ئێران: سەرەڕای کشانەوەی ئەمریکا، هێشتا پابەندین بەرێکەوتنە ئەتۆمییەکە

- 5/16/2019 11:30:00 AM 4626 جار خوێندراوەتەوە

خەندان-
وەزیری دەرەوەی ئێران رایگەیاند، تا ئەوپەڕی دانبەخۆداگرتن دانیان بەخۆیاندا گرتوە و سەرەڕای کشانەوەی ئەمریکاش ئەوان پابەندن بەرێکەوتنە ئەتۆمییەکەی ساڵی 2015 ەوە.

 سەپاندنەوەی سزاکان قبوڵکراو نیە

 

بەپێی هەواڵێکی ئاژانسی رۆیتەرز، لەمیانەی پێشوازیکردنی لە هاوتا ژاپۆنییەکەی لە تارانی پایتەختی کۆماری ئیسلامی ئێران، موحەمەد جەواد زەریف، وەزیری دەرەوەی ئێران رایگەیاندوە، سەرەڕای کشانەوەی ئەمریکا هێشتا پابەندن بە رێکەوتنە ئەتۆمییەکە، بەڵام سەپاندنەوەی سزاکان "قبوڵکراو نیە."
 
ئەم لێدوانەی زەریف لەکاتێکدایە کە دوێنێ سێشەممە کۆماری ئیسلامی ئێران بەشێوەیەکی فەرمی رایگەیاند، پابەندبونی خۆی بە بەشێک لە رێککەوتنە ئەتۆمییەکە رادەگرێت و دەستدەکاتەوە بەپیتاندنی یۆرانیۆم.

زەریف وتیشی، ئێران لە ماوەی رابردودا بەپێی بڕگەو بابەتەکانی رێککەوتنە ئەتۆمییەکەی 2015 ی نێوان وڵاتەکەی و وڵاتانای دیکەی گەورەو کاریگەری دونیا پیتاندنی یۆرانیوم و بەرهەمهێنانی ئاوی قورسی کەمکردۆتەوە.

ئەو گرژیی و ئاڵۆزییانەی ویلایەتە یەکگرتوەکانی ئەمریکا دروستیکردوە جێگای قبوڵکردن نیە

 

وەزیری دەرەوەی ئێران راشیگەیاند، ئەو گرژیی و ئاڵۆزییانەی ویلایەتە یەکگرتوەکانی ئەمریکا دروستیکردوە جێگای "قبوڵکردن نیە"و وڵاتەکەی روبەروی هەر هەڕەشەو مەترسییەک دەبێتەوە.

ئایاری 2018 ئەمریكا لە رێككەوتنە ئەتۆمیەكەی نێوان وڵاتەكە و ئێران و ژمارەیەك وڵاتی زلهێز كشایەوە

 

مانگی ئایاری ساڵی 2018، ویلایەتە یەكگرتوەكانی ئەمریكا لە رێككەوتنە ئەتۆمیەكەی نێوان وڵاتەكە و ئێران و ژمارەیەك وڵاتی زلهێز كشایەوە و داوایكرد دوبارە سزاكان بەسەر ئێراندا بسەپێندرێت.

ئامانج لەو رێككەوتنە كە هەریەك لە وڵاتانی فەڕەنسا و بریتانیا و ئەڵمانیا و روسیا و چین و ویلایەتە یەكگرتوەكان و ئێران-ی تێدابو، رێگریكردن بو لە گەشەپێدانی چەكی ئەتۆمی وڵاتەكەی بەرامبەر بە هەڵگرتنی ئەو سزایانەی ئابوریەكەی روخاندبو.

پاش کشانەوەی ئەمریکا لەرێکەوتنەکە، بەشێک لەوڵاتانی کاریگەری ئەوروپا لەنێوانیاندا هاوپەیمانە نزیکەکانی وەک بریتانیا و ئەڵمانیا و فەرەنسا لەناو رێکەوتنەکە مانەوە و پشتگیرییان کرد.


نیشانەکردن :

#ئێران_ئەمریكا

Copyright © 2016 Xendan.org all rights reserved

designed and developed by AVESTA GROUP