هەواڵی ئەمڕۆ

بەپەلە

"نەوشیروان مستەفا بنکەیەکی جەماوەری گەورەی دروستکرد"
عادل عەبدولمەهدی باس لە خەبات و رۆڵ و پێگەی نەوشیروان مستەفا دەکات

- 5/19/2019 4:06:00 PM 4223 جار خوێندراوەتەوە

خەندان-

عادل عەبدولمەهدی، سەرۆک وەزیرانی عێراق باس لە خەبات و رۆڵی نەوشیروان مستەفا  و دەڵێت، دەیتوانی چەندین دەستکەوت بەدەست بهێنێت، بەڵام ئەو بنکەیەکی جەماوەری گەورەی دروستکرد، کە کوردستان پێویستی پێیەتی و هەمیشە گوزارشتی لە دیدێکی راست و رەوان دەکرد.

عادل عەبدولمەهدی، سەرۆک وەزیرانی عێراق لە پەیامێکدا بۆ دوەمین ساڵیادی کۆچی دوایی نەوشیروان مستەفا رایگەیاند، "نەوشیروان مستەفا پیاوێکی راست و مەبدەئی بو، بیرمەند بو، ئەو گەورەترین پشتوپەنامان بو، لە زۆربەی کاروبارەکاندا پەنامان بۆ دەبرد".

مێژوی دیدارەکانمان دەگەڕێتەوە بۆ ساڵی 1975

ئاماژەی بەوەشکردوە، "دیدارەکان سەرەتا لە ساڵی 1975دا بون، بەزۆریش لە دوای هەرەسهێنانی شۆڕشی کوردی بون، واتە دوای نسکۆی شۆڕشی کوردی و هاتنی شەڕکەران و تێکۆشەرانی کورد بۆ سوریا، دیدارەکان لە سوریا بەڕێوەدەچون، لەو رۆژانەدا یەکێتی نیشتیمانی کوردستان دامەزرا، مامجەلال لەگەڵ کاک نەوشیروان رەحمەتی خوایان لێ بێت، و لەگەڵ سەرجەم برایانی ئازیزی تر، دوای پێکهێنانی یەکێتی نیشتیمانی دیدار و کۆبونەوەکانمان درێژەیان هەبو، لەسەرجەم کایەکانی کاری ئۆپۆزسیۆنی عێراقیداو لە تەواوی کۆنگرەکانی یەکتر بینینمان هەبو لەگەڵ برامان کاک نەوشیروان مستەفا".

دوای گۆڕانکارییەکانی 2003، کاک نەوشیروان لە هەندێککاتدا نوێنەرایەتی یەکێتی و مام جەلالی دەکرد لە ئەنجومەنی حوکمدا

عادل عەبدولمەهدی دەگێڕێتەوە، "لە دوای گۆڕانکارییەکانی 2003، کاک نەوشیروان لە هەندێکاتدا نوێنەرایەتی یەکێتی و مام جەلالی دەکرد لە ئەنجومەنی حوکمدا، لەو کاتانەشدا یەکترمان دەبینی، لە میانی ئەو جەنگە ناوخۆییەدا لە ساڵانی 1994 تا 1996 لە هەرێمی کوردستان رویدا، کۆبونەوەو دیداری زۆرمان هەبو، ئێمە لەو کاتەدا لە ئەنجومەنی باڵا نێوەندگیریمان دەکردو منیش بەرپرسی لقی کوردستانی ئەنجومەنی باڵای ئیسلامی و نوێنەری بەڕێز محەمەد باقر حەکیم بوم لە کوردستان، بۆیە کە سەردانم دەکرد دەچومە ماڵی خوالێخۆشبو نەوشیروان مستەفا". 

ماڵەکەیم زۆر بە باشی لە بیرە، خانویەکی زۆر سادە لەسەر بەرزاییەک دروستکرابو، ئێمە لە ژورێکی سادە دادەنیشتین

عادل عەبدولمەهدی نوسیویەتی، "ماڵەکەیم زۆر بە باشی لە بیرە، خانویەکی زۆر سادە لەسەر بەرزاییەک دروستکرابو، ئێمە لە ژورێکی سادە دادەنیشتین، کۆمەڵێک پەلەوەر لە حەوشەی ماڵەکەیدا هەبو، ئەوەشم لە بیرە کە کتێبخانەیەکی زۆر باشی هەبو، بەڕاستی زۆر ئاسودە بوم لە گفتوگۆکاندا، رای جیاواز یان هاودەنگ دەبوین لەسەر بابەتێک. پەیوەندییەکانمان بەردەوام زۆر بەهێز بو، لەسەردەمی شەڕی ناوخۆدا گفتوگۆ و راگۆڕینەوەی زۆرمان هەبو لەبارەی چۆنێتی راگرتنی ئەو شەڕەو گەیشتن بە ئەنجامێک".

ئەوەشی خستوەتەڕو، "لە ساڵی 1978دا لەکاتی دامەزراندنی بنکە سەرەتاییەکاندا لە کوردستان لە ناوچەی ناوزەنگ، سنورەکانمان بڕی لە تورکیاوە دواتریش لە ئێرانەوە، عومەر مستەفا (عومەردەبابە)، کەمال خۆشناو، فوئاد مەعسوم و د.خدری برای فوئاد مەعسوم و من، لە شاری سنەوە سنورەکانمان بڕی بۆ ناوخۆی عێراق".

سەرۆک وەزیرانی عێراق باسی لەوەشکردوە، "ئەوکاتە شۆڕشی ئیسلامی لە ئێران هەڵگیرسابو، کاتێک گەیشتینە بنکەکە نەوشیروان مستەفاش لەوێبو، هەریەکە لە نەوشیروان مستەفاو عادل موراد و کۆمەڵێک برای تر بون، هەندێک وێنەی ئەوکاتەمان هەیە، هەندێکیانم بڵاوکردوەتەوە لە فەیسبوک کە لە ژورێکدا لەگەڵ برام کاک نەوشیروانین، منیش جلوبەرگی کوردیم لەبەردایەو وێنەکان هەن و عومەر شێخ موس-یشمان لەگەڵ بو".

مێژو پڕەو هەمو ئەو مێژوە کارمان کردوە کە لەساڵانی حەفتاکانەوە دەست پێدەکات تا کاتی کۆچکردنی خوالێخۆشبو

عادل عەبدولمەهدی دەشڵێت، "مێژو پڕەو هەمو ئەو مێژوە کارمان کردوە کە لەساڵانی حەفتاکانەوە دەست پێدەکات تا کاتی کۆچکردنی خوالێخۆشبو، تەنانەت پێش سەفەرکردنی بۆ لەندەن، کۆبونەوەیەکی دورودرێژم لەگەڵ خوالێخۆشبو ئەنجامدا لەبارەگای بزوتنەوەی گۆڕان".

یەکەم چاپخانە کە یەکێتی هێنای بۆ ناو عێراق من لە بەیروت بۆم کڕین

لەبارەی روداوەکانی ئەو کاتی عێراق عادل عەبدولمەهدی، هاوڕێی نەوشیروان مستەفا نوسیویەتی، "لەراستیدا هەمو ئەو رۆژانە پڕبون لە روداو و یادەوەری و چالاکی زۆر، لە سەرەتای دامەزراندنی یەکێتیدا ئێمە هاوکارییەکی زۆری یەکێتیمان کرد، ئێمە چەندین رێکخستنمان هەبو لەناوەوەی عێراق، بۆ نمونە یەکەم چاپخانە کە یەکێتی هێنای بۆ ناو عێراق من لە بەیروت بۆم کڕین، یەکەم وێستگە کە هات بۆ یەکێتی بۆ ماوەیەک لە ماڵەکەی مندا بو لە دیمەشق، کاتێک هێزەکانی بەرپەرچدانەوە چونە لوبنان، چەندین جار پێکەوە چوین بۆ کارکردن، من و مام جەلال چەکێکی زۆرمان کۆکردەوەو رەوانەی قامیشلیمان کرد، لەوێشەوە بەرەو تورکیا رەوانە کران و دواتریش گەیەنرانە دەستی بنکەکانی پێشمەرگە لە ناوخۆی عێراق".

وتیشی، "بڵاوکردنەوەی یەکەم نوسراو و بڵاوکراوەکانی یەکێتی، ئێمە هاوکارییەکی زۆرمان دەکردن بۆ گەیاندنی بە شوێنی مەبەست، بەتایبەت بڵاوکراوەکانی کۆمەڵە بۆ ناوچە جیا جیاکانی عێراق".

تائێستاش گۆڕستانی شەهیدەکانمان لە کوردستان بونیان ماوە

سەرۆک وەزیرانی عێراق رونیشی دەکاتەوە، "دوای جێگیربونی دۆخی یەکێتی لە کوردستان، ئەوکاتە من کرامە بەرپرسی ئەنجومەنی باڵا لە کوردستان، ئەوکاتە بەناوی ئەنجومەنی باڵاو رێکخراوی بەدرەوە دەجوڵاینەوە، چەندین چەکدارمان هەبو لە رێکخراوی بەدر کە لە ناوچەی قەرەداغ جێگیر بون، تائێستاش گۆڕستانی شەهیدەکانمان لەوێن و لە چەند شوێنێکی کوردستان بونیان ماوە. لەوێ یەکێتی نیشتیمانی زۆر بە تەواوی ئێمە لە خۆگرت".

نەوشیروان مستەفا گەورەترین پشتوپەنامان بو، لە زۆربەی کاروبارەکاندا پەنامان بۆ دەبرد

عادل عەبدولمەهدی دەڵێت، "نەوشیروان مستەفا گەورەترین پشتوپەناو هاوکارمان بو، ئێمە لە زۆربەی کاروبارەکاندا پەنامان بۆ دەبرد بۆ هاوکاریکردن و پشتیوانی کردنمان، لەو رۆژانەدا گرنگترین شت پارێزگاریکردن بو لە خۆت، لەگەڵ بەهێزکردنی توانا سەربازییەکان و چۆنێتی سەرقاڵ کردنی رژێم، هەروەها چۆنێتی بەهێزکردنی پەیوەندییەکانی نێوان هێزە ئۆپۆزسیۆنەکان و بەرەنگاربونەوەی رژێم، بۆیە کارکردن زۆر گران بون".

چەندین جار لە مام جەلالم بیستوە کە باشترین قەڵەم لە کوردستاندا نەوشیروان مستەفایە

لە درێژەی گێڕانەوەکەیدا عادل عەبدولمەهدی دەڵێت، "نەوشیروان مستەفا یەکێک بو لەو پیاوە کەم و سەرەکییانەی کە بە پەنجەکانی دەست دەژمێردران، لە بنیاتنانی ئەو کارانە لە روی فکری و خەباتگێڕییەوە، پیاوێکی زۆر سادەو مەیدانی بو، بەڵام خاوەنی فکرێکی پێشکەوتنخواز بو، من کوردی بە باشی نازانم، بەڵام چەندین جار لە مام جەلالم بیستوە کە باشترین قەڵەم لە کوردستاندا نەوشیروان مستەفایە، بەڕاستی ئەو نوێنەری مام جەلال بو، کاتێک ئەو ئامادە نەبوایە دو کەس ئامادە بون، نەوشیروان مستەفا و عادل موراد".

تائێستاش گۆڕستانی شەهیدەکانمان لەوێن و لە چەند شوێنێکی کوردستان بونیان ماوە

عادل عەبدولمەهدی لە وەسفی نەوشیروان مستەفادا باسی لەوەکردوە، "ئەو هەمیشە بەرگری لە دید و بۆچونەکانی خۆی دەکرد، زۆر سەرقاڵی کاروباری کۆمەڵەو یەکێتی بو، بۆیە گەڕایەوە بۆ هەرێمی کوردستان، رۆڵی زۆر گەورەی بینی، هەمیشە بەشدارییەکانی گرنگ و پێویست بون و ناوەڕۆکەکانی لە ئاستێکی باڵادا بون، قسەکانی ئەو تەنها بۆ دەست بەرز کردنەوە نەبون تەنها بۆ ئەوەی قسە بکات، هەمیشە کۆمەڵێک دەستەواژەی گرنگی دەوروژاند، ئیتر هاوڕای بویتایە یان نا کێشە نەبو بە لایەوە، بەڵام بابەتی زۆر هەستیار و گرنگ و ورد بون و جێگەی سەرنج بون".

نەوشیروان مستەفا زۆر راشکاوانە قسەی دەکرد و هیچ کێشەیەکی نەبو

"نەوشیروان مستەفا زۆر راشکاوانە قسەی دەکرد و هیچ کێشەیەکی نەبو لەگەڵ بەرامبەرەکانی، وەکو عەرەب دەڵێت، کێشەی نەبو تۆ هاوڕای بی یان هاوڕای و هاوڕێی نەبی، ئەو قسەی خۆی دەکردو باوەڕو بۆچونی چۆن بوایە قسەی لەبارەوە دەکردو کێشەی نەبو"، عادل عەبدولمەهدی واینوسیوە.

 کەسێکی سادە بو، ئەو سادەییەی زۆر هەستی پێدەکرا، راست بو لە فکرەکانی خۆیدا

زیاتر دەشڵێت، "نەوشیروان مستەفا پیاوێکی راست و مەبدەئی بو، مەبدەئی و واقعی، ئەو راستیەشی لەسەر ئەو بنەمایە بو کە ئەو پیاوێکی بیرمەند بو، هەمیشە بیر دەکاتەوە دەیەوێت ئەوەی پێیەتی بیگەیەنێت، هەروەک چۆن پێغەمبەرەکان کە پەیامیان بۆ دەهات پێویست بو بیگەیەننە خەڵک، ئەویش لەسەر رێگایەکی راست بو لەژیانیدا و کەسێکی سادە بو، ئەو سادەییەی زۆر هەستی پێدەکرا، راست بو لە فکرەکانی خۆیدا". 

کاک نەوشیروان قورسترین ئەرکەکانی گرتە ئەستۆی خۆی

جەختلەوەش دەکاتەوە، "کاک نەوشیروان قورسترین ئەرکەکانی گرتە خۆی، لەسەردەمی رژێمدا، ئەرکی شەڕکردن و خەباتی چەکداری پڕ لە مەترسی گرتەئەستۆ، چونکە ئەو پیاوی بیروباوەڕ و مەبدەئی بو".

دەیتوانی چەندین دەستکەوت بەدەستبهێنێت، بەڵام ئەو بنکەیەکی جەماوەری گەورەی دروستکرد کە کوردستان پێویستی پێیەتی

عادل عەبدولمەهدی لە کۆتایی پەیامەیدا بۆ نوسیویەتی، "دواتریش کاتێک گۆڕانکاری رویداو بزوتنەوەی گۆڕان دروست بو، لەسەر مەبدەئیەت بەردەوام بو، ئەو دەیتوانی چەندین دەستکەوتی سیاسی بەدەستبهێنێت، بەڵام ئەو بنکەیەکی جەماوەری گەورەی دروستکرد، کە کوردستان پێویستی پێیەتی، رێکدەکەویت یان جیاواز دەبیت لەگەڵ گۆڕان ئەوە بابەتێکە، بەڵام گۆڕان بوەتە پێویستیی بۆ بونی دەنگ و رەنگی جیاواز لە هەرێمی کوردستاندا".


Copyright © 2016 Xendan.org all rights reserved

designed and developed by AVESTA GROUP