عەبدوڵای کوێخا موبارەک: ده‌نگۆ هه‌یه‌ دوای پێكهێنانی حكومه‌ت گۆڕان و یەکێتی رێکبکەون

- 5/21/2019 10:50:00 AM 14482 جار خوێندراوەتەوە

خەندان-

عه‌بدوڵای كوێخا موباره‌ك، هه‌ڵسوڕاوی دیاری بزوتنه‌وه‌ی گۆڕان رایگەیاند، ده‌نگۆ و زانیارییه‌ك هه‌یه‌ یه‌كێتی و گۆڕان ژێر به‌ژێر گفتوگۆ ده‌كه‌ن بۆ ئه‌وه‌ی بگه‌نه‌ رێككه‌وتن، "یه‌كێتی داوا ده‌كات گۆڕان به‌ته‌واوی له‌ پارتی دور بكه‌وێته‌وه‌ و پشتی لێبكات بچێته‌ پاڵ یه‌كێتی"، دەشڵێت، "یه‌كێتی ده‌یه‌وێت هاوسه‌نگی هێز به‌رامبه‌ر پارتی ڕاست بكاته‌وه‌".

ئێمە کاک نەوشیروان وادەبینین کە مەرجەعێکە، کاریزمایەکە و خاوەن فکرێکە، نابێت تێکەڵی هیچ ململانێیەکی نێوخۆیی ناو بزوتنەوەی گۆڕان بکرێت

 

عەبدوڵای کوێخا موبارەک، هه‌ڵسوڕاوی دیاری بزوتنه‌وه‌ی گۆڕان کە ساڵی رابردو دەستلەکارکێشانەوەی لە ئەندامی جڤاتی نیشتیمانی کێشایەوە دەڵێت، "ئێمە کاک نەوشیروان وادەبینین کە مەرجەعێکە، کاریزمایەکە و خاوەن فکرێکە، نابێت تێکەڵی هیچ ململانێیەکی نێوخۆیی ناو بزوتنەوەی گۆڕان و تەنانەت ململانێی نێوخۆیی ناو کوردستانیش بکرێت، دەبێت وەک ماندێلا و غاندی کورد سەیری بکەین، میراتی نەوشیروان مستەفا مێژو، کتێب و فکرەکەیەتی نەک کۆمپانیا و سەروەت و سامان".

ساڵیادی کۆچی دوایی نەوشیروان مستەفا بەلای هەندێک خەڵکەوە دەرفەتێکی گەورە بو بۆ پێکهاتنی هەردو بەرەکە

 

عه‌بدوڵای كوێخا موباره‌ك بە دەنگی ئەمریکای راگەیاندوە، "ساڵیادی کۆچی دوایی نەوشیروان مستەفا بەلای هەندێک خەڵکەوە دەرفەتێکی گەورە بو بۆ پێکهاتنەوەی ئەم دوو بەرەیەی گۆڕان (به‌ره‌ی ده‌سه‌ڵاتی ئێستای گۆڕان، وه‌ به‌ره‌ی ناڕازی گۆڕان)، بەڵام هەندێک لەسەرکردە ناڕازییەکانی ئێستای گۆڕان، کە ئێمە پێکەوەین ئەوان ئەزمونیان زیاترە وە نا ئومێد بون لەوەی کە ئەو بەرەیەی ئێستا دەسەڵاتی گۆڕان بەڕێوە دەبات".

کە چوم هیچ هەڵوێستێک و پێشوازییەکم لێییان نەبینی، بگرە گشتیان ڕویان دەکرد بەو لاوە

 

ئاماژە بەوەشدەکات، "هەندێک لە سەرکردە ناڕازییەکان ڕۆژێک پێشتر بەشدارییان کرد، بەڵام من بۆچونم جیاواز بو وتم هەم ئەمە بکەینە دەرفەتێک و هەم جەماوەرەکەشمان لەوێ ببینین، بەڵام ڕای ئەو برادەرانەی ڕاست دەرچو، من شەخسی خۆم کە چوم هیچ هەڵوێستێک و پێشوازییەکم لێییان نەبینی، بگرە گشتیان ڕویان دەکرد بەو لاوە، مەبەستم ئەوانەی خانەی ڕاپەڕاندن و کوڕەکانی کاک نەوشیروانە، ئەگەرنا ئەوانی تر گەرم و گوڕبون".

ئەوەی من بینیم ئەوەیان لێ نەدەخوێنرایەوە کە ئەو یادە بکەنە دەرفەتی پێکهاتنەوەی هەردوو بەرەکەی گۆڕان

 

عه‌بدوڵای كوێخا موباره‌ك رونیدەکاتەوە، "ئەوەی من بینیم ئەوەیان لێ نەدەخوێنرایەوە کە ئەو یادە بکەنە دەرفەتی پێکهاتنەوەی هەردوو بەرەکەی گۆڕان، تەنانەت من واچوم بە ئامانجی یەکگرتنەوە و پێداچونەوە بە هەڵەی هەردولامان، بەڵام تەنانەت نەک هەر بەدەممەوە نەهاتن بەڵکو ڕەنگە پێشیان ناخۆش بوبێت، ئامانجێکی ترم ئەوە بو کە لەگەڵ جەماوەرەکە کە بە جەماوەری کاک نەوشیروانیان دەزانم لە نزیکەوە یەکتر بیبینین."

یه‌كێتی و گۆڕان گفتوگۆی ژێر بەژێر دەکەن

هەڵسوڕاوە باڵا ناڕازییەکەی گۆڕان باس لەوەدەکات، "دەنگۆیەک هەیە ئەگەر ئەو دەنگۆیە ڕاست بێت ئەوا زۆر لەو یاسای سەرۆکایەتی هەرێمە کارەسات بارترە، کە بە دڵی بنەماڵەی بارزانی بو، ئەویش ئەوەیە کە یەکێتی و گۆڕان ژێر بەژێر گفتوگۆ دەکەن، بزوتنەوەی گۆڕان دەیەوێت بێدەنگەی لێبکات تا حکومەت لەگەڵ پارتی پێکدەهێنێت، پۆست و ئیستحقاقەکەی خۆی وەردەگرێت، بۆ ئەوەی پارتی نیگەران و کاردانەوەی نەبێت تا پلە و پۆستەکانی وەردەگرێت لە حکومەت".

داواکاری یەکێتی دورکەوتنەوەی گۆڕانە لە پارتی و چونە پاڵ یەکێتییە

 

کوێخا موبارەک دەڵێت، "یەکێتی دەیەوێت هاوسەنگی هێز بگەڕێنێتەوە، هەروەک چۆن لە شەڕی ناوخۆ وابو، داواکاری یەکێتی دورکەوتنەوەی گۆڕانە لە پارتی و چونە پاڵ یەکێتیە، داواکاری سەرکردایەتی ئێستای گۆڕانیش ئەوەیە کە لە هەردو بەرەکە بخوات وە مامەڵەکە زیاتر ئێستا لەسەر پارەیە".

به‌دواداچونی وردی بۆ ده‌كه‌ین له‌ ئێستادا تا بگه‌ینه‌ ڕاست و دروستی بابەتەکە

 

لەبارەی ئەوەی ئەو دەنگۆ و بانگەشانە ئایا بنەمای ڕاستی هەیە؟ یان تەنها لەبەر ئەوەی ئێستا تۆ نەیاری سەرکردایەتی ئێستای گۆڕانی وادەڵێیت؟ عەبدوڵای کوێخا موبارەک له‌ وه‌ڵامدا دەڵێت، "نەخێر من نەیاری گۆڕان نیم، بەڵام ئەگەرچی بەڵگە نیە تا ئێستا بەڵام ڕون دەبێتەوە، دەنگۆکە بەم شێوەیەیە، به‌ڵام ئێمه‌ به‌دواداچونی وردی بۆ ده‌كه‌ین له‌ ئێستادا تا بگه‌ینه‌ ڕاست و دروستی، چونكه‌ ئه‌وه‌ ئه‌گه‌ر ڕاست بێت ئه‌و مامه‌ڵه‌كردنه‌ وه‌ك وتم زۆر له‌ ڕازی بوون به‌هه‌مواری یاسای سه‌رۆكایه‌تی هه‌رێم كاره‌ساتبارتره‌".

بەهیچ شێوەیەک ئەوە قبوڵ نیە، کە تەقەکردن لە گردەکە و وێنەی نەوشیروان مستەفا بفرۆشرێتەوە

عەبدوڵای کوێخا موبارەک ئەوەشی وت، "ئەگەر ئەمەی یەکێتی ڕاست بێت، دەبێت بەرەی ناڕازی زوو فریا بکەون و بەرەیەک دروست بکات، تا گۆڕانخوازان پەرتەوازە نەبن گۆڕانخواز بە هیچ شێوەیەک ئەوەی قبوڵ نیە، کە تەقەکردن لە گردەکە و وێنەی نەوشیروان مستەفا بفرۆشرێتەوە، هەندێک قسەو باس سەریهەڵداوە لە نێوان هەردولادا کە گومانەکە ڕاستر دەکاتەوە".



Copyright © 2016 Xendan.org all rights reserved

designed and developed by AVESTA GROUP