پۆلیسی راپەڕین: دو ئافرەت سوتان و یه‌كێكیان گیانیله‌ده‌ستدا

- 5/25/2019 1:29:00 PM 16921 جار خوێندراوەتەوە

خەندان-

پۆلیسی راپەڕین رایگەیاند، دوێنی هەینی ژن و کچێک سوتان و ژنەکە بەهۆی سەختی برینەکەیەوە رەوانەی سلێمانی کرا بۆ چارەسەر،  کچەکەش گیانیلەدەستدا.

پۆلیسی راپەڕین لە راگەیەندراوێکدا بڵاویكردەوە، كاتژمێر 3:30 خوله‌كی بەرەبەیانی ئەمڕۆ شەممە ژنێك به‌ناوی ( س . ع . م ) له‌ دایكبوی ساڵی 1986 پیشه‌ی ژنی ماڵ، دانیشوی قه‌ڵادزێ گه‌ڕه‌كی ڕاپه‌ڕین به‌ برینداری گه‌یه‌ندرایه‌ نه‌خۆشخانه‌ی گشتی قه‌ڵادزێ كه‌ له‌ حه‌مام به‌ ئاگر سوتاوه‌.

ئاماژەی بەوەشكرد، تا ئێستاش هۆكاره‌كه‌ی نادیاره‌ و به‌ گوێره‌ی ڕاپۆرتی پزیشكی ڕێژه‌ی سوتاویه‌كه‌ی 80% یه‌و به‌هۆی سه‌ختی برینه‌كه‌شی به‌ڕێكرا بۆ سلێمانی كه‌ دایكی سێ منداڵه‌.

پۆلیسی راپەڕین دەشڵێت، كاتژمێر 4:30 خوله‌كی ئێواره‌ی دوێنی كچێك به‌ناوی ( ب . م . ر ) له‌ دایكبوی ساڵی 2002 پیشه‌ی كچی ماڵ دانیشتوی گوندی (گرتك) سه‌ر به‌ ناحیه‌ی سه‌نگه‌سه‌ر به‌ برینداری گه‌یه‌ندرایه‌ نه‌خۆشخانه‌ی گشتی قه‌ڵادزێ كه‌ به‌وته‌ی خۆی له‌كاتی ئاماده‌كردنی خواردن به‌هۆی گڕگرتنی بوتڵی غاز سوتاوه‌، به‌ڵام سه‌رله‌به‌یانی ئه‌مڕۆ به‌هۆی سه‌ختی برینه‌كه‌ی گیانی له‌ده‌ستدا.

له‌سه‌ر سكاڵای كه‌سوكاری ژنه‌كه‌ دادوه‌ر بڕیاریدا به‌ ڕاگیركردنی هاوسه‌ری ( س . ع . م). په‌ڕاوی لێكۆڵینه‌وه‌ بۆ هه‌ردو ڕوداوه‌كه‌ كراوه‌ته‌وه‌ و لێكۆڵینه‌وه‌ش به‌رده‌وامه‌.


Copyright © 2016 Xendan.org all rights reserved

designed and developed by AVESTA GROUP