شەڕڤانان هەڵمەتی دەستگیرکردنی چەکدارانی داعشیان لە سوریا دەستپێکرد

- 5/16/2019 12:40:00 PM 2318 جار خوێندراوەتەوە

خەندان-

هێزەکانی سوریای دیموکرات (هەسەدە) لە ناوچەی دێرەزوری رۆژهەڵاتی سوریا هەڵمەتێکی دەستگیرکردنی چەکدارانی داعشی دەستپێکردوە و تا ئێستا دەیان ئەندامی ئەو رێکخراوەیان دەستگیرکردوە.
چەند رۆژێکە هەسەدە لەسەر روباری فورات هەڵمەتێکی دەستگیرکردنی پاشماوەکانی داعش و رێکخستنەکانیان دەستپێکردوە

 

بەپێی هەواڵێکی ئەلعەرەبیە، چەند رۆژێکە هێزەکانی سوریای دیموکرات (هەسەدە) لە ناوچەی دێرەزوری رۆژهەڵاتی سوریا و بەتایبەتی ناوچەی سوهەیل، لەسەر روباری فورات هەڵمەتێکی دەستگیرکردنی پاشماوەکانی داعش و رێکخستنەکانیان دەستپێکردوە و تا ئێستا توانیویان 20 چەکداری سەر بەو رێکخراوە دەستگیربکەن، هاوکات جگە لە دەستگیرکردنی ئەو چەکدارانە، دەستیان بەسەر ژمارەیەک پارچە چەکی قورس و سوکدا گرتوە.
تا ئێستا دو تونێلی داعش دۆزاونەتەوە کە پێداویستی و کەرەستەی سەربازی تێدابوە
لەراگەیەندراوێکدا هەسەدە بڵاویکردوەتەوە، بەرەبەیانی ئەمڕۆش هێزەکانیان هەڵمەتی دەستگیرکردنی چەکدارانی داعشیان دەستپێکردوەتەوە، تا ئێستا دو تونێلیان دۆزیوەتەوە، کە پێداویستی و کەرەستەی سەربازی تێدابوە و لە رێگەیەوە هێرشیان کردوەتە سەر دامەزراوەکان و خۆیان تێدا حەشارداوە.

هەفتەی رابردوش هێزەکانی سوریای دیموکرات (هەسەدە) بە سەرپەرشتی هێزەکانی ئەمریکا هەڵمەتێکی گەڕان و پشکنین بەدوای پاشماوەکانی داعش و چەکدارەکانیان دەستپێکرد، هەڵمەتەکە بوە جێگای ناڕەزایی بەشێک لەخەڵکی ناوچەکە و بەهۆیەوە گرژی و ئاڵۆزی دروستبو کە بوە هۆی کوژرانی هەشت کەس.

23ی مانگی ئازاری ئەمساڵ شەڕڤانانی هێزەکانی سوریای دیموکرات (هەسەدە) سەرکەوتنی تەواوەتیان بەسەر داعشدا لە باغۆز راگەیاند

پاش کۆنتڕۆڵکردنی تەواوی ناوچەکانی ژێر دەسەڵاتی داعش لەناوچەی دێرەزوری سوریا، ناوبەنا هێزەکانی هەسەدە هەڵمەتی دەستگیرکردنی پاشماوەی چەکدارانی داعش ئەنجامدەدەن.


Copyright © 2016 Xendan.org all rights reserved

designed and developed by AVESTA GROUP