بە ڤیدیۆ.. تەقاندنەوەی دو تاوەری پردێك لە ئیتاڵیا

- 6/30/2019 4:28:00 PM 17530 جار خوێندراوەتەوە

خەندان-

لە یەكێك لە شارەكانی ئیتاڵیا، دەسەڵاتداران هەستان بە تەقاندنەوەی دو تاوەری سەر پردی مۆراندی، كە چەند مانگێك لەمەوبەر بەشێك لە پردە هەرەسی هێنا و بوە هۆی گیانلەدەستدانی دەیان كەس.

48 كەس گیانیانلەدەستدا


لە گرتە ڤیدیۆییەكدا، تەقاندنەوەی ئەو دو تاوەرە دەردەكەوێت كە هەینی رابردو 28ی حوزەیران، لە لایەن بەرپرسانی شاری جەنەوا-ی ئیتاڵیاوە بڕیاری تەقاندنەوەی درا، دوای ئەوەی مانگی شوبات-ی ئەمساڵ بەشێك لەو پردەی هەردو تاوەرەكەی لەسەرە هەرەسی هێنا و بەهۆیەوە 43 كەس گیانیانلەدەستدا.

رەخنەی خەڵك بوە هۆی بڕیاردان بە تەقاندنەوەی تاوەرەكان


هەرەسهێنانی ئەو پردە و گیانلەدەستدانی دەیان كەس دەنگۆیەكی زۆری بەدوای خۆیدا هێنا و خەڵكی ئەو وڵاتە بە توندی رەخنەیان لە بەرپرسانیان گرت، ئەوەش بوە هۆی ئەوەی بڕیاربدەن پردەكە و تاوەرەكانی بە تەواوەتی خاپوربكەن.

500 كگم ماددەی تەقەمەنی لە پرۆسەكەدا بەكارهێنراوە


بەپێی زانیاریە بڵاوكراوەكان، ئەو ئەندازیارانەی بەو كارە هەستاون، بە مەبەستی تەقاندنەوەی هەردو تاوەرەكە نزیكەی 500 كیلۆگرام ماددەی تەقەمەنیان بەكارهێناوە، هاوكات بە مەبەستی بڵاونەبونەوەی تۆز و خۆڵ بەسەر شارەكەدا، ئاو كراوە بەسەر 40 هەزار تەن لە پاشماوەی تاوەرە  روخاوەكاندا.

سێ هەزار و 400 دانیشتو ماڵەكانیان چۆڵكردوە


هاوكات بە مەبەستی پاراستنی ژیان و تەندروستیان، سێ هەزار و 400 دانیشتوی ناوچەكە لە ماڵەكانیان دورخراونەتەوە، دواتر كاتژمێر 10ی شەوی هەینی رێگەیان پێدراوە بگەڕێنەوە بۆ ماڵەكانیان.

لە بەرزایی 50 مەتر-ەوە هەرەسی هێنا


مانگی شوبات، بەشێك لە پردی مۆراندی كە دەكەوێتە شاری جەنەوا لە ئیتاڵیا، لە بەرزایی 50 مەترەوە هەرەسیهێنا بەسەر ژمارەیەك ئۆتۆمبێلدا و بەهۆیەوە دەیان كەس گیانیانلەدەستدا.

پردێكی نوێ لە هەمان شوێن بنیاددەنرێتەوە

 

دواتر ئاماژە بەوەكرا، هۆكاری هەرەسهێنانی پردەكە قەرەباڵغی و ترافیكی زۆر بوە لەسەر ئەو پردە، چونكە رێگەی سەرەكی بوە بۆ هەمو ئەوانەی ویستویانە سەردانی كەناردەریا بكەن یاخود بەرەو باشوری وڵاتەكە و وڵاتی فرەنسا بڕۆن، بەرپرسانی ئیتاڵیاش دەڵێن، پردەكە و تاوەركانی بە تەواوەتی روخێندران، تا سەرلەنوێ و بە شێوەیەكی باشتر ئەو پردە لە هەمان جێگەی خۆی بنیاتبنێنەوە.

 


نیشانەکردن :

#ئیتاڵیا

Copyright © 2016 Xendan.org all rights reserved

designed and developed by AVESTA GROUP