پەمەیی یاخود پیرۆزەیی؛ لە راستیدا رەنگی پێڵاوەكە كامیانە

- 5/8/2019 11:36:00 AM 13768 جار خوێندراوەتەوە

خەندان-

دو ساڵ لەمەوبەر بابەتی رەنگی پێڵاوێك بوە جێگەی مشتومڕی بەكارهێنەرانی تۆڕە كۆمەڵایەتیەكان و تا ئێستاش ئەو مشتومڕە بەردەوامی هەیە، لەكاتێكدا هەندێك پێڵاوەكە بە پیرۆزەیی و رەساسی دەبینن و هەندێكی دیكە بە پەمەیی و سپی.

هەندێك بە پیرۆزەیی و رەساسی و هەندێكی دیكە بە پەمەیی و سپی دەیانبینی

 

دوای ئەوەی بەكارهێنەرێكی تویتەر بە ناوی @TFILDOLANS وێنەی پێڵاوێكی بڵاوكردەوە، كە هەندێك بە پیرۆزەیی و رەساسی و هەندێكی دیكە بە پەمەیی و سپی دەیانبینی، وێنەكە بەشێوەیەكی خێرا بەناو تۆڕە كۆمەڵایەتیەكاندا بڵاوبوەوە و بو بە جێگەی مشتومڕ لەناو خەڵكدا.

واڵاس تۆریسن، پرۆفیسۆرێكی پزیشكی بەشی چاو و بینینە لە زانكۆی نێبراسكا، دوای ئەو مشتومڕەی لەسەر گۆڕانی رەنگەكان لە یەكێكەوە بۆ یەكێكی دی دروستبو، بەشێوەیەكی گشتی لەوبارەیەوە رونكردنەوەی دا بە بەكارهێنەرانی تۆڕە كۆمەڵایەتیەكان.

بۆ بڕیاردان لەسەر بینینی رەنگی تەنێك چاوەكان پابەندن بە مێشكەوە، بۆ ئەوەی رەنگەكە ببینین مێشك رەنگی روناكی چواردەوری تەنەكە بە هەند وەردەگرێـت

 

تۆریسن دەڵێت، "بۆ بڕیاردان لەسەر بینینی رەنگی تەنێك چاوەكان پابەندن بە مێشكەوە، بۆ ئەوەی رەنگەكە ببینین مێشك رەنگی روناكی چواردەوری تەنەكە بە هەند وەردەگرێـت، لەكاتێكدا روناكی چواردەوری ئەو تەنەی دەیبینین لەگەڵ روناكی و رەنگی تەنەكانی چواردەوریشیدا هەمویان كاریگەری لەسەر شێوازی بینینەكە دەكەن و ئەوەش لە كەسێكەوە بۆ كەسێكی دیكە دەگۆڕیت".

سەبارەت بە رەنگی ئەو پێڵاوە، "ئەو گروپەی بە رەنگی پەمەیی و سپی دەیبینن، مێشكیان روناكی چواردەوری پێڵاوەكە بە رەنگی شین دەبینێـت، گروپەكەی دیكە كە بە پیرۆزەیی رەساسی دەیبینن مێشكیان روناكی چواردەوری پێڵاوەكە بە رەنگی سپی دەبینێـت، ئەوە سەرەڕای ئەوەی رەنگی ئەو دەستەی پێڵاوەكەی هەڵگرتوە كاریگەری لەسەر رەنگەكان هەیە"، بەشێك لە خەڵكیش بەهۆی ئەو كاریگەریە نەستیانەی هەیانە راستەوخۆ پێیانوابوە رەنگی قەیتانەكان بە گشتی سپیە.

ناتوانین لەنێوان ئەو دو رەنگەدا بڕیار لەسەر رەنگێكی دیكە بدەین، بۆیە یەكێكە لەو دو رەنگە

 

ئەوە شتێكی ئاساییە و تۆریسن دەڵێت "ناتوانین لەنێوان ئەو دو رەنگەدا بڕیار لەسەر رەنگێكی دیكە بدەین، بۆیە یەكێكە لەو دو رەنگە"، ئەوەش هاوشێوەی ئەو بابەتەیە كە 450 هەزار كەس لەسەر رەنگەكەی Buzzfeed دەنگیاندا، بەڵام نزیكەی لەسەدا 87ی دەنگدەران دەنگیان لەسەر رەنگە هەڵەكە دابو.

رەنگی راستەقینەی پێڵاوەكە پەمەیی و سپیە

 

پاش ئەوەی پێلاوەكە بەشێوەیەكی خێرا و فراوان بوە جێی مشتومڕ، بەكارهێنەرێكی تویتەر بەناوی ئاڵیشا هەستا بە دانانی وێنەی پێڵاوەكە و رایگەیاند "رەنگی راستەقینەی پێڵاوەكە پەمەیی و سپیە" بەڵام بەهۆی ئەوەی لەرێگەی بەكارهێنانی فلاشەوە رەنگەكەی كەمێك تاریك كراوە لای هەندێك كەس بە پیرۆزەیی و رەساسی دەیبینن، ئەوەش پابەندە لەسەر ئەو رەنگەی تۆ لە چواردەوری پێڵاوەكەدا دەیبینیت.

هاوكات هۆبەی خزمەتگوزاری بەشداربوان-ی ئەو كارگەیەی پێڵاوەكە دەفرۆشێت، رایگەیاند كارگەكەیان پێڵاوی بە رەنگی پیرۆزەیی و قەیتانی رەساسی بەرهەمنەهێناوە، بەڵام ئەگەر دەتانەوێت دەتوانن داواكاریبكەن بەو رەنگانەش بەرهەمبهێنرێت.

پرۆفیسۆر تۆریسن دەڵێت، "ئەگەر تۆ رەنگی پێڵاوەكە بە پیرۆزەیی و رەساسی دەبینیت ئەوە شتێكی ئاساییە، چاوەكانت هیچ كێشەیەكیان تێدا نیە و جیاوازی لە بینیی رەنگەكاندا هەمو كاتێك واتای ئەوە نیە كەسێك توانای بینینی لە كەسێكی دیكە باشترە".



Copyright © 2016 Xendan.org all rights reserved

designed and developed by AVESTA GROUP