هەواڵی ئەمڕۆ

‎"گەشبینم، چارەسەرێك دێتە كایەوە پێكھاتەكان دڵخۆش دەكات"
سەرۆک بەرهەم: خەونی من رزگارکردنی كەركوكە لە پێكدادان و ئاڵۆزی بۆ دەستپێكردنی سەرمایەگوزاری و بنیاتنان

- 6/3/2019 3:21:00 PM 12906 جار خوێندراوەتەوە

خەندان-

د. بەرهەم ساڵح، سەرۆک کۆماری عێراق لەبارەی دۆخی کەرکوک و پلانی داھاتویی حکومەتی عێراق بۆ شارەکە دەدوێت و دەڵێت، چەندین ساڵە پێکدادان و گرژی لە کەرکوک نەبوەتە چارەسەر، ئیتر پێویستە میکانیزمی بڕیاری ھاوبەش جێگیر بکرێت، پێویستە کەرکوک بکرێت بە شارێکی سەرمایەگوزاری.
کەرکوک بوەتە گۆڕەپانی پێکدادانەکان، دیمۆگرافی ئەم شارە جوانە گۆڕدرا

 

د. بەرهەم ساڵح، سەرۆک کۆماری عێراق لەمیانی چاوپێکەوتنێکدا لەگەڵ تۆڕی هەواڵی خەبەر تورک کە ئەمڕۆ خەندان دەقەکەی بڵاودەکاتەوە رایگەیاندوە، "کەرکوک، لە پڕۆسەی دامەزراندن و دوای دامەزراندنی عێراق بە تایبەتی لە سەردەمی دەسەڵاتی رژێمی بەعس لە ساڵی 1963ەوە بە رەوشی ناخۆشدا تێپەڕیوە، کەرکوک بوەتە گۆڕەپانی پێکدادانەکان، دیمۆگرافی ئەم شارە جوانە گۆڕدرا، کەرکوک شارێکی دەوڵەمەندە لە نەوت، بەڵام بە داخەوە دەیڵێم کە یەکێکە لە شارە ھەژارەکانی عێراق". 
کەرکوک بە بەراورد لەگەڵ شارەکانی دیکەی عێراق خاوەنی مێژویەکی تایبەتە، دەوڵەمەندە بە سەرمایەی مرۆڤ
ئاماژەی بەوەشکردوە، کەرکووک بە بەراورد لەگەڵ شارەکانی دیکەی عێراق خاوەنی مێژوویەکی تایبەتە، دەوڵەمەندە بە سەرمایەی مرۆڤ، کورد، تورکمان عەرەب و مەسحی سەدان ساڵە لەم شارە پێکەوە ژیان دەکەن و لە یەکتر تێدەگەن، کەرکووک تابلۆیەکی رەنگاڵەیە. 
من کوردم شانازی بە کورد بونم دەکەم، من دەمەوێت کورد تایبەتمەندییە ئازادییەکانی لە کەرکوک بپارێزێت

 

سەرۆک بەرھەم ساڵح دەشڵێت، "من کوردم شانازی بە کورد بونم دەکەم، من دەمەوێت کورد تایبەتمەندییە ئازادییەکانی لە کەرکوک بپارێزێت، پەیامم بۆ کورد لە کەرکوک، تورکمان و عەرەب و مەسیحی دراوسێی و خوشک و برای ئێوەن، بۆ ئەم شارە چی بڕیارێک لەبەرژەوەندی ھەمووانە پێویستە بینێن، بە ھەمان شێوە چاوەڕوانی لە برا تورکمان و عەرەب و مەسیحی دەکەم،ئەوان برایی منن، من سەرکۆماری ھەمویانم، پێویستە رێز لە ئیرادەی ھەموو پێکھاتەکانی کەرکوک بگرم، برایانی کەرکوم با چاوەڕوانی چارەسەر لە بەغدا و سلێمانی یاخود دەرەوەی وڵات  نەکەن، با خۆیان لە نێوخۆیان مۆدێلی چارەسەری پێکەوە ژیان بۆ داھاتویی شارەکە بدۆزنەوە لە ھەلومەرجێکی یەکسان". 
چەندین ساڵە پێکدادان و گرژی نەبوەتە چارەسەر، ئیتر پێویستە میکانیزمی بڕیاری ھاوبەش جێگیر بکرێت

 

راشیگەیاندوە، "چەندین ساڵە پێکدادان و گرژی نەبووەتە چارەسەر، ئیتر پێویستە میکانیزمی بڕیاری ھاوبەش جێگیر بکرێت، پێویستە بکرێت بە شارێکی سەرمایەگوزاری، خەونی من دەرکردنی کەرکووکە لە رەوشی پێکدادان بۆ دەستپێکردنی سەرمایەگوزاری و بنیاتنانی ھەلی کار، عێراق و کەرکوک زیانیان لە پێکدادان بە درێژایی ساڵ وەرگرت".
گەشبینم کە چارەسەرێک دێتە کایەوە کە کورد و تورکمان و عەرەب و ھەموو پێکھاتەکانی شارەکە دڵخۆش دەکات

 

سەرۆک بەرهەم لەمیانی چاوپێکەوتنەکەدا رونیکردوەتەوە، "گەشبینم کە چارەسەرێک دێتە کایەوە کە کورد و تورکمان و عەرەب و ھەموو پێکھاتەکانی شارەکە دڵخۆش دەکات، وەک سەرۆک کۆمار بە ئەرکی دەزانم پشتیوانی لەمە بکەم".


Copyright © 2016 Xendan.org all rights reserved

designed and developed by AVESTA GROUP