بەپەلە

"چاکسازی و پاکسازی پێویستیەکی گرنگی قۆناغەکەیە"
کۆسرەت رەسوڵ: هەمومان تەواوکەری یەکترین و کەس بەتەنها هیچی پێناکرێ

- 5/16/2019 4:52:00 PM 1895 جار خوێندراوەتەوە

خەندان-

جێگری سکرتێری گشتی یەکێتی رایگەیاند، پێویستە هەموان پێکەوە هەوڵبدەین و خەبات بکەین یەکێتی بەهێز بکەین، یەکێتی هێزێکە جێگای هەمو تێکۆشەران و دڵسۆزانی تێدا دەبێتەوە.

ئەمڕۆ پێنجشەممە بەسەرپەرشتی کۆسرەت رەسوڵ، جێگری سکرتێری گشتی و ئامادەبونی لێپرسراوی مەکتەبی پەیوەندییە گشتیەکان ولێپرسراوی هەر پێنج بەشەکەی مەکتەبی پەیوەندییەکان کۆبونەوەی فراوانی ئەنجومەنی ناوەندی لە هۆڵی شازاد سائیب لە مەکتەبی سياسى بەرێوەچو.

بەپێی راگەیەندراوێكی كۆبونەوەكەكە وێنەیەكی گەیشتۆتە خەندان، کۆسرەت رەسول عەلی، جێگری سکرتێری گشتی وتەیەکی پێشکەشکرد و بەبۆنەی ساڵیادی کۆچی دوایی عادل موراد سکرتێری پێشوی ئەنجومەنی ناوەندی ئاماژەی بەڕۆڵ و خەباتی دورو درێژی عادل موراد لە کوردایەتی و شۆڕشی نوێی گەلی کوردستان بە ڕابەرایەتی یەکێتیی نیشتمانیی کوردستان کرد.

جێگری سکرتێری گشتی راشیگەیاند " یەکێتی هێزێکە جێگای هەمومانی تێدا دەبێتەوەو ڕێزو شکۆو پێگەی هەمومانیش بە یەکێتیەوەیە، بۆیە دەبێ بەهێزتری بکەین و گەشەی پێ بدەن."

رونیشیکردەوە"چاکسازی و پاکسازی پێویستیەکی گرنگی قۆناغەکەیەو پێویستە هەمولایەک لەمڕوەوە لە ئاستی بەرپرسیارێتی خۆیدا ئەرکەکانی جێەجێ بکات، هاوکات جەختی لە چەسپاندنی دادپەروەری کۆمەڵایەتی کردەوە و ڕاشیگەیاند "یەکێتی ناو یەکێتی بپارێزین و هەمومان تەواوکەری یەکترین و کەس بەتەنها هیچی پێناکرێ".

لای خۆشیەوە سەعدی ئەحمەد پیرە وتی: پەیوەندییەکانی ئەمریکا و ئیران ئاڵۆزتر بوە و پێویستە سەرکردایەتی کورد بێ لایەنانە مامەڵە بکات و کوردستان نەبێتە مەیدانی شەڕ و یەکلایکردنەوەی کێشەکان.

سەعدی پیرە وتیشی:" جەختیی لە رێککەوتنە سیاسی و ئیدارییەکەی نێوان یەکێتی وپارتی کردوە کە هاوتەریب لەگەڵ پێکهێنانی کابینەی نوێ رێوشوێنەکان بۆ دانانی پارێزگارێک لە پشکی یەکێتی بۆ کەرکوک دەگیرێتەبەر".


Copyright © 2016 Xendan.org all rights reserved

designed and developed by AVESTA GROUP