پەرلەمانی عێراق متمانەی بەخشییە وەزیرانی ناوخۆ و داد و بەرگری

- 6/24/2019 1:23:00 PM 19266 جار خوێندراوەتەوە

خەندان-


پەرلەمانی عێراق لە کۆبونەوەی ئەمڕۆیدا متمانەی بەخشییە هەریەکە لە وەزیرانی ناوخۆ و داد و بەرگری و هاوکات کاندیدی وەزارەتی پەروەردەی رەتکردەوە.

پەرلەمانی عێراق ئەمڕۆ بۆ دەنگدان بە تەواوکردنی پێکهاتەی کابینەکەی عادل عەبدولمەهدی کۆبوەوە و 233 پەرلەمانتار ئامادەیی کۆبونەوەکە بو، تیایدا متمانەی بەخشرایە هەریەکە لە وەزیرانی ناوخۆ و داد و بەرگری و هاوکات کاندیدی وەزارەتی پەروەردەی رەتکردەوە.

لە كۆبونەوەكەدا پەرلەمانی عێراق دەنگیدا بە نەجاح شه‌مه‌ری، بۆ پۆستی وەزیری بەرگری، فاروق شوانی، بۆ پۆستی وه‌زاره‌تی داد، یاسین یاسری، بۆ پۆستی وەزیری ناوخۆ.

بەڵام سەفانە حەمدانی، کە کاندید بو بۆ پۆستی وەزیری پەروەردە نەیتوانی متمانەی پەرلەمانتاران بەدەستبهێنێت و رەتکرایەوە.

لەوبارەیەوە شیروان میرزا، ئەندامی پەرلەمانی عێراق بە خەندانی راگەیاند، "لە كۆبونەوەكەی ئەمرۆی پەرلەماندا دەنگ لەسەر هەریەك لە وەزیرانی داد و بەرگری و ناوخۆ دراوە، دوابەدوای  پێدانی متمانەكەش، هەرسێ وەزیرەكە سوێندی یاساییان خواردوە".

ئەو ئەندامەی پەرلەمانی عێراق ئاماژەی بەوەشكرد "كاندیدی وەزارەتی پەروەردە لە لایەن پەرلەمانتارانەوە رەتكراوەتەوە و دەنگیان پێنەداوە، بەو هۆیەوە لە ئێستادا لە كابینەكەی عادل عەبدولمەهدی-دا تەنها وەزیری پەروەردە ماوە دەستنیشان بكرێت و ئەو كارەش بۆ رۆژی پێنجشەممەی داهاتودواخراوە ".


Copyright © 2016 Xendan.org all rights reserved

designed and developed by AVESTA GROUP