"پێویستە کابینەی نۆیەم باری نائاسایی رابگەیەنێت"
چالاکوانێکی ژینگەیی: هیچ بابەتێک نیە لەمڕۆی کوردستاندا، هێندەی ژینگە پێویست و پشتگوێخراو بێت

- 7/15/2019 4:51:00 PM 3144 جار خوێندراوەتەوە

خەندان-

چالاکوانێکی بواری ژینگەی، هۆشداری توند دەدات لە باری ناهەمواری ژینگەیی هەرێمی کوردستان و دەڵێت" پێویستە کابینەی نۆیەم باری نائاسایی ژینگەیی رابگەیەنێت".

هیچ بابەتێک نیە لەمرۆی کوردستاندا هێندەی بابەتی ژینگە پێویست و پشتگوێ خراوبێت

 

ئەو وتانەی ئەحمەد جیهانپور، چالاکوانی  ژینگەیی لە میانی بەشداریکردنیدا بو لە بەرنامەیەکی  کەناڵی K24 و وتی" بە تەحەداوە، بەوپەرێ دەنگێکەوە دەیڵێم کە هاوار بێت  کە بە گوێی تاک بە تاکی کورد بگات، لە کەسێکی ئاساییەوە تا سەرۆکی حکومەت و هەرکەسێکیش خۆی بە بەرپرسیار بزانێت هیچ بابەتێک نیە لەمرۆی کوردستاندا هێندەی بابەتی ژینگە پێویست و پشتگوێ خراوبێت".

رێک ئەو دو وشەیە، پێویست لەوپەڕی پێویستیدا، پشتگوێخراو لەوپەڕی پشتگوێخراویدا

 

"رێک ئەو دو وشەیە، پێویست لەوپەڕی پێویستیدا، پشتگوێخراو لەوپەڕی پشتگوێخراویدا، بەوشێوەی کە ئێستا هەیە، لەلای خەڵک و حکومەتیش بەگشتی، ئێمە بەهەرجۆرێک لە جۆرەکان ئێستا لە ناو مێژویەکداین، ئەم خولەکە تۆمار دەکرێت، دوای چوار ساڵی دیکە، دوای ٤٠ ساڵی دیکە، دوای چاورسەد ساڵی دیکە ئەم خولەکە دەبینرێتەوە، ئێمە وەک ئەرکێکی مێژویی ئەم شتە دەڵێین و دەمانەوێت وەک ئەرکێکی مێژویی ئەم کێشەیە چارەسەر بکرێت" ئەحمەد جیهانپور وای وت.

کە هاتینەوە ناو شاری سلێمانی بۆما دەرکەوت ئێمەش وەک ئەو خەڵکەی ئەوێ شتەکەمان لا ئاسایی بوەتەوە

 

ئەو چالاکوانەی بواری ژینگەیی باسی لە روداوی ئاگرکەوتنەوەی ناوچەی تانجەرۆی سلێمانی کرد کە لە هەفتەکانیدا رابردودا ڕویدا و وتی" ئێمە خۆمان سەردانی ئەوێمان کرد و لامان سەیر بو کە ئەو خەڵکەی لەوێدان چۆن لایان ئاسایی بوەتەوە و لەناو ئەو تۆز و چرە دوکەڵەدا ژیان بەسەر دەبەن، دواتر کە هاتینەوە ناو شاری سلێمانی بۆما دەرکەوت ئێمەش وەک ئەو خەڵکەی ئەوێ شتەکەمان لا ئاسایی بوەتەوە، دیمەنەکەیان لا ئاسای بوەتوە".

ئێستا یەک بە یەکی کۆڵانەکانی کوردستان وەک خاشاکخانە و زبڵخانە وایە

 

ئەحمەد جیهانپور هۆشداریش دەدات بە هاوڵاتیان و حکومەت و لایەنی بەرپرسیار و دەڵێت" ئێمە بە یەک بەیەکمان ئەم بارودۆخەمان لا ئاسایی بوەتەوە، با لەم خەوە هەڵسین و ئەم ئاسایی بونەوەیە تێپەڕێنین، ئێستا یەک بە یەکی کۆڵانەکانی کوردستان وەک خاشاکخانە و زبڵخانە وایە".

کابینەی نۆیەم باری نائاسایی رانەگەیەنێت، لە داهاتودا بە شێرپەنجە و نەخۆشی دیکەی کوشندە بۆمان دەگەڕێتەوە

 

سەبارەت بە چارەسەری ئەو دۆخە ئاماژەی بەوەشدا، دەبێت هاوڵاتیان و فەرمانبەران و کەسانی کاربەدەستی ناو حکومەت هەر یەک لای خۆیەوە و لە ماڵی خۆیەوە لە بەرخاتری خۆی و منداڵەکانی و ئەو مێژویەی  تیایدا دەژی دەست بە هەڵمەتی ژینگە دۆستی بکات" ئەگەرنا مێژو زۆر بە تەڵخی تەماشایان دەکات، ئەگەر هەر لە ئێستاوە کابینەی نۆیەم باری نائاسایی رانەگەیەنێت ئەوا ئەو بارودخە خراپەی ژینگە لە داهاتودا بە شێرپەنجە و نەخۆشی دیکەی کوشندە بۆمان دەگەڕێتەوە.


نیشانەکردن :

#ژینگەدۆستیی

Copyright © 2016 Xendan.org all rights reserved

designed and developed by AVESTA GROUP