"یەكەمین جار لە مێژودا ئەو كارە ئەنجامدەدرێت"
بە وێنە و ڤیدیۆ: گروپێك خوێندكار موشەكێكی ئاسمانی رەوانەی بۆشایی ئاسمان دەكەن

- 5/24/2019 6:15:00 PM 9782 جار خوێندراوەتەوە

خەندان-

ژمارەیەك خوێندكاری زانكۆی باشوری كالیفۆرنیا، موشەكێكی ئاسمانیان ئاراستەی بۆشایی ئاسمان كردوە كە داهێنانی خۆیانە، ئەوەش بە یەكەمین موشەك دادەنرێت كە لە لایەن خوێندكارەوە دروستكرابێت و بچێتە بۆشایی ئاسمان.

ئەو موشەکە  ناوی (Traveler IV )ە، درێژیەكەی چوار مەترە و لەكاتی رەوانەكردنیدا بۆ بۆشایی ئاسمان هێڵی كارمان-ی تێپەڕاند، ئەو هێڵە 100 كیلۆمەتر لە زەویەوە دورە و بە سنوری نێوان بەرگە هەوای زەوی و بۆشایی ئاسمان دادەنرێت.

ئەوەش یەكەمینجارە لە مێژودا موشەكێكی ئاسمانی لە لایەن خوێندكارەوە دروستبكرێت كە بچێتە بۆشایی ئاسمان، پێشتریش خوێندكاران لە سەرتاسەری جیهان بە مەبەستی گەیشتن بەو دەستكەوتە كێبڕكێیان ئەنجامداوە، بەڵام گروپی خوێندكارانی USC ی زانكۆی كالیفۆرنیا توانیان بۆ یەكەمینجار ئەو دەستكەوتە بەدەستبهێنن.

موشەكەكە لە رێگەی سوتەمەنی موشەكێكی زەمینی وزەی پێدراوە و تایبەتمەندیەكانی لە ئاستێكی سەرەتاییدا بوە و لە كاتی نیشتنەوەدا روبەڕوی هیچ ئاستەنگێك نەبوەتەوە، بەڵام پاش نیشتنەوەی هەستیان بە "كەموكوڕیەكانی" كردوە كە لەكاتی فڕیندا هەیبوە، ئەوەش بەهۆی خراپبونی نۆزڵەكانی ناو موشەكەكە بوە.

تیمەكە رایگەیاندوە، بۆ جاری داهاتو لە پلانیدا هەیە موشەكێك دیزاین بكات كە بە سوتەمەنی خاو كاربكات تا هێز و وزەیەكی زیاتری هەبێت.

Team photo from the night before the launch

Raising the tower before launch

Launch of Traveler IV

Recovery of Traveler IV



Copyright © 2016 Xendan.org all rights reserved

designed and developed by AVESTA GROUP