وەزارەتی پێشمەرگە هەمو رێكارەكانی ناردنی موچەی جێبەجێكردوە
جەبار یاوەر: مەشقپێکردنی هێزەکانی پێشمەرگە لە لایەن هاوپەیمانانەوە دەستیپێکردەوە

- 5/19/2019 7:49:00 PM 2463 جار خوێندراوەتەوە

خەندان-

ئەمینداری گشتی وەزارەتی پێشمەرگەی حکومەتی هەرێمی کوردستان رایگەیاند، مەشقپێکردنی هێزەکانی پێشمەرگە لە لایەن هاوپەیمانانەوە دەستیپێکردوەتەوە.

جەبار یاوەر، ئەمینداری گشتی وەزارەتی پێشمەرگەی حکومەتی هەرێمی کوردستان بە خەندان-ی راگەیاند، دوای راگرتنی مەشق بە هێزەکانی پێشمەرگە بۆ چەند رۆژێک، بەرەبەیانی ئەمڕۆ مەشقپێکردن بە ‌هێزەکانی پێشمەرگە لە لایەن هاوپەیمانانەوە دەستیپێکردوەتەوە.
ئەو پرۆژەیە هەمو جومگەکانی وەزارەت دەگرێتەوە

 

سەبارەت بە پرۆژەی چاکسازی ریفۆرمی پێشمەرگەی هەرێمی کوردستان وتیشی: ئەو پرۆژەیە هەمو جومگەکانی وەزارەت دەگرێتەوە، ژمارەیەک ئەفسەر کاری لەسەردەکەن و هەندێک لە بابەتەکان کەوتونەتە بواری جێبەجێکردنەوە و هەندێکیشیان ئامادەدەکرێن.

وتیشی: یەکێک لە خاڵەکان مەسەلەی یەکخستنی هێزەکانی پێشمەرگەیە، پرۆژەیەکەئامادەکراوە بۆ داڕشتنی میکانیزمێکی گونجاو بۆ یەکخستنی هێزەکانی پێشمەرگە،لە ئێستاشدا سەرقاڵی گفتوگۆین لەنێوان فەرماندەی ‌هێزەکانی حەفتاو هەشتا، بۆئەوەی  بگەینە داڕشتنێکی کۆتایی بۆ یەکخستنی یەک شێوازی میلاکات لەناو  هێزەکاندا.

بەئەلکترۆنیکردنی پێدانی موچە و ئاڵوگۆڕ لە یەکەکانی نێوان دیوانی وەزارەت و لیواکان کەوتوەتە بواری جێبەجێکردنەوە

 

باسیلەوەشکرد، سەرجەم خاڵەکان کاری لەسەر کراوە و بەشێکیشیان دەستیپێکراوە لەوانەش بەئەلکترۆنیکردنی پێدانی موچە و ئاڵوگۆڕ لە یەکەکانی نێوان دیوانی وەزارەت و لیواکان کەوتوەتە بواری جێبەجێکردنەوە، لەگەڵ مەسەلەی خانەنشینی پێشمەرگە، هەندێک لەخاڵەکانیش پرۆژەن  کاری لەسەر دەکرێت.

سەبارەت بە ناردنی موچەی وەزارەتی پێشمەرگە لەلایەن بەغداوە وتیشی: ئەوان وەک وەزارەت سەرجەم ئەو ڕێکارانەیان جێبەجێكردوە كە لە بودجەی 2019ی عێراق تایبەت بە هێزەكانی پێشمەرگە هاتوە.

جەبار یاوەر، ئاماژەی بەوەشکرد، "کۆتا داواکاری حکومەتی عێراق بۆ ئەوەی موچەی بنێرن، ئەوەبو کە دەبێت ژمارەیەکی بانکی حکومەتی هەرێمی کوردستان بنێرین، بۆئەوەی لەگەڵ بودجەی مانگانەی هەرێمی کوردستان موچەی پێشمەرگەش بنێرن، بەڵام تا ئێستا بەپێی بەدواداچونەکانی ئێمە موچە نەنێردراوە".


نیشانەکردن :

#پێشمەرگە

Copyright © 2016 Xendan.org all rights reserved

designed and developed by AVESTA GROUP