ڤیدیۆی هێرشێکی پەکەکە بۆ سەر بارەگای سوپای تورکیا لە زاخۆ بڵاوکرایەوە

- 6/12/2019 1:29:00 PM 139015 جار خوێندراوەتەوە

خەندان-

میدیاکانی نزیک لە پەکەکە هێرشێکی هێزەکانی پاراستنی جەوهەریی باشوری کوردستان-یان دژی بارەگای سوپای تورکیا لە زاخۆ بڵاوکردەوە و رایدەگەیەنن، بەهۆی ئەو چالاکییەوە "20 سەربازی تورکیا کوژران".

هێزەکانی پارستنی جەوهەریی باشوری کوردستان لە تۆڕی کۆمەڵایەتی تویتەر بەناوی "خۆپاراستن" دیمەنی چالاکییەکەیان بڵاوکردەوە و تیایدا دەردەکەوێت هێرش دەکرێتە سەر بارەگایەکی سوپای تورکیا لە زاخۆ.

نۆی ئەم مانگە هێزەکانی پارستنی جەوهەریی باشوری کوردستان لە راگەیەنراوێکدا رایگەیاند، "لەبەرامبەر دەوڵەتی تورکیا کە لەسەر هەرێمەکانی پاراستنی مەدیا و هەرێمی خواکورکی باشوری کوردستان داگیرکارییان دەستپێکردوە، ڕۆژی حەوتی ئەم مانگە یەکینەکانمان لە گردی بێ لە شارەدێی بێگوڤا-ی سەر بە شارۆچکەی زاخۆ، دژی بارەگای سوپای تورک چالاکییەکیان ئەنجامدا".

ئاماژە بەوەشکرابو، "لەو چالاکییەدا لە دو قۆڵەوە سەنگەر و بارەگای سوپای تورک کرانە ئامانج، بەشێوەیەکی کاریگەر، لە ئەنجامدا 20 سەرباز کوژراون، ئۆتۆمبێلێک و ژمارەیەکی زۆر حەشارگە لە حەوشەی بارەگا سەربازییەکەدا سوتان و لەناوچون".


Copyright © 2016 Xendan.org all rights reserved

designed and developed by AVESTA GROUP