"بەهۆی دیجەی هونەرمەندان بێكارن"
گۆران ئینزیبات: دەمانەوێت وەزارەتی ڕۆشنبیری بکەینە وەزارەتێکی سیادی

- 6/27/2019 7:54:00 PM 10125 جار خوێندراوەتەوە

خەندان-

ئەندام پەرلەمانێكی کوردستان ڕایدەگەیەنێت لەم خولەی پەرلەماندا پڕۆژەیاسای تایبەت بەبواری ڕیکلام و میدیا ئامادەدەکەین، دەشڵێت هەوڵەکانمان بەردەوامدەبێت تاکو وەزارەتی ڕۆشنبیری بکەینە وەزارەتێکی سیادی لە کابینەی نوێ.

گۆران ئینزیبات، پەرلەمانتاری هەرێمی کوردستان لە فراکسیۆنی گۆڕان بۆ خەندان ڕایگەیاند: لەم خولەی پەرلەمانی کوردستان کار لەسەر نوسینەوەی ڕەشنوسی هەردو پڕۆژەیاسای ڕیکلام و میدیا دەکەین، بۆ نوسینەوەی هەردو پڕۆژەیاساکە سود لە کەسانی شارەزا و بەئەزمون وەردەگرین و دەمانەوێت گۆڕانکاری لەو دو سێکتەرە لەهەرێمی کوردستاندا بکەین.
هەوڵدەدەین مۆڵەت وەرگرتن بکەینە مەرج لەسەر هاتنی هونەرمەندانی بیانی بۆناو هەرێم

 

سەبارەت بە وەرگرتنی مۆڵەت بۆ هونەرمەندانی بیانی بۆ ئاهەنگێڕان لە هەرێمی کوردستان، گۆرانی ئینزیبات بە خەندان ی وت: وەکو لیژنەی ڕۆشنبیری و هونەریی پەرلەمان بەهاوکاری کەسانی شارەزا و بە ئەزمون هەوڵدەدەین مۆڵەت وەرگرتن بکەینە مەرج لەسەر هاتنی هونەرمەندانی بیانی بۆناو هەرێم بەمەبەستی ئاهەنگێڕان، دەشڵێت، "یاسای سۆشیال میدیا دەکەینە ناو پڕۆژەیاسای میدیا و لەپەرلەمان خوێندنەوەی بۆ دەکەین"

لە ئێستادا لەناو هۆڵەکانی ئاهەنگێڕان ئامێری -دی جەی- شوێنی هونەرمەندەکانی گرتوەتەوە و لەو بارەیەشەوە هونەرمەندان ناتوانن لایڤ میوزیک بکەن و بێکار بون

 

ئەندامی لیژنەی ڕۆشنبیریی پەرلەمانی کوردستان ڕونیدەکاتەوە: لە ئێستادا لەناو هۆڵەکانی ئاهەنگێڕان ئامێری -دی جەی- شوێنی هونەرمەندەکانی گرتوەتەوە و لەو بارەیەشەوە هونەرمەندان ناتوانن لایڤ میوزیک بکەن و بێکار بون، ئەوەشی وت،"داواکاری هونەرمەندان ئەوەیە کە ئامێری دی جەی نەمێنێت و مۆڵەت وەرگرتن بگەڕێندرێتەوە بۆ تیپە هونەرییەکان ئەوەش بۆ زیاتر ڕێکخستنەوەی بوارەکە و سودی ئابوریشی دەبێت بۆ هونەرمەندان"

گۆران ئینزیبات ئەوەش ڕوندەکاتەوە: وەکو لیژنەی ڕۆشنبیریی پەرلەمان دەمانەوێت لەڕێگەی چەند پێشنیاز و پڕۆژەیاسایەکەوە وەزارەتی ڕۆشنبیری بکەین بە وەزارەتێکی سیادی بۆ پێشخستنی کار و چالاکییەکانی ئەو وەزارەتە و هونەرمەندانیش بتوانن لەژێر چەتری وەزارەتەکەدا کۆببنەوە و کاریان دەستبکەوێت، وتیشی، " بۆ چوارساڵی داهاتو وەکو بزوتنەوەی گۆڕان هەوڵدەدەین وەزارەتی ڕۆشنبیری وەربگرین و بیکەنە وەزارەتێکی خزمەتگوزار لەبواری کلتور و هونەریی بۆسەرجەم هونەرمەندان".


نیشانەکردن :

#پەرلەمانی کوردستان

Copyright © 2016 Xendan.org all rights reserved

designed and developed by AVESTA GROUP