كەمال كەركوكی: پارتی ڕازی نییە دەنگ بدات بۆ ئەوەی یەکێتیەك ببێتە پارێزگاری كەركوك

- 5/22/2019 10:42:00 PM 29798 جار خوێندراوەتەوە

خەندان-بڕیار جەلال

كەمال كەركوكی ئەندامی مەكتەبی سیاسی و هاوكات سەرۆکی ئەنجومەنی سەرکردایەتی کەرکوك - گەرمیانی پارتی دیموكراتی كوردستان لەم چاوپێكەوتنەی خەندان رایدەگەیەنێت پارتی ڕازی نییە دەنگ بدات بۆ ئەوەی یەکێتیەك ببێتە پارێزگاری كەركوك، دەشڵێت لەدوای 16ی ئۆكتۆبەرەوە پارتی دیموکراتی کوردستان دانی بەو (پارێزگارە سەپێنراوە)ـدا نەناوە، دەشڵێت: یەكێتی رێكەوتنی كردوە بۆ مانەوەی پارێزگاری ئێستای كەركوك و پێویست ناكات پارتی رێكەوتن لەگەڵ توركیا و ئێران و قەتەرو سوننەكان بكات بۆ ئەوەی پارێزگاری كەركوك بۆ هەمیشەیی لە ژێر دەستی یەكێتی دەربهێنێت و رایگەیاند، یەكێتی خۆی ئەو كارەی كرد.

 خەندان: ئێوە ئاگاداری هیچ جۆرە پەیوەندیەك هەن لەنێوان راكان جبوری پارێزگاری ئێستای كەركوك و یەكێتی نیشتیمانی كوردستان؟ ئەگەر ئاگادارن ئەو پەیوەندیانە لە چی ئاستێكدایە؟ ئەگەر ئاگادار نین بۆچی راكان جبوری لە كۆنگرە رۆژنامەنوسیەكەیدا وای وت؟

 
کەمال کەرکوکی: بەڵێ، بە بەڵگەوە پەیوەندیی ھەیە، وەكو لەو بەڵگانەدا دەركەوتوە كە پێش چەند ڕۆژێك لە میدیاکان بڵاو کرانەوە. ئەندامێکی ئەنجومەنی پارێزگای کەرکوك لەسەر لیستی یەکێتی بە ناوى فراكسيۆنى کوردی و لیستی برایەتی بەبێ ئاگاداريی ئەندامانی لیستی برایەتی لەگەڵ ئەوانەی لە لیستەکانی تورکمانی و عەرەبی  کە دژایەتی کورد دەکەن ئیمزای لەسەر ڕێکكەوتنێك کردوە بۆ ئەوەی ڕاکان وەکو پارێزگار لە پۆستی خۆی بمێنێتەوە تاکو ھەڵبژاردنی ئەنجومەنی پارێزگا لە کەرکوك  ئەنجام دەدرێ و کەسێکی یەکێتی بە یاریدەری ڕاکان سعید (پارێزگاری سەپێندراو)  دابمەزرێت.

خەندان: راستە دەوترێت پەیوەندی هەیە لەنێوان پارتی و خەمیس خەنجەر، ئەگەر پەیوەندی هەیە پەیوەندیەكان لە چی ئاستێكدان، زانیاری هەیە كە دانانی پارێزگاری نەینەوا بە رێككەوتنی پارتی بوە لەگەڵ هەندێك هێزی دیكە، بەڕێزت لەو بارەیەوە دەڵێیت چی؟

کەمال کەرکوکی: پارتی دیموکراتی کوردستان پارتێکی گەورە و بەھێزە، سەرەڕای ئەوەی لەسەر ئاستى ھەرێمی کوردستان یەکەم حزبە لەسەر ئاستی گشت عێراقیش یەکەم حزبە، بۆیە پارتی پەیوەنديی ناوخۆيی و عێراقی و ھەرێمی و نێودەوڵەتی فراوانی ھەیە. پەیوەندییەکانی پارتی بۆ بەرژەوندی گەل و خاکی کوردستانن، پێگە و قورسايى پارتیش  کاریگەريی لەسەر ڕێکەوتنەکان هەيە و سەنگی خۆی ھەیە. لە نەینەواش چ لەسەر ئاستی ئەنجومەنی پارێزگای نەینەوا و چ لەسەر ئاستی نوێنەرانی پارتی لە نەینەوا بۆ ئەنجومەنی نوێنەرانی عێراق ڕۆڵی پارتی دیارە و حسابی بۆ دەکرێت.

خەندان: دەوترێت، پارتی لەگەڵ توركیا و سونەكان رێككەوتوە كە تا هەڵبژاردنی ئەنجومەنی پارێزگاكان راكان جبوری لە پۆستەكەی بمێنێتەوە، ئایا ئەوە راستە؟

کەمال کەرکوکی: نەخێر، ئەو بۆچونە ھیچ بنەمایەکی نیيە و زۆر دورە لە ڕاستی، وەکو  دڵسۆزانی  کەرکوك و گشت کوردستان  ئاگادارن، لە دوای خیانەتی (١٦-ی ئوکتۆبەری ٢٠١٧)ـەوە  پارتی  دیموکراتی کوردستان دانی بەو (پارێزگارە سەپێنراوە)ـدا نەناوە و بە پارێزگارێکی نایاسایی و سەپێنراوی دەزانێت. ئەوە نوێنەرانی یەکێتی نیشتمانی کوردستانن لە ناو ئەنجومەنی پارێزگای کەرکوك  لە (١٦ -٤-٢٠١٩) لەگەك ڕاکان و تورکمانێك و عارەبێك لە لیستەکانی تورکمان و عەرەب  بەنھێنی و بەبێ ئاگاداريی  زۆرینەی لیستی برایەتی و بێ ئاگاداريی ژمارەیەك تورکمانی ئەندامی ئەنجومەنەکە و بێئاگاداريی ژمارەیەك عەرەبی ئەندامی ئەنجومەنی پارێزگا و بێ ئاگاداريی خوشک و برا مەسیحیيەکانی ناو لیستی برایەتی ڕێکكەوتون و ئیمزایان کردوە کە ڕاکان، تاکو ھەڵبژاردنی ئەنجومەنی پارێزگای کەرکوك ئەنجام دەدرێ، لە پۆستی خۆی بمێنێتەوە بە پارێزگاری، چونکە لە رێکكەوتنەکە وتویانە ئەنجومەنی پارێزگای کەرکوك ناتوانێت کۆببێتەوە. بۆیە ئەوە دیارە و بەڵگە ھەیە کە یەکێتی ئەو ڕێکكەوتنەی بۆ مانەوەی ڕاکان کردووە نەك پارتی دیموکراتی کوردستان. پارتی خاوەن ھەڵویستە و ڕێکكەوتنی ژێر بەژێر ناکات كە ببێتە هۆی ئەوەی زیان بە کەرکوكیيەکان و پرسی کەرکوك و گەلی کوردستان بگەیەنێت. دڵنیام دڵسۆزانی ناو ڕیزەکانی یەکێتی ئاگاداری ئەو کارە نین، بۆیە ھەقە بێنە دەنگ و بە جەماعەتی (١٦-ی ئوکتۆبەر)ی ناو ڕیزەکانی یەکێتی بڵێن  ئیتر بەسە.

خەندان: بەرپرسێكی یەكێتی لە كەركوك دەڵێت، پارتی بەشێوەیەكی خێرا رێككەوت بۆ هەڵبژاردنی پارێزگارێكی دیكە بۆ نەینەوا، بەڵام رێگرە لەوەی یەكێتیەك و كەركوكیەك بكرێتە پارێزگاری كەركوك ئەوە تا چەند راستە؟

کەمال کەرکوکی: بارودۆخی کەرکوك زۆر زۆر جودایە لەگەڵ نەینەوا، کەرکوك  بە پێی مادەی 140 پارێزگایەکە کێشەی لەسەرە،  دەبێ ١- ئاسایی بکرێتەوە ٢- سەرژمێريی تێدا ئەنجام بدرێ و ئەوجا گشتپرسيی تێدا ئەنجام بدرێ بۆ یەكلاكردنەوەی ئیدارەی کەرکووك تا دانیشتوانەکەی دەنگ بدەن ئایا لەگەل بەغدا دەبن یان لەگەڵ ھەرێم. لە  10-4-2003 دا پێشمەرگە و دانیشتوانی سەربەرزی کەرکووك، پارێزگای کەرکوکیان ڕزگارکرد، پاشان  هاوپەيمانان ھاتن.لەدوای (16-ئوکتۆبەر-ی 2017) بە پیلان و خیانەتی ژمارەیەک خیانەتکارانی ناو یەکێتی کەرکووك و دووز و خانەقین داگیر کران و تا ئێستا لە بارودۆخێکی زۆر نائاسیی و مەترسیداردان.

بۆچونی پارتی بۆ ئاسایی کردنەوەی کەرکووك بەم شێوەیەيە:
1- دۆسيەى سەربازى (پێشمەرگە و سوپا لە دەرەوەی کەرکوك و قەزا و ناحیەکان  بە ھەماھەنگی بۆ پاراستنی ناوچەکان جێگیر ببن) .

2- دۆسيەى ئەمنی (پاراستنی  ناو شارەکانی کەرکوك و قەزا و ناحیەکانی سەر بە پارێزگای کەرکوك) بدرێتە پۆلیس و دەزگا ئەمنییە خۆجێییەکانی کەرکوك.  بەرپرسیارێتيی بازگەكان بدرێتە بەڕێوەبەرایتی پۆلیسی بازگەكانى کەرکوك، گشت پێکھاتەی پۆلیس و دەزگا ئەمنیە خۆجێییەکان لە خەڵکی کەرکوك بن لە گشت پێکھاتەکان بە پێی ڕێژەی پێکھاتەکانی کەرکوك و، گشت ئەو ھێزانەی دوای خیانەتی (١٦-ی ئوکتۆبەر بۆ کەرکوك ھێنراون) بنێردرێنەوە دەرەوەی سنووری پارێزگای کەرکوك.

٣- دۆسيەى سیاسی:بارەگاکانی پارتی دیموکراتی کوردستان و پارتی گەلی تورکمان کە  تا ئێستا داگیرکراون، چۆڵ بکرێن و بدرێنەوە و، بەربەست بەتەواوەتی لە پێش ئاڵای کوردستان لابدرێت.
کە دۆسییەکانی (1-سەربازی و 2- ئەمنی و 3- سیاسی) بەدروستی و دادپەروەرانە جێبەجی کران ئەوجا دۆسيەى کارگێڕی دەس پێدەکات و ئەندامانی ئەنجومەنی پارێزگا لە کەرکووك دەستبەکار دەبن.  کە ئەنجومەنەکە دەستبەکاربو، بابەتی پارێزگار یەكلا دەکاتەوە، بۆچونی پارتی بۆ ھەڵبژاردنی پارێزگارێك بۆ کەرکوك ئەوەیە کوردێکی نیشتمانپەروەر و کەرکوکیەکی ڕەسەنى بێلایەن بێت، نە پارتی بێت و نە یەکێتی بێت و، زۆرینەی لایەنەکانی دیکەی ناو لیستی برایەتی و لیستی تورکمان و لیستی عارەبی ڕەزامەند بن لەسەر ئەو کاندیدە کە کوردی ڕەسەنی کەرکوکی و بێلایەنی نیشتمانپەروەر بێت و ببێتە پارێزگاری کەرکوك و ئیلتزام بە دەستور و بەیاساوە بکات و بۆ گشت کەرکوك و کەرکوکییەکان کار بکات. ئەمە بۆچونی پارتی دیموکراتی کوردستانە، دروست نیيە کە دەوترێت پارتی نایەڵێت پارێزگارێكى کەرکوکی بۆ کەرکوك دابندرێت! بە پێچەوانەوە ئەوە بۆچونی پارتیە کە داوا دەکات پارێزگاری کەرکوك  دەبێت کەرکوکی بێت، بەڵام بەڵێ ڕاستە  پارتی ڕازی نییە دەنگ بدات بۆ ئەوەی یەکێتیەك ببێتە پارێزگار. ھۆی ئەو بۆچونە بەداخەوە خیانەتی ١٦-ی ئوکتۆبەرە کە ژمارەیەك لە ناو ڕیزەکانی یەکێتی بون ئەنجامیان دا و، بونە ھۆی ئەو ھەموو کارەساتانەی بەسەر دوز و کەرکوك و زۆر شوێنی دیکەی خاکی کوردستانیاندا هێنا.

خەندان: به‌پێی زانیارییه‌كانی ئەو سەرچاوە تایبەتە هه‌ریه‌ك له‌ خه‌میس خه‌نجه‌ر و ئه‌بو مازن و فالح فه‌یاز و مەسعود بارزانی یەکلاکەرەوەبون له‌ رێككه‌وتنی دانانی پارێزگارێكی نوێ بۆ موصڵ، راتان لەو بارەیەوە چی؟

 

کەمال کەرکوکی: پارتی دامەزراوەیە بۆ كاركردن ڕێگای تایبەتی خۆی هەیە و دەزانێت چۆن كار دەكات.

خەندان: ئێوە لەگەڵ پارێزگاری ئێستای كەركوك پەیوەندیەكانیان لە چی ئاستێكدایە، سەرچاوەیەك بۆ خەندان ئاشكرایكردوە كە ماڵی راكان جبوری لە هەولێرەو پەیوەندی ئەمنی لەگەڵ پارتی هەیە، ئایا ئەوە راستە؟

کەمال کەرکوکی: ئێمە  دەیبنین ئەو سەپێنراوە، وەکو پارێزگار نایناسین و بەناو پارێزگار ھیچ مامەڵەى لەگەڵدا ناکەین. بەنیسبەت ئەوەی دەڵێن ماڵی لە هەولێرە  ئەوەش پڕوپاگەندەیە و، دورە لە ڕاستی وەکو و پڕوپاگەندەکانی دیکەیانە، خۆیان ئیتفاقیان کردوە لەگەڵ نەیارانی کورد و ئیمزایان کردوە و لە کەرکوکیەکان و گشت خەڵکی کوردستان شاردویانەتەوە، وەکو دیارە کە لە 16-4-2019  ڕێکكەوتوونە لە خاڵی یەکی ئتفاقییەکەیان دەڵێت ڕاکان وەکو پارێزگار بمێنێتەوە. بۆ؟ ڕاگەیاندنەکانیانیش دەڵێن پارتی ئیتفاقی کردوە ڕاکان وەکو پارێزگار بمێنێتەوە!!! بۆ؟ چونکە خۆیان دەزانن ئەو کارەی کردوویانە  شەرمەزارییە، بۆیە هەوڵ دەدەن خۆیانی لێ ڕزگاربکەن و بیخەنە ئەستۆی پارتی!!! لە خیانەتی (16-ی ئوکتۆبەری 2017) جێگری یەکەمی سکرتێری گشتی وبەرپرسی دەستەی کارگێڕی مەکتەبی سیاسی حزبەکەیان و بەرپرسی یەکەی (70)-ی ھێزی پێشمەرگەی یەکێتی بەئاشکرا وتیان کە ژمارەیەك کاڵفام لەناو یەکێتی سەبەبی ئەو پیلانگێڕیە و ئەو نەھامەتی و داگیرکردنەی دوز و کەرکوك بون کە بەسەر ناوچەکەیاندا ھێنا. بەرپرسی دیکەی دەستڕۆیشتووی ناو خۆیان دەیانگوت ئێمە کردمان و، بەرپرسی دیکەی سەربازی بەشدار بوو لە خیانەتەکە بە ئاشکرا دەيگوت لەگەڵ شاندێك دانیشتم تەنھا یەکیان عێراقی بو. بەرپرسانی عێراقی و ئێرانی بە ئاشکرا باسیان  دەکرد و دەیانگوت سوپاسی باڵێکی ناو یەکێتی دەکەین کە ھاوکار بون ئیتفاقیان لەگەڵمان کرد و وھاوکاری ئێمە بون و  ناوچەکانیان ڕادەستی ئێمە کرد. کەچی دەبینين ئێستا  چی دەڵێن و خۆیان بێتاوان دەردەخەن و و پڕوپاگەندەی جۆراوجۆر دەکەن و ھەوڵ دەدەن لایەنی دیکە تاوانبار بکەن و ڕاستییەکان لە خەڵك بشارەنەوە و ڕونکردنەوەی نادروست دەدەن  تاکو بتوانن خەڵك چەواشە بکەن. بۆیە پێويستە خەڵك ئەو ڕووداوانەیان لەبیر و لەبەر چاو بێ و بەو ھەوڵانەیان باوەڕ نەکەن و نەخەڵەتێن.

خەندان: ئێوە تاچەند لەگەڵ وڵاتانی توركیا و ئێران و قەتەر رێكەوتنتان هەیە كە كار بكەن بۆ ئەوەی بەشێوەیەكی هەمیشەی پۆستی پارێزگاری كەركوك لەژێر دەستی یەكێتی دەربهێنن؟


کەمال کەرکوکی: یەکێتی خۆی پۆستی پارێزگاری کەرکوکی لەدەستى خۆی دەرھێنا و، پێویست ناکات پارتی ھیچ ھەوڵ بدات و ڕێکكەوتنی بۆ بکات،  پارتی پشتی بەگەلی دڵسۆزی کەرکوك و گشت کوردستان زۆر قایمە و گەلیش زۆر دڵسۆز و پاك و بەھێزە و گشت لایەنەکان باش دەزانن پارتی لەگەل گەلە و بۆ گەل کار دەکات.

 



Copyright © 2016 Xendan.org all rights reserved

designed and developed by AVESTA GROUP