لە بەرزی دو نهۆمەوە بەردەبێتەوە
بە وێنە و ڤیدیۆ.. مێرمنداڵێك ژیانی منداڵێكی دو ساڵ رزگاردەكات

- 6/27/2019 4:31:00 PM 23817 جار خوێندراوەتەوە

خەندان-

كامێراكانی چاودێری لە شەقامێكی شاری ئیستانبوڵ، چركەساتێكی مەترسیداریان تۆماركردوە، تێیدا مێرمنداڵێك ژیانی منداڵێكی دوو ساڵ رزگاردەكات، كە لە پەنجەرەی ماڵی خۆیانەوە بەردەبێتەوە.

وەك لە گرتە ڤیدیۆییەكەدا دەردەكەوێت، فەوزی زابەعت كە بە رەگەز جەزائیریە و تەمەنی 17 ساڵە و وەكو پەنابەر لە توركیا نیشتەجێیە، ژیانی منداڵێكی دوو ساڵان رزگاردەكات، كە لە پەنجەرەی نهۆمی دووەمی باڵەخانەیەكەوە بەردەبێتەوە خوارەوە.

ئاژانسەكانی هەواڵ ئاماژەیان بەوەكردوە، زابەعت سەرەتا هەستی كردوە منداڵێك لە پەنجەرەی نهۆمی دوەمی باڵەخانەیەكەوە خەرێكە بەردەبێتەوە خوارەوە، لەكاتی بەربونەوەی منداڵەكەشدا دەستبەجێ ئەو گەنجە جەزائیریە منداڵەكەی گرتوەتەوە.

راشیانگەیاندوە منداڵەكە ناوی زوحا محەمەد-ە و خەڵكی سوریایە كە لەگەڵ خێزانەكەی وەكو پەنابەر لە توركیا نیشتەجێبون.

فەوزی لە یەكێك لە دارتاشخانەكانی ناوچەی فاتیح كاردەكات كە هەمان ناوچەیە روداوەكە تێیدا رویداوە، دوابەدوای رزگاركردنی ژیانی منداڵەكەش ئاماژە بەوەكراوە، ئەو كچە منداڵە روبەروی هیچ زیانێك نەبوەتەوە.



دوای روداوەكە ئەو مێرمنداڵە جەزائیریە لە وتەیەكیدا رایگەیاندوە "كارێكی ئەنجامداوە كە پێویست بو ئەنجامبدرێت لەپێناو رزگاركردنی ژیانی ئەو منداڵەدا".

خانەوادەی ئەو منداڵەش ستایشی ئەو مێرمنداڵە جەزائیریەیان كردوە و بە پاڵەوان ناویانبردوە، هاوكات وەك سوپاسگوزاریەك بڕی 200 لیرەی توركیان پێبەخشیوە. 

 



Copyright © 2016 Xendan.org all rights reserved

designed and developed by AVESTA GROUP