بەپەلە

"هەڕەشە" لە ئێران دەکات
ترەمپ: ئەگەر شەڕتان دەوێت، ئەمە کۆتایی ئێوەیە

- 5/20/2019 8:13:00 AM 6374 جار خوێندراوەتەوە

خەندان-

سەرۆکی ویلایەتە یەکگرتوەکانی ئەمریکا هۆشداری دەداتە کۆماری ئیسلامی ئێران و رایگەیاند، ئەگەر ئێران شەڕی دەوێت، ئەوا "ئەمە کۆتایی ئێوەیە".

دۆناڵد ترەمپ، سەرۆکی ویلایەتە یەکگرتوەکانی ئەمریکا لە تویتێکدا لە هەژماری تایبەتی خۆی لە تۆڕی کۆمەڵایەتی تویتەر نوسیویەتی، "ئەگەر ئێران شەڕی دەوێت، ئەوە بەشێوەیەکی فەرمی کۆتایی ئێرانە و هەرگیز جارێکی دیکە هەڕەشە لە ویلایەتە یەکگرتووەکان نەکەنەوە.

تویتەکەی ترەمپ چەند کاتژمێرێک دوای ئەوە هات، کە شەوی رابردو موشەکێک لە نزیک باڵیۆزخانەی وڵاتەکەی لەناوچەی سەوزی بەغدا کەوتە خوارەوە.

گرژیی و ئاڵۆزیەكانی نێوان ئێران و ویلایەتە یەكگرتوەكانی ئەمریكا لە سەرەتای مانگی ئایارەوە زیاتر بوە، دوای ئەوەی جۆن بۆڵتن، راوێژكاری ئاسایشی نیشتیمانی ئەمریكا رایگەیاند، "وڵاتەكەی كەشتی فڕۆكە هەڵگر و هێزی موشەكی رەوانەی رۆژهەڵاتی ناوەڕاست کرد".

پێنجشەممەی رابردو 16ی ئەم مانگە، دۆناڵد ترەمپ، سەرۆكی ویلایەتە یەكگرتوەكانی ئەمریكا لەمیانی پێشوازیكردنی لە ویلی مۆخێخ، سەرۆكی سویسرا، كە یەكێكە لەو وڵاتانەی رۆڵی نێوەندگیر لە نێوان ئێران و ویلایەتە یەكگرتوەكان دەبینێت، رایگەیاند، هیواخوازە وڵاتەكەی لەگەڵ ئێران نەكەوێتە جەنگەوە.


Copyright © 2016 Xendan.org all rights reserved

designed and developed by AVESTA GROUP