بەپەلە

هێزێكی چەكداری نوێ لە هەرێمی كوردستان دامەزراندنی خۆی راگەیاند

- 6/27/2019 5:41:00 PM 192052 جار خوێندراوەتەوە

خەندان-

ئەمڕۆ لە باشوری كوردستان، هێزێکی چەکدار دروستبونی خۆیان بەناوی پاراستنی جەوهەریی باشوری کوردستان راگەیاند و دەڵێن هۆکاری دامەزراندنیان بۆشایی ئەمنییە لەکوردستاندا.
لە ئەمڕۆ بەدواوە درێژە بە چالاکیی هاوشێوەی چالاکییەکەی زاخۆ دەدەین و لە هەر جێگایەکی  باشوری کوردستان تەواوی پێگەکانی سوپای داگیرکەران دەبنە ئامانجی سەرەکی هێزەکانمان

 

لە راگەیەندراوێكدا كە وێنەیەكی گەیشتۆتە خەندان، هێزێکی چەکدار بەناوی پاراستنی جەوهەریی باشوری کوردستان بەفەرمی خۆیان دەناسێنن و دەڵێن ،"لە ئەمڕۆ بەدواوە درێژە بە چالاکیی هاوشێوەی چالاکییەکەی زاخۆ دەدەین و لە هەر جێگایەکی  باشوری کوردستان تەواوی پێگەکانی سوپای داگیرکەران دەبنە ئامانجی سەرەکی هێزەکانمان"

هێزەکانی پاراستنی جەوهەریی باشوری کوردستان، لە 7/6/2019 دژ بە بارەگایەکی سوپای دەوڵەتی تورک لە زاخۆ چالاکییەکیان ئەنجامدا و بوەهۆی کوژرانی 20 سەربازی سوپای تورکیا، ئەمڕۆ لە لێدوانێکی ڤیدیۆییدا دامەزراندنی خۆیان بە فەرمیی ڕاگەیاند و بەیاننامەیەکیان بۆ رایگشتی بڵاوكردەوە.

دەقی بەیاننامەکە :
 بۆ ڕای گشتی
وەک دیارە  لە ئێستادا لە ڕۆژهەڵاتی ناوەڕاست بە گشتی و لە ناویدا بە تایبەت کوردستان ڕۆژانە بە چەندین گۆڕانکاریی نوێدا تێپەڕ دەبێت و تا دێت شەڕ و ململانێ سیاسییەکانی هێزە جیهانی و هەرێمییەکان بە هێزتر و قوڵتر دەبێتەوە.
لە ڕۆژی ئەمڕۆشدا وەک هەموولایەک ئاگادارن، لە تەواوی  ناوچە دابڕێندراوەکانی هەرێمی کوردستان هەڵمەتێکی تەعریب کردن و تاڵانکردن و کوشتن و ڕفاندنی هاوڵاتییان مەدەنی دەستی پێکردووە. لە هەمان کاتدا دەوڵەتی عوسمانیی نوێ، داگیرکارییەکی نوێ لەسەر گشت کوردستان و بە تایبەتی هەرێمەکانی برادۆست و کەرکوک و بادینان بەڕێوە دەبات، بەداخەوە چەند هێزیکی باشووری کوردستان بۆ ئەم داگیرکارییە نوێیە هاوکارن و بێ هەڵوێستن،  بۆ تاڵانکردنی بەها و کلتور و فەرهەنگ و لەسەرووی هەموویانەوە ئابووریی و جوگرافیای باشووری کوردستان .
لەم چورچێوەیەدا ئێمە وەک (هێزەکانی پاراستنی جەوهەریی باشوری کوردستان) لە ئەنجامی ئەو بۆشاییە سیاسی و سەربازییەدا دروست بووین، کە لە هەرێمەکەدا هەیە و ئامانجمان پاراستنی بەها و کولتور و دەستکەوتەکانی باشوری کوردستان بە تەواوی پێکهاتە و ئایین و باوەڕە جیاوازەکانەوەیە.
گەلی ئێمە ئەم ڕاستییە باش دەزانێت، کە ئەم دەستکەوتانەی ئەمڕۆ بە دەست هاتوون لە ئەنجامی شەهیدبوون و گیان بە ختکردنی هەزاران ڕۆڵەی ئەم خاکەیە، بۆیە پاراستنی ئەم دەسکەوتانە ئەرکە لە سەر تاک بە تاکی گەنجان  و ژنان و تەواوی چین توێژە جیاوازەکانی کوردستان بەتەواوی پێکهاتەکانەوە.
بەو مەبەستەش داوا دەکەین لە حکومەتی عێراق و هەرێمی کوردستان کە لە بەرامبەر ئەم داگیرکارییە نوێیەدا بێدەنگ نەمێنن و هەوڵبدەن پاراستنی سەرەوەریی خاکی عێراق و هەرێمی کوردستان بدەن، پێوستە باش بزانن ئێمە لە بێ هەڵوێستی ئەوان دروست بووین.
لێرەشەوە داوا لە هێزەکانی پێشمەرگە دەکەین لەسەر ڕێبازی شەهید مامە ریشە، شەهید ئارام و لەیلا قاسم و تەواوی شەهیدانی گەلەکەمان بێن شان بە شانی یەکتر کوردستان لە دەستی داگیرکەران بپارێزین، داواش لە دەسەڵاتدارانی پارتی دیموکراتی کوردستان دەکەین چیتر ڕێگە بۆ داگیرکاریی خۆش نەکەن و دووبارە توانایان بخەنە خزمەتی گەل.
لە کۆتاییدا بە ناوی هەموو هێزەکانمان لە تەواوی باشوری کوردستان داوا لە گەنجان و ژنان سەرجەم چین توێژەکان دەکەین لە هەرێمە جیاوازەکان لە ئاستی خۆیان هەڵویستی ڕوون لە بەرامبەر داگیرکەران نیشان بدەن. لە هەمان کاتدا بێن بە شداری هێزەکانی پاراستنی جەوهەریی باشوری کوردستان بکەن و وەک ئەو چالاکییەی چەند ڕۆژی ڕابردوو لەلایەن هێزەکانمان لە زاخۆ ئەنجامدرا، کە تیایدا توانرا بێ زەرەر و زیان هێزەکانمان گورزی کوشندە لە سوپای داگیر کەری تورکیا بدەین، ئەم چالاکییە پێشکەش بە ڕۆحی شەهیدانی گەلەکەمان دەکەین و لەبەردەم  ڕۆحی پاکیان پەیمان و بەڵێنی بەردەوامی و درێژە پێدانی ئامانجەکانی ئەوان دووپات دەکەینەوە.
ڕایدەگەیەنین لە ئەمڕۆ بەدواوە درێژە  بەم شێوازە چالاکییانە دەدەین لە هەر جێگایەکی  باشووری کوردستان تەواو پێگەکانی سوپای داگیرکەران دەبنە ئامانجی سەرەکی هێزەکانمان.
هێزەکانی پاراستنی جەوهەری



Copyright © 2016 Xendan.org all rights reserved

designed and developed by AVESTA GROUP