خەندان شیکاریەکی تایبەت لەبارەی کۆنگرەی رۆژنامەوانی پارتی و گۆڕان بڵاودەکاتەوە

- 5/5/2019 7:29:00 PM 8840 جار خوێندراوەتەوە

خەندان-

پارتی و گۆڕان ئەمڕۆ دوایین کۆبونەوەیان لەبارەی پێکهێنانی کابینەی نۆیەمی حکومەت لە سلێمانی ئەنجامدا، پارتی بە "کۆبونەوەی سوپاس" ناویبرد و گۆڕانیش وەک داواکاری باسی لە یەکخستنەوەی هێزەکانی پێشمەرگە کرد.

تێبینی خەندان لێرەدا ئەوەیە، پێشتر گۆڕان رایگەیاندبو، ئەو بزوتنەوەیە لەگەڵ پارتی رێککەوتنێکیان کردوە سەبارەت بە چاکسازی و یەکخستنی هێزی پێشمەرگە، بەڵام ئەوەی لەو کۆنگرە رۆژنامەوانیەکە جێگەی سەرنج بو، وتەبێژیەکەی پارتی وتی، "بۆ سوپاس هاتوین" و وتەبێژەکەی گۆڕانیش وتی، "داوامان کردوە"، کە هیچکام لەم دەربڕینانە پشتڕاستکردنەوە نەبون بۆ رێککەوتن لەسەر چاکسازی و رێکخستنەوە و یەکخستنەوەی پێشمەرگە.

ئەمڕۆ شاندێکی باڵای پارتی، سەردانی سلێمانی کردو وەک پێشتر خەندان رایگەیاندبو، شاندی پارتی سەرەتا چوە گردی زەرگەتە و لەگەڵ شاندی ئەو بزوتنەوەیە کۆبوەوە و دوای کۆبونەوەکەش هەریەکە لە مەحمود محەمەد، وتەبێژی پارتی و شۆڕش حاجی، ئەندامی خانەی راپەڕاندنی بزوتنەوەی گۆڕان ناوەڕۆکی کۆبونەوەکەیان بۆ رۆژنامەنوسان ئاشکراکرد.

"کۆبونەوەی ئەمڕۆ تەنها بۆ سوپاسکردنی گۆڕان بو"

 

مەحمود محەمەد، وتەبێژی پارتی رایگەیاند، کۆبونەوەی ئەمڕۆیان لەگەڵ بزوتنەوەی گۆڕان تەنها بۆ سوپاسکردنی ئەو بزوتنەوەیە بوە، کە رەزامەندبون لە دانانی جێگرێکی دیکە بۆ سەرۆکی هەرێمی کوردستان وەک یەکێتی داوایکردبو.

وتەبێژەکەی پارتی ئاماژەی بەوەشکرد، "کە لەگەڵ یەکێتی کەوتینە گفتوگۆکردن لەسەر بابەتی پۆستەکان، پەیوەندیەک پەیدابو سەبارەت بەو داواکاریەی یەکێتی دەیکرد، لەگەڵ ئەو رێکەوتنەی پارتی لەگەڵ گۆڕان کردبوی، بە سوپاسەوە گۆڕان تەفەهومی دۆخەکەی کرد بۆ خێراترکردنی پێکهێنانی حکومەت و بەو داخوازیە رازی بو، ئەمڕۆ زیاتر بۆ ئەوە هاتبوین بە برادەرانی گۆڕان بڵێین ئێمە ئەم تەفەهومە لە روانگەیەکی دیکەوە سەیری دەکەین، ئەویش بە خەمەوە بونی پڕۆسەکەیە بەخەمەوە بونی چارەسەرکردنی کێشەکانە لەلایەن گۆڕانەوە".

هەرچەندە پارتی لەو بابەتەدا سوپاسی بە خەمەوە بونی گۆڕانی کرد بەشێوەیەکی راستەوخۆ، بەڵام بەشێوەیەکی ناڕاستەوخۆ بە رای گشتی وت، کە "ئەوە گۆڕان بوە لەمپەڕ بوە لەبەردەم پێکهێنانی حکومەتدا، لەکاتێکدا رازی نەبوە بە دانانی جێگرێکی دیکە بۆ سەرۆکی هەرێمی کوردستان.

دوای ئەنجامدانی هەڵبژاردنەکان لەگەڵ گۆڕان نزیکبونەوەیەکی یەکجار زۆرمان هەبو

 

وتەبێژی پارتی نەیشاردەوە کاتێک وتی، "دوای ئەنجامدانی هەڵبژاردنەکان لەگەڵ گۆڕان نزیکبونەوەیەکی یەکجار زۆرمان هەبو لەسەر کۆمەڵێک لەو پاکێجانەی کە لە هەردولادا هەبو، ئەم قۆناغە پێویستی بە بەرپرسیارێتی زیاتری هەمو لایەنەکان هەیە بۆ لە ئەستۆگرتنی بەرپرسیارێتیە نیشتیمانی و نەتەوەییەکان".

تا ئێستا رون نیە ئایا ئەو دەربڕینەی پارتی سەبارەت بە نزیکبونەوەی لە گۆڕان روخسارێکی ستراتیجی هەیە یان ئامانجێکی تاکتیکییە، چونکە ئەگەر راست بێت پارتی و گۆڕان بەو ئەندازەیە نزیکبوبنەوە، پرسیارەکە ئەوەیە بۆچی رازیبونی گۆڕان بۆ دانانی دو جێگر بۆ سەرۆکی هەرێمی کوردستان هێندە درێژەی کێشا؟.

درێژەپێدانی گفتوگۆکانی حکومەت مابوەوە لەسەر ئەوەی بە تەفاهوم بێت 

 

لەبارەی راگرتنی کۆبونەوەکان بۆ پێکهێنانی حکومەت لە نێوان سێ براوەی سەرەکی هەڵبژاردنەکان وتەبێژەکەی پارتی رایگەیاند، "درێژەپێدانی گفتوگۆکانی حکومەت  لەسەر ئەوە مابوەوەبە تەفاهوم بێت لەسەر هەرسێ لایەنەکەوە، نەک بە ناڕازایی بون یان بە ئیکراھ وەریبگرێت".

رونیشیکردەوە، "کێشەکە کۆتاییهاتوە و ئومێد دەکەین لە چەند رۆژی داهاتودا پڕۆسەی پێکهێنانی کابینەکە دەستپێبکات".

هاوکات شۆڕش حاجى، ئەندامى خانەى راپەڕاندنی گۆڕان لە کۆنگرە رۆژنامەوانیەکەدا وتی، شاندى میوان، ستایش و پێزانینى خۆیان بۆ گۆڕان دەربڕی بۆ  هەڵوێستەکانى ئێمە لەسەر پرسى پێکهێنانى حکومەت.

کۆمێنتی خەندان لەبارەی ئەو لێدوانەی شۆڕش حاجى ئەوەیە، کە وادەردەکەوێت ئەو بزوتنەوەیە لەو هەمو ماوەیەدا لە "چاوەڕوانی هاتنی شاندی پارتی و سوپاسێکدا بوبن"، لەکاتێکدا رای گشتی کوردستان واچاوەڕوان بو ئەو بزوتنەوەیە وەک "سەری چاکسازی" لە کوردستان چاوەڕوانیەکەیان بۆ راگەیاندنی پاکێجی چاکسازی بوایە، کە وەک خۆیان دەڵێن رێککەوتنیان لەسەری کردوە.

شۆڕش حاجى رونیشیکردەوە، "ئەوەى بە ئەرکى سەرەکى خۆمانمان زانیوە جێبەجێمان کردوە، لەم هەلومەرجەشدا پێمانوایە تا حکومەت زوتر پێکبێت لە بەرژەوەندى گشتى و خەڵک و بازاڕ و موچەخۆرانە".

ئەو وتەیەی وتەبێژەکەی گۆڕان وێڕای ئەوەی کۆکە لەگەڵ خواست و ویستی خەڵک و وەک کۆنسێپت دەربڕینی خەمی خەڵکی گشتییە، بەڵام لێرەدا وەک نەوشیروان مستەفا، رێبەری کۆچکردوی ئەو بزوتنەوەی وتی، "عیبرەت لە جێبەجێکردندایە"، کە هیچکام لە وتەبێژانی پارتی و گۆڕان لە کۆنگرەکەی ئەمڕۆدا جگە لە مجامەلەی سیاسی هیچ وەستانەوەیەکی جددیان لەسەر چۆنێتی ئەو عیبرەتی جێبەجێکردنە نەخستەڕو.

 

جەختمان لە ئەنجامدانى چاکسازى کردوەتەوە

 

شۆڕش حاجی دەشڵێت، "لە کۆبونەوەکانى پێشومان و رێککەوتنى نێوانمان و ئەم کۆبونەوەیەشدا جەختمان لە ئەنجامدانى چاکسازى کردوەتەوە، رێککەوتنى سیاسى نێوانمان لەگەڵ پارتی پاکێجێکى سەرەکى تێیدایە، کە ئەنجامدانى چاکسازى و بەنیشتیمانیکردنى هێزى پێشمەرگەیە". 

ئەم دەربڕینەش بۆ خەندان جێگەی پرسیار بو، چونکە ئایا بەراستی تەنها داواکاری جەختکردنەوەی موجەڕەد بۆ بابەتێکی ئاوها چارەنوساز بەسە؟ لەکاتێکدا رەوایەتی بەشداریکردنی گۆڕان لە کابینەی نۆیەمدا مەرجدارە بە هێنانەدی بەهاکانی چاکسازییەوە.

ئەندامەکەی خانەی راپەڕاندنی گۆڕان باسى لەوەشکرد، بڕوایان وایە نابێت پۆستێک لێرە و لەوێ رێگربێت لە بەردەم پێکهێنانى حکومەت، "ئەوەش لەپێناو جێبەجێکردنى پاکێجەکانى چاکسازى" کە گۆڕان داوای دەکات.

هەرچەندە خەندان ئەو لێدوانەی شۆڕش حاجی بە لێدوانێکی بەرپرسیارانە دەبینێت، بەڵام هاتنە پێشەوەی ئەو پرسیارە ناشارێتەوە کە پەیوەندیدارە بەو هەموو لێدوانانەی پێشوتری بەرپرسانی ئەو بزوتنەوەیە کە لەو بابەتەدا دروست پێچەوانەی وتەبێژەکەیان بون کاتێک  کە بە پاساوی زۆرەوە دانانی جێگرێکی دیکەیان بۆ سەرۆکی هەرێمی کوردستان رەتدەکردەوە.

 

 



Copyright © 2016 Xendan.org all rights reserved

designed and developed by AVESTA GROUP