ئەرسەلان بایز باس لە کاندیدکردنی فەرەیدون عەبدولقادر دەکات بۆ پۆستی پارێزگاری کەرکوک

- 6/2/2019 1:43:00 PM 27094 جار خوێندراوەتەوە

خەندان-

ئەرسەلان بایز، ئەندامی مەکتەبی سیاسی یەکێتی باس لە کاندیدکردنی فەرەیدون عەبدولقادر دەکات بۆ پۆستی پارێزگاری کەرکوک و دەڵێت، "ئەگەری پارتی و یەکێتی نەتوانن ڕێگاچارەیەك بۆ ئەو مەرگەساتەی كەركوك بدۆزنەوە، ئەی بۆچی گلەیی لە حكومەتی عێراقی عەرەبی شۆڤێنی بكەین كە مادەی 140ی دەستوری جێبەجێ ناکات".
لەو چەند ساڵەی رابردودا لە چەندین دانیشتنی نافەرمیدا باسی فەرەیدون عەبدولقادر كراوە بۆ چەندین پۆست

 

ئەرسەلان بایز، ئەندامی مەکتەبی سیاسی یەکێتی  لەوتارێکدا لە ژێر ناونیشانی "کۆڵەپـشت" نوسیویەتی، "لەو چەند ساڵەی رابردودا لە چەندین دانیشتنی نافەرمیدا باسی فەرەیدون عەبدولقادر كراوە بۆ چەندین پۆست، بگرە هەندێک جاریش بانگ كراوە بۆ راوێژ و ڕاسپاردە و تەنانەت نوسینی راگەیاندن و بەیاننامەكانیش، لەو چەندین مانگەی ڕابردووشدا باس و خواس و مقۆ مقۆیەكی زۆر لەسەر كاندیدی پارێزگاری كەركوك لە ئارادا بوە، جارجارەش لێرە و لەوێ‌ گوێبیست دەبوم كە یەكێ‌ لەو كاندیدانە كاك (فەرەیدون)ە".
هەڤاڵێكی خەڵكی خانەقین بۆی هەیە دوجار لێپرسراوی مەڵبەندی ڕێكخستنی یەکێتی بێت لە سلێمانی

 

ئاماژەی بەوەشکردوە، "هەڤاڵێكی خەڵكی خانەقین بۆی هەیە دوجار و بۆ چەندین ساڵ لێپرسراوی مەڵبەندی ڕێكخستنی یەکێتی بێت لە سلێمانی، بۆچی هەڤاڵێكی خەڵكی شارەزور، پێنجوێن، سلێمانی، یان هەولێری بۆی هەبێ‌ لێپرسراوی مەڵبەندەكانی دهۆك و موسڵ بێت، هەڤاڵێكی كۆیی بۆی هەبێت دوجار لێپرسراوی مەڵبەندی كەركوك بێت. چەندین هەڤاڵی خەڵكی كەركوك بۆیان هەبێت چەندین ساڵ لێپرسراوی مەڵبەندەكانی هەلێر و سۆران و ڕانیە بن كەچی هەڤاڵانم لە كەركوك ڕازی نەبن سلێمانییەك ببێتە پارێزگاری كەركوك".

ئەو وتارەی ئەرسەلان بایز لەکاتێکدایە مەحمود محەمەد، وتەبێژی پارتی لە کۆنگرەیەکی رۆژنامەوانیدا رایگەیاندبو، "مەسعود بارزانی و کۆسرەت رەسوڵ رێککەوتون پۆستی فەرەیدون عەبدولقادر بکەن بە پارێزگاری کەرکوک، بەڵام پێش هەڵبژاردنی سەرۆکی هەرێمی کوردستان لە پەرلەمانی کوردستان یەکێتی پاشگەزبوەتەوە". 

بەڵام دوێنێ شەممە کۆسرەت رەسوڵ، جێگرى سکرتێرى گشتى یەکێتى ئەو وتانەی رەتکردەوە و رایگەیاند، لە کۆبونەوەکەی  لەگەڵ مەسعود بارزانى باسیان لە دیاریکردنی هیچ کەسێک نەکردوە بۆ پۆستی پارێزگاری کەرکوک.
یەکێتی و پارتی نەتوانن رێگاچارەیەك بۆ ئەو مەرگەساتەی كەركوك بدۆزنەوە، ئەی بۆچی گلەیی لە حكومەتی عێراقی عەرەبی شۆڤێنی بكەین

 

ئەرسەلان بایز لە وتارەکەیدا نوسیویەتی، "یەکێتی و پارتی نەتوانن رێگاچارەیەك بۆ ئەو مەرگەساتەی كەركوك بدۆزنەوە، ئەی بۆچی گلەیی لە حكومەتی عێراقی عەرەبی شۆڤێنی بكەین كە مادەی 140ی دەستوری عێراق جێبەجێ ناكەن، كە دەیان هێندە كێشە و گرفتی هەیە؟".


کۆڵەپـشت
فەرەیدون كەركوكی نییە…!


(3)

*ماوەی زیاتر لە شەش مانگە بە ڕێكەوتیش چاوم بە كاك (فەرەیدون) نەكەوتووە. كاندیدی منیش نەبووە بۆ پۆستی پارێزگاری كەركوك. هیچ ڕۆژێكیش لەو بارەوە پرس و ڕام لەگەڵدا نەكراوە. لە ژیانی پێشمەرگایەتی و سیاسیشمدا هەرگیز لە بەرامبەر ڕكابەرەكانم كاك (فەرەیدون) پشتیوانی لێ‌ نەكردووم.

لەو چەند ساڵەی ڕابردوودا لە چەندین دانیشتنی نافەرمیدا باسی ئەو هەڤاڵە كراوە بۆ چەندین پۆست. بگرە هەندێ‌ جاریش بانگ كراوە بۆ راوێژ و راسپاردە و تەنانەت نووسینی ڕاگەیاندن و بەیاننامەكانیش. لەو چەندین مانگەی ڕابردووشدا باس و خواس و مقۆ مقۆیەكی زۆر لەسەر كاندیدی پارێزگاری كەركوك لە ئارادا بووە. جارجارەش لێرە و لەوێ‌ گوێبیست دەبوم كە یەكێ‌ لەو كاندیدانە كاك (فەرەیدون)ە. ئاگاداری ئەوەش نیم ئایا ئەو هەڤاڵە لە ناوهێنانی خۆی ئاگادارە، ڕازی بووە یان نا؟… بەڵام ئەوەی بەلامەوە سەیر بوو، ڕەتكردنەوەی بوو لەلایەن حیزبەكەم (ی.ن.ك)ەوە.

*(فەرەیدون عەبدولقادر) لە دایك و باوكێكی خەڵكی پارێزگای سلێمانییە. لە دایكبووی گەڕەكی ئیمام قاسمی شاری كەركوكە. دەرچووی یەكێ‌ لە كۆلێژەكانی زانكۆی (مستنصریە)ی شاری بەغدایە. یەكێك لە دامەزرێنەرانی (كۆمەڵەی ڕەنجدەرانی كوردستان) ەو، ساڵەها ئەندامی ناوەندی كۆمەڵە و مەكتەبی سیاسی (ی.ن.ك) و لێپرسراوی هەر هەموو ئەندامانی ئێستای سەركردایەتی و مەكتەبی سیاسی (ی.ن.ك) بووە. چەندین ساڵ ماڵی لە كەركوك بووە، لە حەفتاكاندا فەرمانبەری یەكێ‌ لە دائیرەكانی پارێزگای كەركوك بوو، لێپرسراوی كۆمیتەی ڕێكخستنی كۆمەڵەی ئەو شارە بوو. دەیان و بگرە سەدان كەسایەتی و بنەماڵەی پێكهاتەكان دەناسێ‌. ئەندامی دەیان شاندی گفتوگۆی (ی.ن.ك) بووە لەگەڵ حیزب و حكومەتەكان. زیندانییەكی خۆڕاگر و فەرماندەیەكی ئازا لە مەیدانەكانی شەڕ. ئەی نازانم بۆچی شایستەی پارێزگاری كەركوك و پۆستی زیاتریش نەبێت…؟! (لەگەڵ ڕێز و خۆشەویستیم بۆ هەر هەموویان، لە دڵسۆزی و توانا و هیلاكییان كەم ناكەمەوە) ئایا كام لە كاندیدەكانی تری هەڤاڵە كەركوكییەكان بۆ ئەم قۆناغە و چارەسەركردنی كێشەكان لە (فەرەیدون) شایستە و ماندوو بە توانا ترن…؟ ئایا گوناهەكەی هەر ئەوە بوو خەڵكی كەركوك نییە..؟

* هەڤاڵێكی خەڵكی خانەقین بۆی هەیە دووجار و بۆ چەندین ساڵ لێپرسراوی مەڵبەندی ڕێكخستنی (ی.ن.ك) بێت لە سلێمانی. بۆچی هەڤاڵێكی خەڵكی شارەزوور، پێنجوێن، سلێمانی، یان هەولێری بۆی هەبێ‌ لێپرسراوی مەڵبەندەكانی دهۆك و موسڵ بێت. هەڤاڵێكی كۆیی بۆی هەبێت دووجار لێپرسراوی مەڵبەندی كەركوك بێت. چەندین هەڤاڵی خەڵكی كەركوك بۆیان هەبێت چەندین ساڵ لێپرسراوی مەڵبەندەكانی هەلێر و سۆران و ڕانیە بن… كەچی هەڤاڵانم لە كەركوك ڕازی نەبن سلێمانییەك ببێتە پارێزگاری كەركوك…؟!! ئەگەر بیانووەكە ئەوە بێت كە پێناسەی كەركوكی نییە. ئەوا هەق بوو چارەسەرەكەی بۆ (ی.ن.ك) و پارتی جێ‌ بهێڵین. یان ئەگەر هۆكارەكەی دابڕان بووبێت لە (ی.ن.ك)، ئەوا دەیان سەركردە و فەرماندە و كادیرانی (ی.ن.ك) مانگ و ساڵەها دابڕان و دواتر لە كاتی پێویستدا هاتوونەتەوە مەیدانەكە.

*ئەو ڕەتكردنەوەیە واتە درێژكردنەوەی حوكمڕانێتی عەرەبێكی شۆڤێنی وەكو (راكان جبوری) بە پارێزگاری كەركوك. بە واتایەكی تر بەردەوام بوون لە خوێن ڕۆیشتن لە جەستەی كەركوك. (هەروەكو ڕۆژی 30/5/2019) ڕوویدا. یان سووتاندنی ڕۆژانەی دەغڵ و دانی جوتیارەكان).

جا ئێمە وەكو كورد كە ماوەی ساڵ و نیوێكە ناتوانین لەسەر كاندیدێك بۆ پارێزگاری كەركوك ڕێكەوین. یان (ی.ن.ك) و پارتی دیموكراتی كوردستان نەتوانن ڕێگاچارەیەك بۆ ئەو مەرگەساتەی كەركوك بدۆزنەوە. ئەی بۆچی گلەیی لە حكومەتی عێراقی عەرەبی شۆڤێنی بكەین كە مادەی (140)ی دەستووری عێراق جێبەجێ ناكەن. كە دەیان هێندە كێشە و گرفتی هەیە…؟!!

نیشانەکردن :

#یەکێتی #پارتی

Copyright © 2016 Xendan.org all rights reserved

designed and developed by AVESTA GROUP