"دۆخی ئێستای کەرکوک بەردەوام بێت، یەکێتیش ئەو ئارامییەی نامێنێت"
لاهور شێخ جەنگی: چیتر ئەم تەخوینکردنەی یەکێتی لە کەرکوک قبوڵ ناکەین

- 6/1/2019 1:00:00 PM 33083 جار خوێندراوەتەوە

خەندان-

لاهور شێخ جەنگی رایگەیاند، یەکێتی باجی زۆریدا لەپێناو پێکەوە ژیانی کورد و عەرەب و مەسیحی و تورکمانەکان، بەڵام کە کاسەش لێی رژا ئیتر تەحەمول نامێنێت، دەشڵێت، "
ئەم شارە شاری پێکەوە ژیانە، تکاتان لێدەکەم ئارامی و ئاسایشی ئەم شارە و ئەم پێکەوە ژیانە لە دەست مەدەن

 

لاهور شێخ جەنگی، بەرپرسی دەزگای پاراستن و زانیاری/ زانیاری هەرێمی كوردستان  ئەمڕۆ  لەمیانی وتارێکدا لە شاری کەرکوک لە یادی 44 ساڵەی دامەزراندنی یەکێتی پەیامێکی ئاڕاستەی پێکهاتەکانی شاری کەرکوک کرد و رایگەیاند، "ئەم شارە شاری پێکەوە ژیانە، تکاتان لێدەمەم ئارامی و ئاسایشی ئەم شارە و ئەم پێکەوە ژیانە لە دەست مەدەن، بە قسەی حزبەکان مەکەن، حزبەکان لە پێناو بەرژەوەندی خۆیان دەیانەوێت تەفرەقە دروستبکەن لەناوتاندا".

ئاماژەی بەوەشکرد، "کوردانی بەشەرەفی کەرکوک و ناوچە جێناکۆکەکان کە روبەڕوی دڕەندەترین دوژمن کە بەعسی روخاوە بونەتەوە ئەمەی ئێستا هیچ نیە بۆ ئێوە، سەبرتان هەبێت، ئەمەی ئێستا دەگوزەرێت هەندێک بەچکە بەعسی بەم کردار و رەفتارانەی کە بەرامبەر کوردەکانی ناوچە دابڕێندراوەکان دەیکەن دەبێت سەبرتان هەبێت".
ئێمە خۆمان بە خاوەنی ئەم خاکە دەزانین بۆیە دەبێت سەبرمان زیاتربێت، یەکێتیش سەبری زۆر زۆرە و سەبری زۆر کردوە

 

لاهور شێخ جەنگی وتیشی، "ئێمە خۆمان بە خاوەنی ئەم خاکە دەزانین بۆیە دەبێت سەبرمان زیاتربێت، یەکێتی نیشتیمانی کوردستانیش سەبری زۆر زۆرە و سەبری زۆر کردوە، بۆیە لێرەوە پەیامێک ئاڕاستەی دەسەڵاتدارانی بەغدا و بەڕێوەبەرانی کەرکوک دەکەم، تکایان لێدەکەم ئەم جۆرە رەفتارانە بەرامبەر بە کورد بوەستێنن".
ئێمە لەگەڵ پێکەوە ژیانین، یەکێتی باجی زۆریدا لەپێناو پێکەوە ژیانی کورد و عەرەب و مەسیحی و تورکمانەکان

 

ئەوەشی خستەڕو، "ئێمە لەگەڵ پێکەوە ژیانین، یەکێتی نیشتیمانی کوردستان باجی زۆریدا لەپێناو پێکەوە ژیانی کورد و عەرەب و مەسیحی و تورکمانەکان، بەڵام کە کاسەش لێی رژا ئیتر تەحەمول نامێنێت".
داوام لە دەسەڵاتدارانی بەغدا هەیە سنورێک بۆ ئەو رەفتارانە دابنێن کە بەرامبەر کوردنیشان و جوتیارەکانی ئەم ناوچە ئەنجامدەدرێت 

 

لاهور شێخ جەنگی وتیشی، "داوام لە دەسەڵاتدارانی بەغدا هەیە سنورێک بۆ ئەو رەفتارانە دابنێن کە بەرامبەر کوردنیشان و جوتیارەکانی ئەم ناوچە ئەنجامدەدرێت و بوەستن لێرەدا، ئەگەر کەس مێژوی یەکێتی نەخوێندوەتەوە ئەوا یەکێتی ئەو یەکێتییە بو کە لە یەککاتدا روبەڕوی تورکیا و ئێران و حکومەتی فاشیست بوەوە، ئەگەر ئەم دۆخەی ئێستای کەرکوک و ناوچە جێناکۆکەکان بەردەوام بێت یەکێتیش ئەو ئارامییەی نامێنێت". 
ئەوان ئامادەن لەگەڵ حەشدی شەعبی لە موسڵ دەست تێکەڵاوبکەن و پارێزگارێک کە سەر بە حەشدی شەعبیە دابنێن و جێگرەکەی بۆخۆیان بێت

 

هاوکات پەیامێکی ئاڕاستەی سەرکردایەتی سیاسی کورد کرد و وتی، "ئەوانەی رۆژانە فرمێسکی تیمساحی بۆ کەرکوک و ناوچە جێناکۆکەکان دەڕێژن و لە کۆشک و تەلارەکانیانەوە پەیامی ئاگرین دەدەن، ئەوانەی کە ئامادەن لەگەڵ حەشدی شەعبی لە موسڵ دەست تێکەڵاو بکەن و پارێزگارێک کە سەر بە حەشدی شەعبیە دابنێن و جێگرەکەی بۆخۆیان بێت، بەڵام ئامادەنین دەست بکەنە ناو دەستی کورد لە کەرکوک بۆ ئەوەی تۆزێک ئەم ئەرک و ماندوبونەی ئەو ئەشکەنج و ئازارەی بەرامبەر کورد دەکرێت تۆزێک لە خەمی کەرکوکیەکان کەمبکەنەوە، داویان لێدەم بەس بێت".
هەرکەسێک تەخوین بە یەکێتی بکات قۆنەرەی منداڵێکی کەرکوک دەخەمە دەمییەوە

 

وتیشی، "ئەگەر راست دەکەم دەبێت ئەمڕۆ شانبەشانی کەرکوکیەکان روبەڕوی ئەم تەهدید و هەڕەشانە ببنەوە، میللەتەکەمان چیتر باوەڕتان پێناکات، بەسە تەخوینکردنی یەکێتی نیشتیمانی کوردستان، چەندینجار داوامانکردوە کە بەڵگە بهێننەوە بۆ ئەو تەخوینانەی بە خوێنی شەهیدەکانمان دەیکەن، چیتر ئەم تەخوینە قبوڵ ناکەین و هەرکەسێک تەخوین بە یەکێتی بکات قۆنەرەی منداڵێکی کەرکوک دەخەمە دەمییەوە".



نیشانەکردن :

#یەکێتی

Copyright © 2016 Xendan.org all rights reserved

designed and developed by AVESTA GROUP