"دەستگیرکراوانی نەوەی نوێ بە هیچ شێوەیەک ئەشکەنجە نەدراون"
دادگای سلێمانی: ھیچ دەقێکی یاسایی نییە رێگەبدات دانپێدانانی تۆمەتباران بڵاوبکرێتەوە

- 5/12/2019 2:36:00 PM 5728 جار خوێندراوەتەوە

خەندان-

وتەبێژی دادگای سلێمانی رایگەیاند، بەبڕیاری دادوەر و دادگا وێنەی ئەندامانی نەوەی نوێ پیشان نەدراوە و "دادگا بە هیچ جۆرێک ئاگاداری ئەو بابەتە نەبوە" دەشڵێت، "ھیچ دەقێکی یاسایی نییە رێگەبدات دانپێدانانی تۆمەتباران بڵاوبکرێتەوە".
بە هیچ جۆرێک دادگا ئاگاداری بڵاوکردنەوەی وێنەی ئەو کەسانە نەبوە

 

حاکم عومەر ئەحمەد، وتەبێژی دادگای سلێمانی ئەمڕۆ لە لێدوانێکی تایبەتدا بە خەندان-ی راگەیاند، "بە هیچ جۆرێک دادگا ئاگاداری بڵاوکردنەوەی وێنەی ئەو کەسانە نەبوە و لە ‌هیچ یاسایەکیشدا نەهاتوە، کە رێگە بدرێت، وێنەی تۆمەتبار بڵاوبکرێتەوە".

وتەبێژی دادگای سلێمانی ئاماژەی بەوەشکرد، ئەوان پێشتر لێکۆڵینەوەیان لەگەڵ تۆمەتبارانی نەوەی نوێ کردوە.

هەینی رابردو 10ی ئەم مانگە، دەزگای ئاسایشی هەرێم دانپێدانانی پێنج دەستگیرکراوی نەوەی نوێی بڵاوکردەوە، كە لەسەر سکاڵای شادی نەوزاد، ئەندامی فراکسیۆنی نەوەی نوێ لە پەرلەمانی کوردستان دەستگیركرابون.
سەرۆکی دادگای تێهەڵچونەوە قسەی لەگەڵ ئاسایش کردوە

 

سەبارەت بەوەی کە ئایا لەگەڵ ئاسایشدا قسەیان نەکردوە سەبارەت بەبڵاوبونەوەی ئەو وێنانە حاکم عومەر ئەحمەد وتی، "سەرۆکی دادگای تێهەڵچونەوە قسەی لەگەڵ کردون لەو بارەیەوە"، بەڵام ئامادەنەبو هیچ قسەیەکی لەسەر بکات.
تا ئێستا لەسەر روداوەکە 11 کەسی دەستگیرکراوە

 

رونیکردەوە "تا ئێستا لەسەر روداوەکە 11 کەس دەستگیرکراوە، لەسەر ئەو دۆسیەیە و سەرجەمیان لێکۆڵینەوەیان لەگەڵدا کراوەو دادوەری لێکۆڵینەوە بڕیار لەسەر سزاکانیان دەدات".
بە هیچ شێوەیەک ئەشکەنجە نەدراون، هەمو کەسێکێش دەتوانێت بیانبینێت

 

سەبارەت بە ئەشکەنجەدانی زیندانیکراوان وتەبێژی دادگای سلێمانی ئەوەی خستەڕو، "بە هیچ شێوەیەک ئەشکەنجە نەدراون، هەمو کەسێکێش دەتوانێت بیانبینێت، ئەگەر کەسێک دەڵێت وانییە و رێگەیپێنەدراوە بیانبینێت با داوەری لێکۆڵینەوە یان دادگای تێهەڵچونەوە ئاگاداربکاتەوە".


Copyright © 2016 Xendan.org all rights reserved

designed and developed by AVESTA GROUP