"دەسەڵاتی سەربازی لای جێگرەكەی گۆڕان دەبێت"
شۆڕش حاجی: پارتی بەڵێنی نەداوە دەسەڵاتی هێزە چەكدارەكان لای یەكێتی بێت

- 5/6/2019 10:32:00 AM 5913 جار خوێندراوەتەوە

خەندان-

شۆڕش حاجی، ئەندامی خانەی راپەڕاندنی بزوتنەوەی گۆڕان رایگەیاند، پارتی جەختی کردەوە بەڵێنی وای نەداوە دەسەڵاتی هێزە چەكدارەكان لای جێگرەكەی یەكێتی ده‌بێت و "ئەو دەسەڵاتانە لای جێگرەكەی گۆڕان دەبێت".

شۆڕش حاجی، ئەندامی خانەی راپەڕاندنی بزوتنەوەی گۆڕان بە دەنگی ئەمریکای راگەیاندوە،  "ئێمە پێشتر لەگەڵ پارتی رێککەوتنمان واژۆ کردوە، بەڵام پاش رێککەوتنی پارتی و یەکێتی، یەکێتی داوای هەندێک پۆستی کردبو ئەوەش بە ئێمە راگەیەنرا، ئێمەش کاتی خۆی بوچونمان لەسەر ئەو داواکارییانەی یەکێتی بە پارتی ڕاگەیاندبو، هەرئەوەی کاک نێچیرڤان بارزانیش لە کۆنگرە ڕۆژنامەوانیەکە ڕایگەیاندبو هاتون بۆ سوپاس کردنی بزوتنەوەی گۆڕان کە نایەنەوێت ببنە هۆکاری دواکەوتنی پێکهێنانی حکومەتی هەرێمی کوردستان".

بەلای ئێمەوە پلەو پۆست هێندە بایەخی نیە بەئەندازەی ئەوەی بتوانین هه‌رچی زوه‌ حکومەت پێکبهێنین

 
ئاماژەی بەوەشکرد، "بەلای ئێمەوە پلەو پۆست هێندە بایەخی نیە بەئەندازەی ئەوەی بتوانین هه‌رچی زوه‌ حکومەت پێکبهێنین و ئەو پاکێجە چاکسازییەی کە لەبەرژەوەندی خەڵکی کوردستان و موچەخۆر و هێزەکانی پێشمەرگە و یەکخستنەوەی هێزەکانی پێشمەرگە پلەو پۆستە جێبەجێ بکەین، ئێمە وتومانە با تەرکیزمان لەسەر پاکێجی چاکسازی و بەنیشتمانی کردنی هێزەکانیی پێشمەرگە و هێزەکانی ناوخۆ بێت".

هەڵوێستی ئێمە زۆر رونە و پارتی-ش لە کۆبونەوەکەدا جەختیان کردەوە کە هیچ گۆڕانکارییەک بەسەر ئەو رێککەوتنەی نێوان گۆڕان و پارتی-دا نایەت

 

لەبارەی ئەوەی ئایا پێداچونەوە بە رێککەوتنی نێوان پارتی و گۆڕان-دا دەکرێت شۆڕش حاجی وتی، "هەڵوێستی ئێمە زۆر رونە و پارتی-ش لە کۆبونەوەکەدا جەختیان کردەوە کە هیچ گۆڕانکارییەک بەسەر ئەو رێککەوتنەی نێوان گۆڕان و پارتی-دا نایەت و ئەو پشکانەی دراون بەگۆڕان هیچ کەم ناکرێتەوە."

لە دانیشتی دوێنێماندا لەگەڵ پارتی وتمان پێمان باشە کە قسە لەگەڵ برایانی کۆمەڵی ئیسلامی بکەن

 

ئەندامەکەی خانەی راپەڕاندنی گۆڕان وتیشی، "لە دانیشتی دوێنێماندا لەگەڵ پارتی وتمان پێمان باشە کە قسە لەگەڵ برایانی کۆمەڵی ئیسلامی بکەن، بۆ ئەوەی برایانی کۆمەڵی ئیسلامیش بێنە ناو ئەو حکومەتەوە، ئەوەی پەیوەندی هەیە بە زیادکردنی جێگرێک بۆ پۆستی سەرۆکی هەرێم ئەوەمان زۆر بە وردی لەگەڵ برایانی پارتی باسکردوە، ئەو بەڵێنەی کە کاتی خۆی لەکاتی واژۆکردنی ڕێککەوتنەکەمان لەگەڵ پارتی سەبارەت بە ئەرک و دەسەڵاتەکانی جێگری سەرۆکی هەرێم ئەوانە جەختیان لێ کردوەتەوە و ئێمەش ئەوەمان جارێکی تر تەئکید لێ کردەوە".

"تەئکید-ێکی تریشمان کردەوە لەسەر پاکێجە چاکسازییەکان و لەسەرو هەموشیانەوە نەهێشتنی یەکەکانی 70 و 80 و هێزە تایبەتیەکان"، شۆڕش حاجی وایوت.

نامانەوێت ببینە ئاستەنگ لەبەردەم پێکهێنانی حکومەتی هەرێمی کوردستان

 

لە وەڵامی پرسیاری ئەوەی ئێوە ڕازی بون کە جێگرێکی دیکە بۆ سەرۆکی هەرێم زیادبکرێت و بدرێتە یەکێتی؟ شۆڕش حاجی وتی، "بەڵێ، چونکە ئێمە وتومانە نامانەوێت ببینە ئاستەنگ لەبەردەم پێکهێنانی حکومەتی هەرێمی کوردستان، بەلای ئێمەوە گرنگ جێ بەجێکردنی ناوەڕۆکی ڕێککەوتنەکەیە لەمەڕ پاکێجی چاکسازی و بەنیشتمانی کردن و یەکخستنەوەی هێزەکان، ئەوەش وەک ئەرکێکی نیشتمانی خۆمان لەپێناو بەپەلە پێکهێنانی حکومەتی هەرێم".

بەهیچ جۆرێک ئەو بڕیارە نەدراوە کە دەسەڵاتی هێزە چەکدارەکان بدرێتە جێگرەکەی سەرۆکی هەرێم لە پشکی یەکێتی

 

ئەوەشی خشتەڕو "بەهیچ جۆرێک ئەو بڕیارە نەدراوە کە دەسەڵاتی هێزە چەکدارەکان بدرێتە جێگرەکەی سەرۆکی هەرێم لە پشکی یەکێتی، پارتی بەڵێنی وای بە یەکێتی نەداوە و دوێنێ-ش لەکۆبونەوەکە جەختی کردەوە کە ئەو بەڵێنەی نەداوە و بەو داواکاریەی یەکێتی ڕازی نەبوە، تەنها بەزیادکردنی جێگرێک بۆ یەکێتی ڕازی بوە".

شاندی پارتی  تەئکیدییان لەوە کردەوە، کە قسەکەی ئێمە مەنتق و ڕەوایی تێدایە

 

شۆڕش حاجی رونیشیکردەوە، "شاندی پارتی  تەئکیدییان لەوە کردەوە، کە قسەکەی ئێمە مەنتق و ڕەوایی تێدایە، وتمان ناکرێت و ناشێت ئێمە ئەگەر سێ لایەن بین لەناو حکومەتی هەرێم، وەزارەتی ناوخۆ لای پارتی بێت، وەزارەتی پێشمەرگەش لای یەکێتی بێت و یەکێک لە جێگرەکانیش ئەرکی کاروباری سەربازی پێبدرێت کە لەپارتی یان یەکێتی بێت"، بۆیە دەسەڵاتە سەربازیەکان لای جێگرەکەی گۆڕان دەبێت.

سەبارەت بە ئەنجامدانی کۆبونەوەی سێ قۆڵی  شۆڕش حاجی وتی، "لەکۆبونەوەکەی دوێنێ لەگەڵ پارتی جەختمان لەوەکردەوە کە بۆ سەرخستنی ئەم حکومەتە وا چاکترە وپێویستیشە دوای ڕێککەوتنی تەواوی نێوان پارتی و یەکێتی هەرسێ لامان کۆببینەوە، بۆ دانانی بەرنامەی ئایندەی حکومەتی هەرێمی کوردستان و رێککەوتن لەسەر پابەندبونمان بە ئەنجامدانی ئەو بەرنامەیەی حکومەتی هەرێم."


نیشانەکردن :

#یەکێتی #پارتی #گۆڕان

Copyright © 2016 Xendan.org all rights reserved

designed and developed by AVESTA GROUP