ئاسایشی ڕاپەڕین وەڵامی کوالێتی کۆنتڕۆڵی هەرێم دەداتەوە

- 6/20/2019 8:26:00 PM 4376 جار خوێندراوەتەوە

خەندان-

لەوەڵامی دەزگای کوالیتی کۆنتڕۆڵی هەرێم ئاسایشی ڕاپەڕین ڕایدەگەیەنێت، هەمیشە ستەم لە سنورەكەمان دەكرێ‌ و ناوی دەزڕێندرێت، دەشڵێت بۆ کۆنتڕۆڵکردنی سنورەکەمان ‌ئاستەنگی زۆر دێتەڕێ.

بەڕێوەبەرایەتی ئاسایشی ڕاپەڕین لە ڕاگەیەندراوێکدا کە وێنەیەکی دەست خەندان کەوتوە، وەڵامی کوالیتی کۆنتڕۆڵی هەرێمی کوردستان دەداتەوە لەبەرامبەر ناوهێنانی قەزای ڕانیە بەوەی کە بوەتە شوێنی ساغكردنەوەی دەرمانی قاچاغ و كوالێتی خراپ، لەو بارەیەوە دەڵێت،"زۆرێك لە شارەكانی هەرێم دیاردەی قاچاخچێتی و مامەڵەی نادروستی تێدایە تادەگاتە بابەتی ماددەی هۆشبەر، ڕانیەش یەكێكە لە شارەكانی هەرێم و دابڕاو نیە لەو بارودۆخە نالەبارەی كوردستان".

ئاسایشی ڕاپەڕین دەشڵێت،"هەمیشە ستەم لە سنورەكەمان دەكرێ‌ و ناوی دەزڕێندرێت لە هەندێک میدیا و هەڵكەوتەی سنورەكەشمان كە دراوسێی وڵاتێكی وەكو ئێرانە بۆ كۆنتڕۆڵكردن ئاستەنگی زیاتری دێتە ڕێ".

ئاماژە بەوەشدەکات،"(د/پ.ی.ح) كە ئەندامی سەرەكی كوالێتی كۆنتڕۆڵی هەرێمە و ناوی قەزای ڕانیەی هێناوە لە ڕابردو  و ئێستادا، بۆ ئاگاداری هەمو لایەك ناوبراو لە بەرواری (9/5/2019 ) فەرمانی دەستگیركردنی لەلایەن دادگای لێكۆڵینەوەی ڕانیەوە بەپێی ماددەی (368 )بۆ دەرچوە و خۆی خاوەنی كۆگایە لە سنورەكەمان، لە ئێستاشدا بڕی دو تەن دەرمانی لێگیراوە و هەركات بەڕێزیان چونە بەردەم دادگا ئەوسا لێدوان و قسەی بێ‌ بنەما لەسەر شاری ڕانیە و ئاسایشی سنورەكە بكات".

‌لەڕاگەیەندراوەکەدا ئاسایشی ڕاپەڕین رونیدەکاتەوە،"ئەو كەسانەی كە كاری دزێو دەكەن و باریان لار دەبێت لای دەزگا حكومیەكان بەهەمان ڕیتم هەوڵی سازكردنی زەمینەی لەم چەشنەن تاوەكو كارە خراپەكانیان بەشێوەی زارەكی بۆ لایەنە كۆمەڵایەتیەكەیان بەكاربهێنن و چیرۆكی دەستگیركردنیان موتوربە بكەن.


Copyright © 2016 Xendan.org all rights reserved

designed and developed by AVESTA GROUP