هەواڵی ئەمڕۆ

بەپەلە

سه‌رۆكایه‌تی په‌رله‌مانی كوردستان راگەیەندراوێکی بڵاوکردەوە

- 5/18/2019 7:37:00 PM 9761 جار خوێندراوەتەوە

خەندان-

سەرۆکایەتی پەرلەمانی کوردستان راگەیەندراوێکی سەبارەت بەیەکەمین هەڵبژاردنی پەرلەمانی کوردستان بڵاوکردەوە و دەڵێت: ئەزمونی دیموکراسی سەلماندی کە گەلی کوردستان نەک هەر توانای ئیدارەدانی خۆی هەیە، بەڵکو ئەزموونەکەی بوەتە نمونەی پێکەوەژیان و فەزای ئازادو دیموکراسی و ئازادی دەربڕین لە ناوچەیەک کە هەمو ئەو بنەمایانە ونن و هەمویان لەخەوی شەڕو گەڕانەوەی مۆنۆپۆلن".

لە راگەیەندراوەکەدا كە وێنەیەكی گەیشتۆتە خەندان، پەرلەمانی کوردستان ئاماژەی بەوەشکردوە، ئەو ڕۆژە سەرەتای قۆناغێکی نوێ بو لە بزوتنەوەی رزگاریخوازیی کوردستان، لە یەکەمین ئەزمونی رزگاریی میللەتی کوردستان، راستەوخۆ پەنای بۆ ئامڕازە دیموکراسییەکان برد بۆ یەکلاییکردنەوەی رکابەرییەکان و پێشڕەوایەتی و ئیدارەکردن و مافی گفتوگۆکرن لەپێناو بەرژەوەندیی گەل و وڵات.

سەرۆکایەتی پەرلەمانی کوردستان دەشڵێت: "لەو رۆژەوە بناغەی دەوڵەتداری و جیاکردنەوەی دەسەڵاتەکان جاڕدرا، وەڵامی هەمو ئەوانه‌ش درایەوە کە پێیان وابو گەلی کوردستان ناتوانێت ئیدارەی خۆی بکات و شارەزایی پێشکەوتنەکانی نییە، بەڵام ئەزمونە دیموکراسییەکەمان بۆ دۆست و دوژمنان سەلمێندرا، کە گەلی کوردستان نەک هەر توانای ئیدارەدانی خۆی هەیە، بەڵکو ئێستا ئەزمونەکەمان بوەتە نمونەی پێکەوەژیان و فەزای ئازادو دیموکراسی و ئازادی دەربڕین لە ناوچەیەک کە هەمو ئەو بنەمایانە ونن و هەمویان لەخەوی شەڕو گەڕانەوەی مۆنۆپۆلن".
پێویستە هەموان پابەندبین بە رێکارە یاسایی و دیموکراسییەکان، بۆ چارەسەری گرژی و ناکۆکییەکان

 

ئەوەش رونکراوەتەوە: "پەرلەمان دەبێت هەمیشە بەشێک بێت لە چارەسەر بۆ سەرجەم لایەنەکان و چەتری کۆکەرەوەى گشت لایه‌نه‌كان و قوڵترکردنەوەی گیانی کاری پێکەوەیی و قوڵترکردنی کەلتوری دیموکراسی و دیالۆگ و بەرزڕاگرتنی بەرژەوه‌ندیی گەل و نیشتیمان لەسەروو هەمو بەرژەوەندییەکانی دیکەوە بێت".

سەرۆکایەتی پەرلەمان پابەندبوونی تەواو خۆی بە رێکارە یاسایی و دیموکراسییەکان دەکاتەوە، بۆ چارەسەری گرژی و ناکۆکییەکان و دەڵێت:" پێویستە هەموان پابەند بین بەو بنەمایانە بۆ مامەڵەکردن و دەرفەتی زیاتری پێکەوەیی بون، هەموان هەوڵی پەرەپێدانی زیاتری دیمواکرسی و هەڵبژاردن و ئازادیی زیاتر بدەین بە پێگیریبون بە بنەما یاساییەکان و پێشێلنەکردنی ماف و ئازادییەکان، بۆئەوەی هەمیشە کوردستانەکەمان گەشاوەتر بێت و هەر بە نمونەی دورگەیەکی ئارام لەنێو دەریایەکی شەڕ بمێنێتەوە".


نیشانەکردن :

#پەرلەمانی کوردستان

Copyright © 2016 Xendan.org all rights reserved

designed and developed by AVESTA GROUP