ترەمپ هانی ژاپۆنییەکان دەدات وەبەرهێنانی زیاتر لە ئەمریکا بکەن

- 5/25/2019 3:54:00 PM 1250 جار خوێندراوەتەوە

خەندان-

بەیانی ئەمڕۆ دۆناڵد ترەمپ، سەرۆکی ئەمریکا بەسەردانێکی چوار رۆژە گەیشتە تۆکیۆی پایتەختی ژاپۆن و دواتر لەکۆنگرەیەکی رۆژنامەوانیدا هانی وەبەرهێنەرانی ژاپۆنی دا وەبەرهێنانی زیاتر لە ئەمریکا بکەن، توانجێکیشی لە توانای بازرگانی ژاپۆندا و رایگەیاند، "زۆر لە ئێمەوە دورن لە بازرگانیدا."
 
بەپێی ئاژانسی رۆیتەرز، ئەمڕۆ دۆناڵد ترەمپ پاش گەیشتنی بۆ تۆکیۆ بەشداری بۆنەیەکی کۆمەڵایەتی کردوە لە شوێنی مانەوەی ویلیەم هاگرتی، باڵوێزی ئەمریکا لە ژاپۆن کردوە کە بەگوێرەی زانیارییەکانی کۆشکی سپی تیایدا بەرپرسانی باڵای کۆمپاکانی نیسان، تویوتا، هۆندا، سۆفتبانک و راکوتین بەشداربون.

ترەمپ بە بەرپرسانی کۆمپانیا گەورە و بەناوبانگەکانی ژاپۆنی راگەیاندوە، "هیچ کات بەقەدەر ئێستا ئەمریکا لەبارنەبوە بۆ وەبەرهێنانی بیانی"، رەخنەی توندیشی لەبانکی فیدڕاڵی گرت کە رێگەنادەن ئابوری ئەمریکا بگاتە شوێنە گونجاوەکانی خۆی.

وتیشی، "لەماوەی رابردودا ژاپۆن دابڕانی زۆری هەبوە و بۆماوەی چەندین ساڵ دابڕاوە، بەڵام کێشە نیە رەنگە ئێستا لەبەرئەوە بێت کە ئێمەتان خۆشدەوێت." 

جگە لە تاوتوێکردنی پەیوەندییە بازرگانییەکانیان، وابڕیارە سبەی یەکشەممە ترەمپ و سەرۆک وەزیرانی ژاپۆن یاری گۆڵف بکەن و دواتر پێکەوە ئامادەی پاڵەوانێتی یاری "سومۆ" ببن. 

سەردانی سەرۆکی ویلایەتە یەکگرتوەکانی ئەمریکا لەکاتێکدایە کە پەیوەندییە بازرگانییەکانی نێوان ئەمریکا و ژاپۆن ئاڵۆزییەکی زۆری بەخۆوە بینیوە، ئەمریکا بەنیازە گومرگی سەر کەلوپەلە بازرگانییەکانی ژاپۆن زیادبکات، بەتایبەتیش بەرهەمەکانی ئۆتۆمبێل.

هاوکات، پێدەچێت رۆژی دوشەممەی داهاتو ترەمپ و سەرۆک وەزیرانی ژاپۆن کۆبونەوەیەکی چڕوپڕ لە بارەی پەیوەندییە بازرگانییەکانی نێوانیان بکەن، بەڵام بەرپرسانی هەردولا بەدوری دەزانن ترەمپ و ئابی بگەنە هیچ رێکەوتنێک.

سەرۆکی ئەمریکا یەکەم سەرکردەی بیانی دەبێت کە لەلایەن تازە ئیمپراتۆر ناروهیتۆ پێشوازیدەکرێت.

هەر لەبارەی سەردانەکەوە، رۆژی پێنجشەممەی رابردو دۆناڵد ترەمپ لەکۆنگرەیەکی رۆژنامەوانیدا رایگەیاند، "من میوانی فەخری ژاپۆنم، سەرۆک وەزیران زۆر بەتایبەت پێیڕاگەیاندم کە من میوانی فەخری ژاپۆنم، ئەوەش گەورەترین بۆنەی پێشوازیکردنە لە ماوەی 200 ساڵی رابردوی ئەو وڵاتەدا".

رۆژی دوشەمەش لەگەڵ وروژاندنی بابەتە بازرگانییەکاندا، هاوکات باسی پڕۆگرامە ئەتۆمییەکانی کۆریای باکوریش دەکەن.


Copyright © 2016 Xendan.org all rights reserved

designed and developed by AVESTA GROUP