هەواڵی ئەمڕۆ

بەپەلە

هێرشی سەر کەشتیە نەوتییە زەبەلاحەکان نرخی نەوتی بەرزکردەوە

- 6/13/2019 11:51:00 AM 6869 جار خوێندراوەتەوە

خەندان-

بەهۆی هێرشی سەر کەشتیە نەوتییە زەبەلاحەکان لە کەنداوی عومان نرخی نەوتی خاو بەرزبوەوە.

 

بەپێی زانیارییەکانی فاینانشڵ تایمز، پاش ئەوەی سەرلەبەیانی ئەمڕۆ هێرشکرایە سەر دو کەشتی نەوتهەڵگر لەکەنداوی عومان، نرخی نەوتی خاو لەبازاڕەکانی جیهاندا بەڕێژەی لەسەدا 4 بەرزبوەوە.

میدیاکانی بریتانیا بڵاویانکردەوە، سەرلەبەیانی ئەمڕۆ پاش هێرشەکە لە بۆرسەی لەندەن، نرخی نەوتی خاوی برێنت لەسەدا 4.5 ی زیادکرد و بەوەش نرخی هەر بەرمیلێک  لە 61.40 دا جێگیربو.

 

سەرلەبەیانی ئەمڕۆ دو کەشتی بارهەڵگری زەبەلاح لە کەنداوی عومان روبەڕوی هێرش بونەوە. 

لای خۆشییەوە رۆیتەرز بڵاویکردەوە کە دو کەشتی نەوت هەڵگر بەهۆی روداوێکەوە بەتاڵکراون، بەڵام ستافی کەشتییەکان سەلامەتن.

رۆیتەرز ئەوەشی زانیوە دو کەشتییەکە یەکێکیان ئاڵای پاناما و ئەوی دیکەشیان ئاڵای ئاسلاندی هەڵگرتوە، تا ئێستاش زانیاری تەواو لەبارەی زیانەکانی ئەو دو کەشتیە و چۆنیەتی روداوەکە لەمیدیاکان بڵاونەکراوەتەوە.

دەستەی دەریایی بریتانی لە کەنداو پێشتر هۆشداری دابو لە روداوێکی مەترسیدار کە روبەڕوی کەشتیە بار هەڵگرە زەبەلاحەکان دەبێتەوە لەو ناوچەیە.

هاوکات، بەپێی نیویۆرک تایمز، رێکخراوی ئۆپەراسیۆنە دەریاییە بریتانیەکانی بریتانیاش  پێشوەختە هۆشداری دابو لە ئەگەری روداوێک بۆ سەر کەشتیە بار هەڵگرە زەبەلاحەکان لە کەنداوی عومان.

میدیاکانی ئێرانیش بڵاویانکردوەتەوە، تەقینەوەیەک لە کەنداوی عومان چەند تانکەرێکی نەوتی کردوەتە ئامانج، بەبێ ئەوەی رونکردنەوەی زیاتر بڵاوبکەنەوە. 


نیشانەکردن :

# نەوت

Copyright © 2016 Xendan.org all rights reserved

designed and developed by AVESTA GROUP