كازم فاروق پەنا دەبات بۆ دادنوس
شادی نەوزاد هێرش دەكاتە سەر سەرۆكی فراكسیۆنی نەوەی نوێ لە پەرلەمانی كوردستان

- 5/15/2019 10:20:00 PM 23232 جار خوێندراوەتەوە

خەندان-

شادی نەوزاد، ئەندامی پەرلەمانی كوردستان لە فراكسیۆنی نەوەی نوێ رایدەگەیەنێت، لەجیاتی ئەوەی سەرۆکی فراکسیۆنی نەوەی نوێ، بەرگریی ئەخلاقی و یاسایی و پیشەیی لە ئەندامانی فراکسیۆنەکەی بکات، کەچی زۆر نابەرپرسانە هەرەشەی دورخستنەوەم لە فراکسیۆن لێدەکات.

شادی نەوزاد لە راگەیەندراوێكدا كە وێنەیەكی بۆ خەندان ناردوە و نامەیەكی دادنوسی لەگەڵدایە رایدەگەیەنێت، "كازم فاروق" سەرۆكی فراكسیۆنی نەوەی نوێ لەبری ئەوەی وەک سەرۆکی فراکسیۆن، بەرگریی ئەخلاقی و یاسایی و پیشەیی لە ئەندامانی فراکسیۆنەکەی بکات و بەگژ ئەوانەدا بچێتەوە، کە هەرەشە لە ئەندامانی فراکسیۆنەکەی دەکەن و بوختانیان بۆ دەکەن، هەروەکچۆن بە بەرچاوی خۆیەوە، هەرەشە لە ئەندامانی فراکسیۆنەکەمان و خودی خۆشی کراوە و ئەویش لەژێر هەرەشەی ئەو باندە سیاسییەدایە و لە کۆبونەوەی ئەمدواییەی فراکسیۆنەکەشماندا ئەم هەڕەشانەی نەشاردوەتەوە، کەچی زۆر نابەرپرسانە و لەرێگەی دادنوسەوە، نامەیەکی نایاسایی و هەڕەشەئامێزی ئاراستەکردوم"

شادی نەوزاد دەشڵێت، "سەرۆكی فراكسیۆن هەرەشەی دورخستنەوەم لە فراکسیۆن لێدەکات، ئەگەر بێتو بەشداری کۆبونەوەی فراکسیۆنەکەمان لە ئۆفیسی سەرەکی "نەوەی نوێ"دا نەکەم، ئەمە لە کاتێکدا ئەو جێگایە بۆ من و چەند ئەندامێکی تری فراکسیۆنەکەمان جێگای متمانە نیە".

ئەو پەرلەمانتارە دەشڵێت،"خۆ ئێمە فیرارمان نەکردوە و لە ئەشکەوت خۆمان نەشاردۆتەوە تا سەرۆکی فراکسیۆن بچێت لە رێگەی دادنوسەوە ھەڕەشە بکات و داوای کۆبونەوە لە شوێنێکی گوماناوی نائەمین بکات".

شادی نەوزاد دەشڵێت، "سەرۆکی فراکسیۆنێک هێندە نەزان بێت بەرامبەر یاسا، لەرێگای دادنوسەوە هەرەشە لە پەرلەمانتارێک بکات و هێندە بێ هەڵوێست بێت بەرگری لە هاوپیشەکانی نەکات، کە لە لایەن سەرۆکی حزبەکەوە کراوینەتە ئامانج، ئەی چۆن بەرگری لە هاوڵاتیان دەکات لە بەرامبەر دەسەڵاتدا؟".



Copyright © 2016 Xendan.org all rights reserved

designed and developed by AVESTA GROUP