سەرۆک بەرهەم گەڕایەوە بەغدا
پاش بەشداریکردنی لەهەردو کۆنگرەی لوتکەی عەرەبی و ئیسلامی لە شاری مەککە

- 6/1/2019 10:15:00 AM 2855 جار خوێندراوەتەوە

خەندان-

د. بەرهەم ساڵح، سەرۆک کۆماری عێراق پاش بەشداریکردنی لە ھەردو کۆنگرەی لوتکەی عەرەبی و ئیسلامی لە شاری مەککەی پیرۆز گەڕایەوە بەغدا.

نوسینگەی راگەیاندنی سەرۆکایەتی کۆماری عێراق بڵاویکردەوەن سەرۆک بەرهەم ئەمڕۆ شەممە پاش بەشداریکردنی لە ھەردو کۆنگرەی لوتکەی نائاسایی 14ەھەمینی عەرەبی و لوتکەی رێکخراوی ھاریکاری ئیسلامی لە شاری مەککەی پیرۆز گەڕایەوە بەغدا.

لە کۆنگرەی لوتکەی نائاسایی عەرەبیدا سەرۆک بەرھەم وتاری عێراقی خوێندەوە و جەختیکردەوە، ناوچەکە پێویستی بە سەقامگیرییە لە سەر بنەمای سیستەمی ئاسایشی ھاوبەش و پاراستنی سەروەری و دەستوەرنەدان لە کاروباری ناوخۆی وڵاتان و رەتکردنەوەی توندوتیژی و توندڕەوی. 

ھاوکات سەرۆک کۆمار ئاماژەی بەوەکرد، "بەرقەرارکردنی سەقامگیری لە عێراق پێویستی بە ھاریکاری و لێکگەیشتنە لە دۆست و دراوسێکان، ئەوەش وا دەخوازێت کە ھەموان ھاریکار و پشتیوانمان بن، چونکە عێراق یەکێکە لە گرنگترین کۆڵەکەکانی ناوچەکە.

لە بەشێکی تری وتارەکەیدا سەرۆک بەرھەم تیشکی خستەسەر ئەوەی کە، "ھەر پێکدادانێک لە ناوچەکەدا ئاسایشی عێراق دەخاتە مەترسیەوە، لەو چوارچێوەیەشدا عێراق بە پەرۆشە بۆ پاراستنی ئاسایشی ناوچەکە، ھەروەھا بۆ پارستنی ئاسایشی دۆستەکانمان و ناوچەکە عێراق ھەموو ھەوڵەکانی دەخاتە گەڕ لە پێناو کردنەوەی دەرگای گفتوگۆ و تەئکیدیش لە دیالۆگی بنیادنەر و راستەوخۆ کردەوە  بۆ وەلانانی توندوتیژی و جەنگ".


Copyright © 2016 Xendan.org all rights reserved

designed and developed by AVESTA GROUP