رێکەوتنەکە کرا و سەرۆکی ھەرێم لە دو جێگر زیاتری نابێت
سەرۆکی ھەرێم بڕیاردەدات کام لە جێگرەکانی دەسەڵاتی سەربازی و ئەمنی لابێت

- 5/7/2019 3:44:00 PM 13768 جار خوێندراوەتەوە

خەندان-

پارتی، یەکێتی و گۆڕان دوای گفتوگۆیەکی چڕ گەیشتنە رێککەوتن لەبارەی بڕگەی ئاماژەدان بە چەندایەتی و چۆنایەتی دیاریکردنی جێگرانی سەرۆکی هەرێمی کوردستان، خەندان زانیویەتی، لە دوا رێنوسی رەشنوسی پێشنیازکراوی یاساکەدا داخوازیەکانی هەر سێ لایەنە سەرەکیەکە بەشێوەی "نە شیش بسوتێت نە کەباب" جێگیرکراوە.

بەپێی زانیاریە تایبەتەکانی خەندان، دوای مشتومڕی فراکسیۆنەکانی پارتی و یەکێتی و گۆڕان ئەمڕۆ هەر سێ حزبە سەرەکیەکە گەیشتونەتە خاڵی هاوبەش لەبارەی چەندایەتی و چۆنایەتی دیاریکردنی جێگرانی سەرۆکی هەرێمی کوردستان، کە پێشتر هەریەکەیان پێشنیازێکیان لەوبارەیەوە هەبو.
سەرۆکی هەرێم جێگری دەبێت، بەمەرجێک لە دو جێگر تێنەپەڕێت

 

خەندان زانیویەتی، لە دوا رێنوسی رەشنوسی پێشنیازکراوی یاسای سەرۆکایەتی هەرێمی کوردستاندا بە سێ بڕگە باسی جێگری سەرۆکی هەرێم کراوە و تیایدا هاتوە، "سەرۆکی هەرێم جێگری دەبێت، بەمەرجێک لە دو جێگر تێنەپەڕێت، دەسەڵاتی جێگرەکان لەلایەن سەرۆکی هەرێمەوە دیاریدەکرێت".

سەرۆکی هەرێم لە روی یاساییەوە پابەند نیە بە دانانی دو جێگر

 
پڕۆژە یاساکە سەرۆکی هەرێمی کوردستان پابەند ناکات، کە دو جێگری هەبێت، شارەزایەکی یاسایی کە لێکدانەوەی تایبەتی لەوبارەیەوە بۆ خەندان کرد وتی، "سەرۆکی هەرێم لە روی یاساییەوە پابەند نیە بە دانانی دو جێگر، بەڵام بنەبڕکراوە، کە نابێت سەرۆکی هەرێم لە هیچ حاڵەتێکدا دو جێگر زیاتری هەبێت"، ئەوەش نیگەرانیەکانی یەکێتی و گۆڕانی رەواندەوە، کە مەترسیان هەبو لەوەی پارتی جێگرێکی دیکە بۆ سەرۆکی هەرێم زیادبکات.

پێشتر خەندان لە راپۆرتێکدا بڵاویکردبوەوە، پارتی دەیەوێت پرسی دیاریکردنی جێگرانی سەرۆکی هەرێمی کوردستان بە کراوەیی بهێڵێتەوە، ئەوەش لە پێناو پێدانی جێگرێکی سەرۆکی هەرێم بە تورکمانەکانی کوردستان.

سەرۆکی هەرێمی کوردستان دیاریدەکات کام لە جێگرەکان دەسەڵاتی سەربازی و ئەمنی لادەبێت

 

هەربەپێی رێنوسی رەشنوسی پێشنیازکراوی یاسای سەرۆکایەتی هەرێم، سەرۆکی هەرێمی کوردستان دیاریدەکات کام لە جێگرەکان دەسەڵاتی سەربازی و ئەمنی لادەبێت و کامیان دەسەڵاتی ئیداری لادەبێت.
لە رێککەوتنی پارتی، یەکێتی و گۆڕاندا لەبارەی جێگرانی سەرۆکی هەرێمی کوردستان خواستی هەرسێ لایەن بەدیهێنراوە

 
لە رێککەوتنی پارتی، یەکێتی و گۆڕاندا لەبارەی جێگرانی سەرۆکی هەرێمی کوردستان خواستی هەرسێ لایەن بەدیهێنراوە، بۆ پارتی ئەو داوایە بەدیهات کە جێگرەکان، سەرۆکی هەرێم ئەرکەکانیان دیاری دەکات، داواکەی یەکێتیش بۆ ئەوەی دو جێگری زیاتر نەبێت پەسەندکرا، هاوکات یەکلاییکردنەوەی دەسەڵاتی جێگرەکان لەلایەن سەرۆکی هەرێمەوە کە داوای گۆڕان بو پەسەندکرا.

یەکێتی و گۆڕان لە داوای وەرگرتنی جێگر بۆ کاروباری سەربازی پاشەکشەیان کرد

 
بەڵام بەپێی رێنوسی رەشنوسی پێشنیازکراوی یاسای سەرۆکایەتی هەرێم، یەکێتی و گۆڕان لە داوای وەرگرتنی جێگر بۆ کاروباری سەربازی پاشەکشەیان کرد، بەتایبەت کە ئێستا سەرۆکی داهاتو دیاریدەکات کامیان ئەو پۆستە وەردەگرن.

لەناو یەکێتیدا شێخ جەعفەر شێخ مستەفا کاندیدی بەهێزە بۆ وەرگرتنی پۆستی جێگری سەرۆکی هەرێم

 
زانیاریە تایبەتەکانی خەندان ئاماژە بەوەدەکەن، لەناو یەکێتیدا شێخ جەعفەر شێخ مستەفا کاندیدی بەهێزە بۆ وەرگرتنی پۆستی جێگری سەرۆکی هەرێم لە پشکی ئەو حزبە، کە ئەوەش راستەوخۆ چانسی وەرگرتنی جێگری سەرۆک بۆ کاروباری سەربازی زیاتر دەکات، بەهۆی ئەوەی ناوبراو بەرپرسی هێزەکانی 70ی یەکێتییە. 



Copyright © 2016 Xendan.org all rights reserved

designed and developed by AVESTA GROUP