئاشکرا بکرێت، دەبێت زانیاری رون بە وردەکارییەوە بدرێت ئایا هێرشێکە بۆسەر ئەوانە یان نا".
 


Copyright © 2016 Xendan.org all rights reserved

designed and developed by AVESTA GROUP