بەپەلە

هەفتەی جیهانی دەروندروستی
پسپۆڕێک: هۆشیاری دەروندروستی لە هەرێمی کوردستان لە بەرزبونەوەدایە

- 5/15/2019 4:52:00 PM 1205 جار خوێندراوەتەوە

خەندان-

ئەم هەفتەیە، هەفتەی جیهانی دەروندروستیە و پسپۆڕێکی رێنمایی دەرونیش دەڵێت، لەهەرێمی کوردستان هۆشیاری دەروندروستی رۆژ بە رۆژ لە بەرزبونەوەدایە و هاوڵاتیان زیاتر گرنگی بە تەندروستی دەرونیان دەدەن.
 
تەها حسێن، پسپۆڕی ڕێنمایی دەرونی لەبارەی هۆشیاری دەروندروستی بۆ خەندان وتی"رۆژی دەروندروستی هیچ کەمتر نییە، لە رۆژی تەندروستی جیهانی، چونکە کاتێک باس لە مرۆڤ دەکرێت، دو بەشی سەرەکییە بەشێکی جەستەیە و بەشێکی دەرونییە، بۆیە ئەگەر ئێمە لایەنی دەرونیمان تەواو نەبێت ئەوا مرۆڤێکی کامڵ نین".

ئاماژەی بەوەشکرد، بابەتی دەروندروستی لە تەواوی دنیادا گرنگی تەواوی پێدراوە، لە ئێستاشدا لە بەشێکی گرنگی نەخۆشیە جەستەییەکاندا حسابی بۆ دەکرێت، چونکە ئەگەر کەسێک نەخۆشی جەستەیی هەبێت، دەرمان وەربگرێت، نەخۆشی دەرونی هەبێت، ئەوا دەرمانەکە کاریگەری ناکاتە سەر جەستەی.

ئەو پسپۆڕەی رێنمایی دەرونی باسیلەوەشکرد،"دەروندروستی لە جیهاندا بوەتە  بابەتێکی جیهانی و کۆنفرانسی زانستی بۆ دەکرێت و ساڵانە چەندین کۆڕوکۆبونەوە لەو وڵاتانە دەکرێت بەمەبەستی هۆشیارکردنەوەی دەرونی کەسەکان، لە کوردستانیش لە دوای ساڵی 2005 ەوە زیاتر گرنگی پێدراوە و ساڵ لەدوای ساڵیش زیاتر گرنگی پێدەدرێت لەلایەن هاوڵاتیانەوە".

سەبارەت بە بونی ئامارێکی ورد لە کوردستان ئەو پسپۆڕەی دەرونناسی وتی،"لەبەرئەوەی ژمارەی سەنتەرەکان زۆرن، بۆیە داتایەکی ورد لەبەردەستدا نییە، بەڵام دەتوانین بڵێین رۆژانە 20 بۆ 25 نەخۆش سەردانی پزیشکی دەرونی دەکەن بۆ چارەسەر".
 سەنتەرەکان رۆڵی بەرچاویان هەبوە لە هۆشیارکردنەوەی خەڵکیدا

 

سەبارەت بە رۆڵ و گرنگی سەنتەرە دەرونییەکان ئەو پسپۆڕە دەرونیە رونیکردەوە، سەنتەرەکان رۆڵی بەرچاویان هەبوە لە هۆشیارکردنەوەی خەڵکیدا، چونکە ئەو سەنتەرانە تەنها بۆ بینینی نەخۆش نیە، بەڵکو چەندین ۆرکشۆپ و سیمینارو و پرۆگرامیان ئەنجامداوە، جگە لەوەش و بەرنامەیان لەگەڵ تەلەفزیۆنەکان ئەنجامداوە و رۆڵێکی بەرچاویان هەبوە.

لە ویلایەتە یەکگرتوەکانی ئەمریكا ساڵانە نزیكەی نیوەی ئەو کەسانەی تەمەنیان لەسەرو 18 ساڵەوەیە، کە دەکاتە نزیکەی لە 46.4% لە ژیانیاندا روبەڕوی نەخۆشی دەرونی دەبنەوە، هاوکات نیوەی نەخۆشیە دەرونیەكان لە تەمەنی 14 ساڵیدا دەستپێدەكەن و سێ چارەكی نەخۆشیەكانیش لە تەمەنی 24 ساڵیدا.

لەسەدا پێنجی پێگەیشتوان (سەرو 18 ساڵ) لە ساڵێكدا جارێك روبەڕوی نەخۆشی دەرونی دەبنەوە، كە دەكاتە 43.8 ملیۆن كەس، ئەو كەسانەی كە لەماوەی ساڵێكدا روبەڕوی نەخۆشی دەرونی دەبنەوە، رێژەی لە %14.4 یەك نەخۆشیان هەیە، %5.8 دو نەخۆشی و %6 یش سێ نەخۆشی و زیاتریان هەیە.
لە ساڵی رابردودا لە ئەمریكا تەنها  لە %41 ی ئەو کەسانەی کە نەخۆشی دەرونیان هەبوە خزمەتگوزاری تەندروستی دەرونیان پێگەیشتوە

 

لە ساڵی رابردودا لە ئەمریكا تەنها  لە %41 ی ئەو کەسانەی کە نەخۆشی دەرونیان هەبوە خزمەتگوزاری تەندروستی دەرونیان پێگەیشتوە.

هاوکات لە وڵاتانی ئەوروپا، ساڵانە لە 25%ی دانیشتوانی ئەوروپا بەدەست نەخۆشی دەرونیەوە دەناڵێنن، نەخۆشیە دەماریە دەرونیەكان لە %19.5ی نەخۆشیەكانی ناوچە ئەوروپیەكان و لە سەدا %26ی نەخۆشیەكانی یەكێتی ئەوروپا نەخۆشیەكان پێكدەهێنێت، سەر و لە سەدا 50ی نەخۆشیە دەرونیەكانیش بەهۆی خەمۆكیەوەیە.


Copyright © 2016 Xendan.org all rights reserved

designed and developed by AVESTA GROUP