بەپەلە

ئەو كەسەی تەقەی لە د.كەمال ئەحمەد كرد لەناو نۆرینگەكەی گیانی لەدەستدا

- 7/16/2019 8:25:00 PM 83288 جار خوێندراوەتەوە
ئەرشیف: وێنەی سایتی دەستگیركردنی تەقەكەرەكە لەلایەن پۆلیسەوە

خەندان-

ئێوارەی دوێنێ ، ئەو پیاوە گیانی لەدەستدا كە كۆتایی ساڵی رابردو، لەناو نۆرینگەكەی تەقەی لە دكتۆر كەمال ئەحمەد كردو بەسەختی برینداریی كرد.

كاتژمێر 4:30ی پاشنیوەڕۆی رۆژی 3كانونی یەكەمی 2018 گەنجێكی دەرەوەی شاری سلێمانی لە شەقامی ئۆرزدی شاری سلێمانی تەقەی لە د.كەمال ئەحمەد سەعید كردو بە دو گولە برینداریی كرد.

رۆژی دواتر بەڕێوەبەری پۆلیسی سلێمانی لە کۆنگرەیەکی رۆژنامەوانیدا رایگەیاند، کاتژمێر 12:00ی نیوەڕۆ 4/12/2018 لە ناو شاری سلێمانی ئەو کەسە دەستگیرکراوە کە چوەتە سەر نۆرینگەکەی د. کەمال ئەحمەد و دەستڕێژی گولەی لێکردوە.

ئەوەشی خستەڕو، ئەو کەسە لەدایکبوی ساڵی 1988ە و دانیشتوی دەرەوەی شاری سلێمانیە و بەتەنها خۆی کارەکەی ئەنجامداوە.

بەپێی زانیارییەکانی خەندان، لەماوەی رابردودا بنەماڵەی د.كەمال ئەحمەد، لە تەقەكەرەكە خۆش بون، ئەوەش بەهۆكاری توشبونی بە نەخۆشی.

هەر بەگوێرەی زانیارییەكان، بنەماڵەی ئەو كەسە بەمەبەستی وەرگرتنی چارەسەری پزیشكی لەماوەی رابردودا ئەو كەسەیان بردوەتە ئێران و دوێنێ لەكاتی ئەنجامدانی نەشتەرگەریدا گیانی لەدەستداوە.


Copyright © 2016 Xendan.org all rights reserved

designed and developed by AVESTA GROUP