بە بەشداری زیاتر لە 250 هەزار خوێندکار
تاقیکردنەوەكانی نۆی بنەڕەتی و 12ی ئامادەیی دەستپێدەکات

- 5/25/2019 12:58:00 PM 2843 جار خوێندراوەتەوە

خەندان-کۆچەر عەزیز

سبەی یەكشەممە، بە بەشداری زیاتر لە 250 هەزار خوێندکار تاقیکردنەوەی پۆلە گشتییەکانی نۆی بنەڕەتی و 12ی ئامادەیی دەستپێدەکات تا 20ی حوزەیران بەردەوام دەبن، رۆژانە بۆ ماوەی سێ کاتژمێریش هێڵەکانی ئینتەرنێت رادەگیرێن.

شۆڕش غەفوری، بەڕێوەبەری راگەیاندنی وەزارەتی پەروەردەی حکومەتی هەرێمی کوردستان بە خەندان-ی راگەیاند، وەزارەت هەمو رێکارێکی گرتوەتە بەر بۆئەوەی هیچ کێشەیەک، لە روی پێداویستی و هونەری و ئامادەکاری هۆڵەکانی تاقیکردنەوەکان، رونەدات.

ئاماژەی بەوەشكرد، ئەمساڵ هیچ کێشەیەک رونادات، چونکە فۆرمی سۆما گۆڕانکاری بەسەردا هاتوە، بە جۆرێک ساڵی رابردو چوار بژرادە هەبو، بەڵام ئەمساڵ بۆ خوێندکارانی زانستی و وێژەیی 26 جۆر پرسیار هەیە، کە رێژەی قۆپییەکردن کەمدەکاتەوە.

شۆڕش غەفوری باسیلەوەشکرد، خوێندکار ناو کۆد و هیچ شتێک لەسەر وەرەقەی تاقیکردنەوە نانوسێت، تەنها وەڵامی پرسیارەکان دەداتەوە و فۆڕمی سۆماکەش پەنجەمۆری پێوەیە، کە بە هیچ شێوەیەک رێگا بە گۆڕینی وەرەقەی خوێندکاران نادات.

غەفوری وتیشی، رۆژانە بۆ ماوەی سێ کاتژمێر هێڵەکانی ئینتەرنێت رادەگیرێن و تا رۆژی 20ی 6 تاقیکردنەوەکان بەردەوام دەبن و هەر رۆژێکیش پشو بێت، تاقیکردنەوەی ئەو رۆژە دەچێتە رۆژی دواتر، بە پێی زنجیرەی تاقیکردنەوەکان.


Copyright © 2016 Xendan.org all rights reserved

designed and developed by AVESTA GROUP