هەواڵی ئەمڕۆ

هێرشێكی موشەكی بۆ سەر فڕۆكەخانەیەكی سعودیە قوربانی لێكەوتەوە

- 6/12/2019 1:19:00 PM 4684 جار خوێندراوەتەوە

خەندان-

وتەبێژی هێزە چەكدارەكانی هاوپەیمانی پشتگیری لە شەرعیەتی یەمەن رایگەیاند، لە ئەنجامی هێرشێكی حوسیەكانی یەمەن بۆ سەر فڕۆكەخانەیەكی عەرەبستانی سعودیە ژمارەیەک هاوڵاتی سیڤیل برینداربون.

بەپێی راگەیەندراوێكی ئاژانسی واس-ی سعودی، بەیانی ئەمڕۆ چوارشەممە، حوسیەكانی یەمەن هێرشێكی موشەكیان كردوەتە سەر فڕۆكەخانەی نێودەوڵەتی ئەبها كە دەكەوێتە پارێزگای ئەسیر-ی ئەو وڵاتە، لە ئەنجامدا 26 كەس برینداربون كە پێنج-یان ژن و منداڵن.

ئاژانسەكە رایگەیاندوە، سێ كەس لە بریندارەكان سێ ژنی بە رەگەز (یەمەنی و هیندی و سعودی)ن و لەناو بریندارەكانیشدا دوو منداڵی سعودی هەیە، ئاماژە بەوەشكراوە بە مەبەستی وەرگرتنی چارەسەر سەرجەم بریندارەكان گەیەندراونەتە نەخۆشخانە.

فەرماندە توركی ئەلمالیكی، وتەبێژی هێزە چەكدارەكانی هاوپەیمانی پشتگیری لە شەرعیەتی یەمەن لەو بارەیەوە رایگەیاند، "ئەو كردەوەیە هێرشێكی بە مەبەست بوە و میدیاكانی سەر بە هێزە حوسەیكانیش ئەوەیان پشتراستكردوەتەوە كە موشەكەكە لە لایەن خۆیانەوە ئاراستەی سعودیە كراوە".

راشیانگەیاندوە، ئەو موشەكەی ئاراستەی فڕۆكەخانەكە كراوە موشەكی جۆری كروز-ە. 


Copyright © 2016 Xendan.org all rights reserved

designed and developed by AVESTA GROUP