سێ پەرلەمانتاری عێراق وەڵامی بزوتنەوەی گۆڕان دەدەنەوە

- 6/19/2019 11:40:00 PM 15997 جار خوێندراوەتەوە

خەندان-

سێ پەرلەمانتاری بزوتنەوەی گۆڕان، لەئەنجومەنی نوێنەرانی عێراق لە بارەی ڕونکردنەوەکەی گۆڕان وەڵامێکی هاوبەش بڵاودەکەنەوە و دەڵێن "چاوەڕێبوین گۆڕان پشتیوانی هەوڵەکانمان بێت نەک بە کۆمەڵێک قسەی لاستیکی داکۆکی لە سیاسەتی نەوتی هەرێم بکات".

ڕونکردنەوەی سێ پەرلەمانتارەکە لە کاتێکدایە کە ئەمڕۆ بزوتنەوەی گۆڕان لە ڕونکردنەوەیەکدا ڕایگەیاند، هەر رەخنەیەک لەلایەن هەڵسوڕاوانی حزبی و حکومەت و پەرلەمانەوە بگیرێ بە ناڕەوا،  گوزارشت لە سیاسەت و بەرنامەی بزوتنەوەی گۆڕان ناکات.

"هەر رەخنەیەک لەلایەن هەڵسوڕاوانی حزبی و حکومەت و پەرلەمانەوە بگیرێ بە ناڕەوا بۆ مەرام و بەرژەوەندی کەسێتی، بۆ خۆنواندن و خۆدەرخستن، بە زمانێکی ناشایستەو ناشارستانی ئاراستەی کەس و لایەن و دەسەڵاتدارانی عێراق و هەرێم بکرێ، گوزارشت لە سیاسەت و بەرنامەی بزوتنەوەی گۆڕان ناکات"ئەوەش بەپێی رونکردنەوەکە.

دەشڵێن" ڕونکردنەوەکەی گۆڕان وەک ناوەرۆک و وەک نەفەس، رێک پێچەوانەی دید و دنیابینی بزووتنەوەی گۆڕان بوو، ئەو دۆسێیانەیش کە قسەی لەسەر کردبوون، تەواو پەیوەستن بە ئێمەی پەرلەمانتارانی بەغدا کە بەردەوام و بەتایبەتیش لەم ماوانەی دواییدا کار و قسەی جدیمان لەسەر کردوون"

سێ پەرلەمانتارەکە ڕایدەگەیەنن، " ئێمە داکۆکی لە مافی دەستوری هەرێم دەکەین لە بواری نەوت و وزە و چۆنێتی دابەشکردنی داهات لە نێوان حکومەتی هەرێم و حکومەتی ئیتیحادی بە شیوەیەک لەبەرژەوەندی خەڵکی کوردستاندا بێت بەڵام ئەوە مانای ئەوە نیە بێدەنگ بین لەوەی لە ناوخۆی هەرێمدا خراپ مامەلەی پێوەبکرێت"، دەشڵێن؛ ئێمە جگە لەوەی کە داوامانکردوە کێشەی نەوت بە دەستور و یاسا چارەسەر بکرێ و دوربگیرێ لە رێکەوتنی سیاسیی ژێر بە ژێر شتێکی ترمان نەگوتوە ئیدی ئەم هەمو هاوئاوازیە لەگەڵ مافیاکانی نەوت بۆ ؟!

ڕونیشیدەکەنەوە؛ ئەوانەی دژی ئەجێندای مافیاکانی نەوت دەوەستنەوە خەریکی خۆنواندن و موزایەدە نین بەڵکو ملیان لە چەقۆ دەسون و موجازەفە بە ژیانی خۆیان و ماڵ و منداڵیانەوە دەکەن ئەوەش تەنها لە پێناوی گوتنی راستیەکاندا، چونکە لە ئێستادا و لەم سەردەمە تاریکەی هەرێمدا هیچ شتێک لەوە ئاسانتر نیە بێدەنگ بیت و دەست بەکڵاوەکەتەوە بگری با نەیبات، بەڵام بزوتنەوەی گۆڕان لەدایکبو بۆ ئەوەی کۆتایی بە بێدەنگی بهێنێت و دەبێ هەرواش بمێنیتەوە.

هەریەک لە (کاوە محەمەد، د.غالب محەمەد و هۆشیار عەبدوڵا) لە ڕونکردنەوەکەدا دەڵێن"لێرەوە سەرلەبەری ئەو نەفەسە رەتدەکەینەوە، کە رونکردنەوەکەی ئەمڕۆ(چوارشەممە)ی بزوتنەوەی گۆڕانی پێنوسراوە ، ئەم جۆرە لە پاکانەکردن بۆ سیاسەتی پڕ تاڵانی نەوتی هەرێم بزوتنەوەی گۆڕان بێبەریە لێی جا هەر کەسێک لە هەر ئاستێکی بزوتنەوەکەدا نوسیبێتی، دەشڵێن، " چاوەرێبوین و (بریاریش وابو)! کە گۆڕان بە رونکردنەوەیەک پشتیوانی هەوڵەکانمان بێت نەک بە کۆمەلێک قسەی لاستیکی داکۆکی لە سیاسەتی نەوتی هەرێم بکات و هیچ ئاماژیەک بەو هەمو تاڵانی و تاوانە نەدات کە بە نەوت و داهاتەکەیەوە دژی خەڵکی کوردستان کراوە و دەکرێت".

ئەوەش خراوەتەڕو، هەرکەسێک بگەرێتەوە بۆ ئەرشیفی بزوتنەوەی گۆڕان، بەرنامە سیاسیەکەی، ئامانجەکانی و میدیاکەی دەزانێت کە ئەوەی ئێمە دەیکەین و دەیڵێن سیاسەتی راستەقینەی گۆڕانە، هەربۆیە بە بێ هیچ دودڵیەک لەو هەوڵانەمان بەردەوام دەبین.


Copyright © 2016 Xendan.org all rights reserved

designed and developed by AVESTA GROUP