هەواڵی ئەمڕۆ

بەپەلە

ئەمڕۆ دوەم ساڵیادی کۆچی دوایی نەوشیروان مستەفا-یە

- 5/19/2019 10:11:00 AM 2524 جار خوێندراوەتەوە

خەندان-

ئەمڕۆ دو ساڵ بەسەر کۆچی دوایی نەوشیروان مستەفا ئەمین تێدەپەڕێت، بڕیارە ئێوارەی ئەمڕۆ لە گردی زەرگەتەی شاری سلێمانی بە سەردانکردنی مەزارەکەی یادی بکرێتەوە.

شەماڵ عەبدولوەفا، ئەندامی لیژنەی پاراستنی ئەرشیفی نەوشیروان مستەفا بە خەندان-ی راگەیاند، "ئەمڕۆ یەکشەممە کاتژمێر 7:00 لەسەر ئارامگای نەوشیروان مستەفا کۆمەڵێک چالاکی جۆراوجۆر بەڕێوەدەچێت و یادەکەش یادی خەڵکە و هیچ لایەنێک بانگهێشت نەکراوە".
یادەکە کۆمەڵایەتییە و حزبی نییە، هیچ کەسێک بانگهێشت نەکراوە، مەنەسە و وتار خوێندنەوەی تێدا نییە

 

ئاماژەی بەوەشکرد، "یادەکە یادێکی کۆمەڵایەتییە و حزبی نییە و هیچ کەسێک بانگهێشت نەکراوە، مەنەسە و وتار خوێندنەوەی تێدا نییە، تەنها خەڵک بەشدار دەبێت و لەگەڵ ئەوەشدا هەندێک چالاکی میدیایی نمایش دەکرێت و سەردانی ئارامگەکەی دەکرێت".

دو ساڵ لەمەوبەر، كاتژمێر 8:00ی بەیانی 19-5-2017 دوای ململانێیەكی زۆر لەگەڵ نەخۆشی نەوشیروان مستەفا ئەمین لە ماڵەكەی خۆیدا لە سلێمانی كۆچی دوایی كرد، رۆژی دواتریش لە 20-5-2017 لەسەر وەسیەتی‌ خۆی‌ لە گردی‌ زەرگەتەی‌ سلێمانی‌ بەخاك سپێردرا.

نەوشیروان مستەفا ئەمین ساڵی 1944 لە گەڕەکی سەرشەقام (بەرخانەقا)ی شاری سلێمانی لە دایک بوە، خوێندنی سەرەتایی و ناوەندی و دواناوەندی لە سلێمانی تەواو کردوە.
ساڵی 1967 کۆلێژی زانستە سیاسییەکانی لە زانکۆی بەغدا تەواو کردوە

 

ساڵی 1967 کۆلێژی زانستە سیاسییەکانی لە زانکۆی بەغدا تەواو کردوە، لە سەرەتای حەفتاکان چوەتە نەمسا و ماستەری لەیاسای نێودەوڵەتی لە نەمسا خوێندوە.
نەوشیروان مستەفا سەرەتای شەستەکانی سەدەی رابردو دەستی بە کار و چالاکی سیاسی کردوە

 

نەوشیروان مستەفا سەرەتای شەستەکانی سەدەی رابردو دەستی بە کار و چالاکی سیاسی کردوە و یەکەم وێستگەی ژیانی سیاسی لە یەکێتی قوتابیانی کوردستان بوە، ساڵانی 1963 و 1964 بوەتە ئەندامی سکرتاریەتی یەکێتی قوتابیان.

ساڵی 1967 بوەتە ئەندامی لقی سلێمانی- پارتی دیموکراتی کوردستان، ساڵی (1969) خاوەن ئیمتیازی گۆڤاری رزگاری بوە، یەکێک بوە لە دامەزرێنەرانی یەکێتی نیشتیمانی کوردستان لە ساڵی 1975.
نەوشیروان مستەفا سکرتێری کۆمەڵەی رەنجدەرانی کوردستان بوە، تا ساڵی 2006 جێگری سکرتێری گشتی یەکێتیی بوە

 

نەوشیروان مستەفا سکرتێری کۆمەڵەی رەنجدەرانی کوردستان بوە، تا ساڵی 2006 جێگری سکرتێری گشتی یەکێتیی نیشتمانی کوردستان بوە، ساڵی 2006 وازی لە کاری حیزبی لە نێو یەکێتی ھێنا.
 چەندین کتێبی لە بواری سیاسی و مێژویی و ئەدەبی هەیە

 

ساڵی 2007 نەوشیروان مستەفا کۆمپانیای وشەی دامەزراند، ساڵی 2009 بۆ ھەڵبژاردنی پەرلەمانی کوردستان لیستی گۆڕانی دروست کرد، چەندین کتێبی لە بواری سیاسی و مێژویی و ئەدەبی هەیە.

نەوشیروان مستەفا لە ساڵی (1981) ژیانی هاوسەریی لەگەڵ خاتو (شوعلەی عەلی) پێکهێناوە و باوکی دو کوڕ و کچێکە بەناوەکانی نما و چیا و چرا.


Copyright © 2016 Xendan.org all rights reserved

designed and developed by AVESTA GROUP