ئەردۆغان: موشەکی s-400 مان کڕیوە و مانگی داهاتو بەدەستمان دەگات

- 6/12/2019 11:03:00 PM 6921 جار خوێندراوەتەوە

خەندان-

رەجەب تەیب ئەردۆغان، سەرۆککۆماری تورکیا رایگەیاند، وڵاتەکەی موشەکی s-400 ی روسی كڕیوە و دەشڵێت" ئەو مامەڵەیەی نێوان ئەنقەرە-مۆسکۆ گەڕانەوەی نیە".

"من ناڵێم سیستەمی بەرگری روسی دەكڕین، بەڵکو دەڵێم کڕیومانە، ئەو مامەڵەیە کۆتایی پێهاتوە" ئەردۆغان لە کۆبونەوەی ئاسایی حزبەکەیدا وای وت.

ئەردۆغان ئاماژەی بەوەشدا، پێداگری ئەنقەرە لە ئەنجامدانی ئەو مامەڵەیە لەگەڵ مۆسکۆ تەنها بەهۆی نرخەکەی نەبوە، بەڵکو لەبەر ئاستبەرزیی تەکنەلۆژیای گواستنەوە و ویستی کاری پێکەوەیی ئەنقەرە بوە لەگەڵ مۆسکۆ.

سەبارەت بە دورخستنەوەی ئەنقەرە لە پرۆگرامی F-35 و راگرتنی مەشقی فرۆکەوانە تورکەکان لەلایەن واشنتنەوە، ئەردۆغان وتی" تورکیا تەنها بەکارهێنەرێکی ئەو پرۆگرامە نەبو، بەڵکو وەبەرهێنێکی گەورەی ئەو پرۆگرامە بو، کە زیاتر لە یەک ملیار دۆلاری لەو پرۆژەیەدا وەبەرهێناوە".

بەگوێرەی وتەکانی ئەردۆغان، بڕیارە لە مانگی داهاتودا لەگەڵ هاوتە ئەمریکیەکەی لە ئوردن کۆببێتەوە و هیواشی خواست" بگەن بە چارەسەرێکی هاوبەش".

ئەمڕۆ سێشەمە یوری یوشاکۆف، جێگری وەزیری ناوخۆی روسیا رایگەیاند روسیا مانگی تەموزی داهاتو سیستمی بەرگری موشەکی (S-400) رادەستی تورکیا دەکات.


Copyright © 2016 Xendan.org all rights reserved

designed and developed by AVESTA GROUP